| 章節 | 現代台語漢字2021版經文 |
| 14:1 | 耶路撒冷及列國 看咧，上主的日欲到啦，人欲佇你的目睭前分你搶來的物。 |
| 14:2 | 我欲召集萬國來攻擊耶路撒冷；城會受攻破，厝受搶劫，婦仁人受凌辱；城內的住民一半互人掠去，賰的留啲。 |
| 14:3 | 後來，上主會出去及許個國交戰，及以前像款。 |
| 14:4 | 佇彼日，伊會徛佇耶路撒冷東旁的橄欖山。橄欖山會對中央裂開，一半向南移徙，一半向北，對東到西形成非常大的山谷。 |
| 14:5 | 恁會順此條我所分開迵到亞悉的山谷逃走，親像恁的祖先佇猶大王烏西亞的時因為地動啲逃走像款。上主 — 我的上帝會導所有的聖者做夥來。 |
| 14:6 | 彼日，無日光，𣍐寒，𣍐落霜。 |
| 14:7 | 閣有一個特別的日，只有上主知；無分日時抑是暝時，因為暝時嘛有光。 |
| 14:8 | 彼日會有活水對耶路撒冷流出來；一半流去東旁的死海，一半流去西旁的地中海；冬天夏天攏是按呢。 |
| 14:9 | 上主欲做全地的王。彼日，上主至尊無對，伊的名獨一無二。 |
| 14:10 | 對北旁的迦巴到耶路撒冷南旁的臨門，全部的地區攏會變做平原。耶路撒冷佇原位高高徛啲，城的範圍對便雅憫門經過舊門到角門；對哈楠業樓到王的酒窟。 |
| 14:11 | 耶路撒冷會有真多人佇遐安居樂業，𣍐閣有受毀滅的咒詛。 |
| 14:12 | 許個攻擊耶路撒冷的列國，上主欲降災禍互𪜶；𪜶猶活啲的時，肉會爛去，目睭及舌嘛攏會爛去。 |
| 14:13 | 佇彼日，上主欲互𪜶起混亂；𪜶扭來扭去，互相攻擊。 |
| 14:14 | 猶大嘛欲佇耶路撒冷參戰；彼時，周圍列國真多財物，就是金、銀、衣服，攏會收集倚來。 |
| 14:15 | 像款的災禍嘛會臨到敵人的馬、騾、駱駝、驢，以及營中所有的牲生。 |
| 14:16 | 所有來攻擊耶路撒冷的列國猶活落來的人，逐年會上來敬拜上主 — 萬軍的統帥此位君王，閣守搭寮節。 |
| 14:17 | 地上萬族中，無上來耶路撒冷敬拜上主 — 萬軍的統帥此位君王的人，雨水𣍐落佇𪜶的土地。 |
| 14:18 | 埃及人若無上來守節，上主𣍐落雨水佇𪜶的土地，上主嘛會用瘟疫刑罰許個無來守搭寮節的列國。 |
| 14:19 | 這就是埃及及許個無上來守搭寮節的列國所受的刑罰。 |
| 14:20 | 佇彼日，馬的頷鈴會刻字：「聖化歸上主」；上主聖殿內的鼎會親像祭壇前的碗像款神聖。 |
| 14:21 | 所有耶路撒冷及猶大的鼎，攏會聖化歸上主 — 萬軍的統帥；所有獻祭的人攏會用諸個鼎煮肉。佇彼日，𣍐閣有人佇上主 — 萬軍的統帥的聖殿內買賣。 |