| 章節 | 台語漢字本聖經 請按此下載安裝Open Han 2024版字型，免得漏掉造字 |
| 40:1 | 耶利米及基大利徛起 耶路撒冷人及猶大人受掠去巴比倫，其中耶利米亦互侍衛長掠去，用鐵鍊縛伊，後來對拉瑪放伊去，然後耶和華的話臨到耶利米。 |
| 40:2 | 侍衛長叫耶利米來，給伊講：「耶和華──你的上帝曾講欲降此個災禍互此個所在。 |
| 40:3 | 今耶和華互伊到，照伊所講的來行；因為恁得罪耶和華，無聽趁伊的話，所以此個代誌到佇恁。 |
| 40:4 | 看啊，我今仔日解開你手裡的鐵鍊，你若看及我去巴比倫是好，就通來去，我欲好款待你；你若看及我去巴比倫好，就莫用去。看啊，全地佇你的面前，你看叨落是好，是合宜，做你通去！」 |
| 40:5 | 伊猶未倒去，侍衛長閣給伊講：「你通倒去沙番的孫亞希甘的子基大利遐；現今巴比倫王設立伊管轄猶大諸個城。你通及伊徛起佇百姓中，抑是，你所看做合宜的所在就通去。」對按呢侍衛長送伊米糧及禮物，互伊去。 |
| 40:6 | 耶利米就到米斯巴見亞希甘的子基大利，及伊徛起佇境內剩的百姓的中間。 |
| 40:7 | 基大利受設立做總督 佇田野一切的軍長及屬𪜶的人聽見巴比倫王設立亞希甘的子基大利管轄此所在，亦將無掠去巴比倫的查甫人、婦仁人、囝仔，及境內極喪鄉的人攏總交伊。 |
| 40:8 | 𪜶就來米斯巴基大利遐，就是尼探雅的子以實瑪利、加利亞二個子約哈難及約拿單、單戶篾的子西萊雅及尼陀法人以裴的眾子，瑪迦人的子耶撒尼亞及屬𪜶的人。 |
| 40:9 | 沙番的孫亞希甘的子基大利對𪜶及屬𪜶的人咒誓講：「莫得驚服事迦勒底人，做恁徛起遮，服事巴比倫王，恁就會得著福氣。 |
| 40:10 | 論到我，我欲𫢶佇米斯巴伺候許個會來咱遮的迦勒底人；若是恁諸個恁著積聚酒，夏天的果子，及油，收佇器具內，徛起佇恁所佔的城。」 |
| 40:11 | 閣有佇摩押及亞捫族的中間，佇以東及列國中間一切的猶大人，聽見巴比倫王有留所剩的猶大人，閣設立沙番的孫亞希甘的子基大利管轄𪜶。 |
| 40:12 | 諸個一切的猶大人對𪜶互人趕去的逐所在倒來，到猶大地的米斯巴基大利遐，續積聚多多酒，及夏天的果子。 |
| 40:13 | 基大利受刣死 加利亞的子約哈難及佇田野一切的軍長來米斯巴見基大利，對伊講： |
| 40:14 | 「亞捫族的王巴利斯有差尼探雅的子以實瑪利來欲取你的生命，你知嗎？」總是亞希甘的子基大利信𪜶。 |
| 40:15 | 加利亞的子約哈難佇米斯巴暗靜對基大利講：「求你准我去，我欲刣尼探雅的子以實瑪利，的確無人知。豈通互伊取你的生命，致到歸倚你的猶大人四散，互猶大所剩的人攏滅無啊？」 |
| 40:16 | 亞希甘的子基大利給加利亞的子約哈難講：「你通做此個事，你所講以實瑪利的事是無影。」 |