| 章節 | 現代台語漢字2021版經文 |
| 10:1 | 彼得及哥尼流 佇凱撒利亞有一個人，名叫做哥尼流，是羅馬軍隊叫做「意大利營」的軍官。 |
| 10:2 | 伊是虔誠的人，及全家攏敬畏上帝；伊慷慨賑濟散赤的猶太人，閣不時對上帝祈禱。 |
| 10:3 | 有一日，差不多下晡三點，伊佇異象中明明看見上帝的天使入來，給伊叫：「哥尼流！」 |
| 10:4 | 伊給天使直直相，非常驚惶，講：「主啊，什麼代誌？」 天使講：「你的祈禱及賑濟已經攏得著上帝歡喜接納。 |
| 10:5 | 今著差人去約帕，請彼個稱做彼得的西門來。 |
| 10:6 | 伊作人客住佇翻皮師傅西門的厝；伊的厝佇海邊。」 |
| 10:7 | 對伊講話的天使離開了後，哥尼流叫兩個僕人及一個平常啲侍候伊敬畏上帝的兵來， |
| 10:8 | 將諸個代誌攏給𪜶講，就差𪜶去約帕。 |
| 10:9 | 隔日，差不多中晝，此三個人行欲到約帕的時，彼得𬦰去厝頂祈禱。 |
| 10:10 | 伊腹肚枵，想欲食。人啲為伊準備食物的時，伊入神， |
| 10:11 | 看見天開，有一個物件親像一塊大塊布，四角頭吊啲，縋落來土腳， |
| 10:12 | 內面有地上逐種的走獸、蟲𧒴，及空中的鳥類。 |
| 10:13 | 有聲對伊講：「彼得，起來，刣來食。」 |
| 10:14 | 毋拘彼得講：「主啊，絕對𣍐用得！我毋曾食污穢無清氣的物。」 |
| 10:15 | 彼個聲第二遍對伊講：「上帝互伊清氣的，你毋通看做污穢。」 |
| 10:16 | 此個代誌繼續有三遍，彼個物件隨時閣收倒去天頂。 |
| 10:17 | 彼得感覺奇怪，抵啲想此個異象是什麼意思的時，哥尼流差來的人已經尋著西門的厝，來徛佇門口， |
| 10:18 | 大聲問：「有一個叫做彼得的西門住佇遮無？」 |
| 10:19 | 彼得猶啲想此個異象是什麼意思的時，聖神給伊講：「有三個人來欲尋你！ |
| 10:20 | 你起來，落去，及𪜶做夥去；毋通躊躇，因為𪜶是我差來的。」 |
| 10:21 | 彼得就落去見許個人，給𪜶講：「我就是恁啲尋的人。恁來有什麼貴事？」 |
| 10:22 | 𪜶應講：「阮的長官哥尼流差阮來，伊是正直閣敬畏上帝的人，受全體猶太人的尊敬。伊得著聖天使的指示，來請你去𪜶兜欲領受你的教示。」 |
| 10:23 | 彼得就請𪜶入去，留𪜶住遐過暝。 隔日，彼得起來及𪜶做夥去；嘛有幾若個約帕的信徒做夥去。 |
| 10:24 | 閣隔日，𪜶到凱撒利亞，哥尼流已經邀請伊的親人及朋友啲聽候。 |
| 10:25 | 彼得入去，哥尼流就進前迎接，仆佇伊的腳前給伊拜。 |
| 10:26 | 彼得給伊牽起來，講：「起來，我家己嘛是人。」 |
| 10:27 | 彼得及伊那行那講話入去內面，看著真多人已經聚集佇遐， |
| 10:28 | 就對𪜶講：「恁知影，照阮的規定，猶太人𣍐用得及外邦人交陪來往，毋拘上帝已經指示我，無論什麼族群的人都毋通看伊做無清氣抑是污穢。 |
| 10:29 | 所以恁請我來，我無推辭就來。今請問，恁為著什麼代誌請我來？」 |
| 10:30 | 哥尼流講：「四日前，抵此個時陣，差不多下晡三點，我佇厝內啲祈禱的時，忽然有一個人穿光映映的衫徛佇我的面前， |
| 10:31 | 講：『哥尼流！上帝已經有聽見你的祈禱，嘛會記得你所做賑濟人的事。 |
| 10:32 | 你著差人去約帕，請叫做彼得的西門來；伊作人客住佇海邊翻皮師傅西門𪜶兜。』 |
| 10:33 | 我就隨時差人去請你來；今你來啦，實在真好。現在阮攏聚集佇上帝面前，欲聽主命令你所欲講攏總的話。」 |
| 10:34 | 彼得佇哥尼流的厝講道 彼得開嘴講：「今我確實知，上帝無偏待人。 |
| 10:35 | 無論叨一個民族，敬畏伊，行為正直的人，伊攏歡喜接納。 |
| 10:36 | 恁知：以前上帝有通過萬民的主耶穌基督對以色列人傳和平的福音；約翰傳洗禮的道理以後，此個福音有對加利利開始傳遍猶太全地； |
| 10:37 | 併於上節 |
| 10:38 | 就是，拿撒勒人耶穌，上帝有按怎用聖神及大能力給伊抹油任命，有按怎互伊去逐所在做好事，醫好所有受魔鬼壓制的人，因為上帝及伊同在。 |
| 10:39 | 阮就是伊佇猶太逐所在及耶路撒冷所做的事的見證人。𪜶給伊釘死佇十字架頂， |
| 10:40 | 第三日上帝互伊閣活，閣互伊顯現， |
| 10:41 | 毋是對所有的人，只有對阮諸個受上帝揀選來做見證的人顯現；阮曾佇伊對死人中閣活了後及伊做夥飲食。 |
| 10:42 | 伊命令阮傳福音互所有的人，證實伊是上帝所任命作活人及死人的審判者。 |
| 10:43 | 所有的先知攏為著伊做見證講，信伊的人攏會因為伊的名得著赦罪。」 |
| 10:44 | 外邦人領受聖神 彼得猶啲講話的時，聖神降臨佇所有聽道理的人。 |
| 10:45 | 及彼得對約帕做夥來許個受割禮的信徒攏大著驚，因為聖神的恩賜嘛有摒落佇外邦人的身上； |
| 10:46 | 因為𪜶有聽著許個人講靈語閣稱讚上帝的偉大。然後彼得講： |
| 10:47 | 「諸個人及咱仝款已經有領受聖神，豈有人會當禁止𪜶領受水的洗禮？」 |
| 10:48 | 伊就命令𪜶奉耶穌基督的名領受洗禮。後來，𪜶請彼得及𪜶閣住幾若日。 |