| 章節 | 台語漢字本聖經 請按此下載安裝Open Han 2024版字型，免得漏掉造字 |
| 15:1 | 迷羊的譬喻 ( 太 18:12-14 ) 眾抽餉的及歹人啲就近耶穌來聽伊。 |
| 15:2 | 法利賽人及經學士耦耦唸講：「此個人接納歹人，續及𪜶食。」 |
| 15:3 | 耶穌設此個譬喻對𪜶講： |
| 15:4 | 「恁中間甚麼人有一百隻羊失落一隻，豈無且放九十九隻佇山裡，去尋所失落的，到得著嗎？ |
| 15:5 | 已經尋著，就歡喜背伊佇肩頭頂， |
| 15:6 | 到厝，就聚集伊的朋友厝邊，給𪜶講：『著及我歡喜，因為所失落的羊我已經尋著。』 |
| 15:7 | 我給恁講，歹人中有一人反悔，就佇天裡也欲按呢為著伊歡喜，比為著九十九個義人免反悔的閣卡歡喜。」 |
| 15:8 | 失錢的譬喻 「抑是甚麼婦仁人有十個銀仔，若失落一個，豈無點燈，掃厝，勤勤尋到著嗎？ |
| 15:9 | 已經尋著，就聚集伊的朋友厝邊，講：『著及我歡喜，因為所失落的銀仔我已經尋著！』 |
| 15:10 | 我給恁講，歹人中有一人反悔，就佇上帝天使的面前為著伊歡喜也是按呢。」 |
| 15:11 | 浪子的譬喻 閣講：「某人有二個子。 |
| 15:12 | 彼個第二個給老父講：『阿爸啊，將我應得的業分互我。』伊的老父就給𪜶分家伙。 |
| 15:13 | 閣無幾日，彼個第二子一盡收拾伊的物，出外去遠遠的所在。佇遐放蕩，毀壞伊的業。 |
| 15:14 | 已經損了了，抵著彼所在大飢荒，伊才知欠缺的艱苦。 |
| 15:15 | 就去倚彼所在一個百姓；彼人差伊去山裡飼豬。 |
| 15:16 | 愛將豬所食的豆莢來止飢，也無人互伊。 |
| 15:17 | 伊醒悟，就講：『我的老父有偌多長工，米糧食有剩，若是我佇遮啲欲餓死啊！ |
| 15:18 | 我欲起來，去尋我的老父，給伊講：阿爸啊！我有得罪天，及佇你的面前； |
| 15:19 | 今了後，我𣍐堪得叫做你的子，著互我親像你的長工的一個。』 |
| 15:20 | 就起來，去尋伊的老父。相離猶久遠，伊的老父看見伊，就憐憫伊，走去抱伊的頷頸，直直給伊唚。 |
| 15:21 | 子就給伊講：『阿爸啊！我有得罪天，及佇你的面前；今了後，𣍐堪得叫做你的子。』 |
| 15:22 | 若是老父對伊許個奴僕講：『緊緊擜上好的衫來給伊穿；閣給伊掛手指；續給伊穿鞋； |
| 15:23 | 也牽彼隻肥的牛仔來刣，咱食來歡喜； |
| 15:24 | 因為我此個子死有復活，失落有閣得著。』𪜶就相及歡喜。 |
| 15:25 | 彼時，伊的大子佇園裡。倒來欲到厝，聽見作樂及跳舞的聲， |
| 15:26 | 就叫一個奴僕來，問伊啲啥代。 |
| 15:27 | 伊給伊講：『恁小弟來啦；恁老父因為得著伊好好倒來，所以刣彼隻肥的牛仔。』 |
| 15:28 | 大子受氣，入去；伊的老父出來勸伊。 |
| 15:29 | 伊應伊的老父講：『你看，我服事你許多年，攏未曾違逆你的命令，你也未曾互我一隻羊仔子，通及我的朋友相及歡喜。 |
| 15:30 | 總是你此個子，交陪娼妓一盡破費你的業，一下倒來，你就為著伊刣肥的牛仔。』 |
| 15:31 | 老父就給伊講：『子啊！你常常及我佇啲，凡我所有的攏是你的； |
| 15:32 | 若是你此個小弟死有復活，失落有閣得著，咱應該著歡喜快樂。』」 |