| 章節 | 現代台語漢字2021版經文 |
| 17:1 | 以色列王何細亞 猶大王亞哈斯第十二年，以拉的子何細亞佇撒馬利亞開始作王，統治以色列九年。 |
| 17:2 | 伊做上主看做歹的事，毋拘無親像以前以色列諸個王。 |
| 17:3 | 亞述王撒縵以色上來攻擊。何細亞投降，給伊進貢。 |
| 17:4 | 後來，何細亞派使者去見埃及王梭，請求援助，無親像過去每年進貢亞述王。亞述王知何細亞背叛，就給伊掠起來，關佇監裡。 |
| 17:5 | 撒馬利亞淪陷 亞述王上來攻打以色列，圍困撒馬利亞三年久。 |
| 17:6 | 何細亞第九年，亞述王攻取撒馬利亞，閣將以色列人掠去亞述，互𪜶住佇哈臘、歌散地區的哈博河邊，以及米底亞人的城。 |
| 17:7 | 這是因為以色列人得罪上主 — 𪜶的上帝；伊有導𪜶出埃及地，脫離埃及王法老的手，𪜶卻去拜別個神明， |
| 17:8 | 去隨互上主佇以色列人面前趕出的列國及以色列列王所設的風俗規例。 |
| 17:9 | 以色列人暗中做毋著的事，得罪上主 — 𪜶的上帝，佇𪜶所有徛起的所在，對干焦有守望台的庄社到有堡壘的城，起山頭壇。 |
| 17:10 | 𪜶佇逐個高的山崙仔、逐欉青翠的樹下面，造石柱像及亞舍拉女神； |
| 17:11 | 閣佇逐個山頭壇燒香，學許個互上主佇𪜶面前趕出的列國的所做，做邪惡的事激上主受氣； |
| 17:12 | 閣拜上主禁止𪜶拜的偶像。 |
| 17:13 | 上主曾差遣眾先知及先見警戒以色列及猶大，講：「著離開恁的歹行為，執守我的誡命及規例；著遵守我全部的律法，就是我命令恁的列祖，及通過我的僕人眾先知傳互恁的。」 |
| 17:14 | 毋拘𪜶毋聽趁，親像𪜶的列祖硬心固執，毋肯悔改，毋信服上主 — 𪜶的上帝。 |
| 17:15 | 𪜶棄拺上主的規例，以及伊及𪜶的列祖所立的約，毋聽伊的警戒，去拜虛假的神明，致到家己成做空虛。雖然上主曾命令𪜶毋通學周圍列國的所做，𪜶猶原去學𪜶。 |
| 17:16 | 𪜶棄拺上主 — 𪜶的上帝所有的誡命，為家己鑄造兩隻牛仔的像，做亞舍拉女神的柱像，敬拜天頂的萬象，服事巴力。 |
| 17:17 | 𪜶燒𪜶的子查某子獻做祭，閣抽籤卜卦，行邪術，做上主看做歹的事，來出賣家己，激上主受氣。 |
| 17:18 | 所以上主對以色列人發大受氣，對伊的面前給𪜶趕出去；只有賰猶大一個支族。 |
| 17:19 | 猶大嘛無遵趁上主 — 𪜶的上帝的命令，顛倒學以色列的風俗規例。 |
| 17:20 | 上主棄拺以色列所有的後代，給𪜶苦楚，將𪜶交互搶奪𪜶的人，最後對伊的面前給𪜶趕出去。 |
| 17:21 | 以色列對大闢家分裂出去，就設立尼八的子耶羅波安作王。耶羅波安引誘以色列，互𪜶無順趁上主，陷落大罪。 |
| 17:22 | 以色列人繼續犯耶羅波安攏總的罪。 |
| 17:23 | 最後，上主給以色列對伊的面前趕出去，抵抵照伊通過伊的僕人眾先知所講的。按呢，以色列受掠離開𪜶的家鄉去到亞述，直到今仔日。 |
| 17:24 | 亞述遷徙人來撒馬利亞 亞述王對巴比倫、古他、亞瓦、哈馬，及西法瓦音，遷徙人來住佇撒馬利亞逐個城，代替以色列人；𪜶就佔領撒馬利亞，住佇許個城。 |
| 17:25 | 𪜶抵仔住佇遐的時，無拜上主，所以上主就互獅入去𪜶中間，咬死一寡人。 |
| 17:26 | 有人對亞述王講：「你遷徙去住佇撒馬利亞許個城的逐族的人，毋知彼所在的上帝的規例，所以伊互獅入去𪜶中間，咬死𪜶，因為𪜶毋知彼所在的上帝的規例。」 |
| 17:27 | 亞述王就命令講：「著互對遐掠來的一個祭司倒去，互伊住佇遐，用彼所在的上帝的規例教導𪜶。」 |
| 17:28 | 按呢，就有一個對撒馬利亞互人掠去的祭司倒來，住佇伯特利，教𪜶著按怎敬畏上主。 |
| 17:29 | 毋拘逐族的人佇𪜶徛起的城造𪜶家鄉的神明，安置佇撒馬利亞人以前造的山頭壇。 |
| 17:30 | 巴比倫人造疏割‧比訥的像，古他人造匿甲的像，哈馬人造亞示瑪的像， |
| 17:31 | 亞瓦人造匿哈及他珥他的像，西法瓦音人燒子兒獻互西法瓦音的神明亞得米勒及亞拿米勒。 |
| 17:32 | 𪜶拜上主，毋拘嘛對𪜶中間設立人做山頭壇的祭司，替𪜶佇山頭壇獻祭。 |
| 17:33 | 𪜶拜上主，閣照𪜶逐國的風俗規例服事家己的神明。 |
| 17:34 | 到今仔日，𪜶猶原照以前的風俗啲做，無敬畏上主，無遵趁上主吩咐雅各後代的規例、命令、律法，及誡命；上主有給雅各號名叫做以色列。 |
| 17:35 | 上主曾及𪜶立約，吩咐𪜶，講：「毋通拜別個神明；毋通跪拜𪜶，毋通服事𪜶，嘛毋通給𪜶獻祭。 |
| 17:36 | 只有彼位伸出大權能的手導恁出埃及的上主，恁著敬畏伊，跪拜伊，對伊獻祭。 |
| 17:37 | 我寫互恁的規例、命令、律法，及誡命，恁應該永遠執守順趁；毋通拜別個神明。 |
| 17:38 | 我及恁立的約，恁毋通𣍐記得，嘛毋通拜別個神明。 |
| 17:39 | 只有著敬畏上主 — 恁的上帝，伊就會救恁脫離恁一切對敵的手。」 |
| 17:40 | 毋拘𪜶毋聽趁，猶原照以前的風俗啲做。 |
| 17:41 | 按呢，諸個對列國遷徙來的人拜上主，閣服事𪜶的偶像；𪜶的子子孫孫到今仔日嘛攏學𪜶的祖先按呢啲做。 |