| 章節 | 現代台語漢字2021版經文 |
| 23:1 | 保羅注目看議員，講：「各位兄弟，我佇上帝的面前照完全清白的良心生活，直到今仔日。」 |
| 23:2 | 大祭司亞拿尼亞命令徛佇保羅身邊的人給伊搧嘴䩃。 |
| 23:3 | 保羅對伊講：「你此個漆甲白白的牆，上帝欲拍你！你開庭應該照法律給我審判，你竟然違法命令人拍我！」 |
| 23:4 | 徛佇保羅邊仔的人講：「你敢罵上帝的大祭司？」 |
| 23:5 | 保羅應講：「兄弟啊，我毋知伊是大祭司；聖經有記載講：『毋通侮辱治理人民的長官。』」 |
| 23:6 | 保羅一下知影𪜶中間有的是撒都該派的人，有的是法利賽派的人，就佇議會喝講：「兄弟，我是法利賽派的人，是法利賽人的子，我受審問是因為向望死人的閣活！」 |
| 23:7 | 伊一下按呢講，法利賽派的人及撒都該派的人就起爭論，議會嘛分裂。 |
| 23:8 | 因為撒都該派的人講無閣活，無天使，嘛無鬼神，毋拘法利賽派的人此三項攏有信。 |
| 23:9 | 喧嚷的聲愈來愈大，幾若個法利賽派的經學教師徛起來，極力抗議講：「阮尋𣍐出此個人有什麼錯誤。敢真正有鬼神抑是天使對伊講話喔？」 |
| 23:10 | 爭論愈來愈劇烈，指揮官驚了保羅互𪜶拆碎，就命令兵落去對眾人中間給保羅搶出來，導入去營房。 |
| 23:11 | 彼暝，主徛佇保羅的身邊，講：「著勇敢！你已經有佇耶路撒冷為著我做見證，嘛一定著佇羅馬為著我做見證。」 |
| 23:12 | 刣保羅的陰謀 隔早起，猶太人鬥陣計謀，咒誓若無刣死保羅毋食毋飲。 |
| 23:13 | 有四十外個人參加此個陰謀。 |
| 23:14 | 𪜶去見祭司長及長老，講：「阮已經咒重誓，若無刣死保羅攏毋食！ |
| 23:15 | 現在恁及議會著要求指揮官導保羅來互恁，假做欲較詳細查問伊的案件；阮會準備好勢，佇伊到遮以前給伊刣死。」 |
| 23:16 | 保羅的外甥聽著此個埋伏的陰謀，就入去兵營給保羅講。 |
| 23:17 | 保羅就請一個軍官來，給伊講：「請導此個少年人去見指揮官，伊有代誌欲給伊報告。」 |
| 23:18 | 軍官就導少年人去見指揮官，講：「彼個犯人保羅叫我來，要求我導此個少年人來見你，因為伊有代誌欲給你講。」 |
| 23:19 | 指揮官牽伊的手去邊仔問伊：「你有什麼代誌欲給我報告？」 |
| 23:20 | 伊講：「猶太人已經講好勢，假做欲閣較詳細調查保羅的案件，欲請你明仔載給伊送去議會。 |
| 23:21 | 請你毋通聽𪜶的話，因為有四十外個人埋伏啲等伊。𪜶咒誓，若無刣死保羅毋食毋飲。現在𪜶攏準備好勢，啲聽候你允准。」 |
| 23:22 | 指揮官就吩咐少年人講「毋通對人講你有報我知此項代誌」，然後叫伊轉去。 |
| 23:23 | 護送保羅去腓力斯總督遐 指揮官叫兩個軍官來，給𪜶講：「去準備步兵兩百個，馬兵七十個，及攑槍的兵兩百個，通佇今暗九點出發去凱撒利亞。 |
| 23:24 | 閣去準備馬互保羅騎，護送伊安全到腓力斯總督遐。」 |
| 23:25 | 指揮官就寫一張批按呢講： |
| 23:26 | 「克勞第‧呂西亞給總督腓力斯閣下請安。 |
| 23:27 | 此個人互猶太人掠去，啲欲互𪜶刣死的時，我一下知伊是羅馬公民，就帶兵去給伊救。 |
| 23:28 | 我想欲明白𪜶控告伊的理由就送伊去𪜶的議會。 |
| 23:29 | 我發見伊互人告是關係𪜶律法的爭論，並無犯著什麼該死抑是著關監的罪。 |
| 23:30 | 後來有人給我報告猶太人計謀欲害伊，所以我隨時送伊去你遐，像時命令告伊的人嘛著佇你的面前給伊控告。」 |
| 23:31 | 步兵執行命令，透暝將保羅帶去安提帕底。 |
| 23:32 | 隔日步兵轉去營裡，互馬兵繼續護送。 |
| 23:33 | 𪜶到凱撒利亞，將彼張批提互總督，嘛將保羅交互伊。 |
| 23:34 | 總督讀彼張批了，問保羅是叨一省的人，知影是基利家省的人， |
| 23:35 | 就講：「告你的人到位的時，我才處理你的案件。」後來總督命令將保羅拘留佇希律的公署。 |