| 章節 | 現代台語漢字2021版經文 |
| 24:1 | 猶太人控告保羅 五日後，大祭司亞拿尼亞及幾若個長老，以及一個叫做帖土羅的律師來到凱撒利亞。𪜶佇腓力斯總督面前告保羅。 |
| 24:2 | 保羅一下受召出庭，帖土羅就給伊控告，講： 「腓力斯閣下，因為你賢明的治理互阮享受太平，所施行的多多改革嘛互國家得著進步。你的德政互阮逐時逐位感謝不盡。 |
| 24:3 | 併於上節 |
| 24:4 | 我毋敢耽誤你傷久，求你寬容來聽阮簡要的申訴。 |
| 24:5 | 阮看此個人是一個危險人物，佇全世界的猶太人中間作亂，是拿撒勒黨的首領。 |
| 24:6 | 伊想欲污染聖殿，阮就給伊掠起來。 |
| 24:8 | 你親身審問此個人就會明白阮控告伊一切的代誌。」 |
| 24:9 | 在場的猶太人嘛攏支持此個控告，講事情確實是按呢。 |
| 24:10 | 保羅為家己辯護 總督對保羅示意，叫伊發言，保羅就講： 「我知你佇本國判案真多年，我願意佇你面前為著家己辯護。 |
| 24:11 | 你調查就會明白，對我上耶路撒冷敬拜到今仔日只有十二日。 |
| 24:12 | 猶太人並無看著我佇聖殿及人辯論，嘛無看著我佇會堂抑是市內煽動群眾。 |
| 24:13 | 𪜶嘛𣍐當對你提出現在啲控告我的證據。 |
| 24:14 | 不過我著對你承認一項事，就是我照𪜶看做是異端的道路敬拜阮祖先的上帝，相信摩西的律法及先知的冊所記載的一切。 |
| 24:15 | 我對上帝有囥及𪜶仝款的向望，就是無論好人抑是歹人攏會對死閣活。 |
| 24:16 | 因為按呢，我對上帝及人攏盡力保持清白的良心。 |
| 24:17 | 「我離開耶路撒冷幾若年後閣轉去，是提一寡錢欲去救濟同胞，閣獻祭物。 |
| 24:18 | 𪜶佇聖殿看著我的時，我已經完成潔淨禮啲獻祭，彼時無群眾，嘛無擾亂， |
| 24:19 | 干焦有幾若個對亞細亞來的猶太人佇遐。𪜶若欲控告我，應該家己來你的面前告我才著。 |
| 24:20 | 若無，我佇議會申訴的時，𪜶著指出我有做什麼毋著。 |
| 24:21 | 只有一項事𪜶會當給我控告，就是我曾徛佇𪜶中間大聲講：『我今仔日受恁審判，是為著死人的閣活。』」 |
| 24:22 | 腓力斯對此個道路相當清楚，就宣布退庭，對𪜶講：「聽候指揮官呂西亞來，我才判決恁的案件。」 |
| 24:23 | 然後腓力斯命令彼個軍官顧守保羅，互伊有淡薄自由，閣准伊的朋友帶伊所欠用的物件來互伊。 |
| 24:24 | 保羅佇腓力斯及土西拉面前 幾若日後，腓力斯及伊的猶太夫人土西拉來。伊差人叫保羅出來，欲聽伊講論關係信基督耶穌的事。 |
| 24:25 | 保羅講到公義、節制，及將來的審判，腓力斯感覺驚惶，就對保羅講：「此擺到遮就好，有機會我才閣召你來。」 |
| 24:26 | 像時伊嘛有啲期待保羅會送錢互伊，所以常常叫保羅出來，及伊談論。 |
| 24:27 | 經過兩年，波求‧非斯都接腓力斯作總督。腓力斯為著欲互猶太人歡喜，繼續給保羅關佇監裡。 |