| 章節 | 現代台語漢字2021版經文 |
| 5:1 | 乃縵得著醫治 敘利亞王的元帥乃縵，佇伊的主人面前是重要人物，真受尊重，因為上主曾通過伊互敘利亞得勝。伊是強猛的勇士；毋拘致著痲瘋病。 |
| 5:2 | 有一遍，敘利亞人歸陣出去，對以色列地掠一個查某囝仔；伊就侍候乃縵的某。 |
| 5:3 | 此個查某囝仔給伊的女主人講：「苦𣍐得我的主人會當去見撒馬利亞的先知；伊一定會當醫好主人的痲瘋病。」 |
| 5:4 | 乃縵去對伊的主人講：「以色列的查某囝仔按呢按呢講。」 |
| 5:5 | 敘利亞王講：「你通去，我嘛欲寄你提一張批互以色列王。」乃縵就出發，帶三百公斤的銀、七十公斤的金、十套衣服。 |
| 5:6 | 伊閣將彼張批提互以色列王；批內按呢寫：「我派我的人臣乃縵提批去見你，你著醫好伊的痲瘋病。」 |
| 5:7 | 以色列王批看了，就拆裂伊的衫，講：「我豈是上帝，會當互人死，互人活？此個人竟然派人來我遮，叫我著醫好伊的人臣的痲瘋病；請恁斟酌想，看此個人按怎尋孔尋縫攻擊我。」 |
| 5:8 | 上帝重用的人以利沙聽見以色列王拆裂伊的衫，就差人去見王講：「你是按怎拆裂衫？互彼個人來我遮，伊就知以色列中有先知。」 |
| 5:9 | 乃縵就帶伊的馬車隊來，停佇以利沙的厝門口。 |
| 5:10 | 以利沙差一個使者對乃縵講：「你去約旦河洗身軀洗七遍，你的肉會復原，你就清氣。」 |
| 5:11 | 乃縵就受氣，離開，講：「我本來想講伊一定會出來見我，徛啲求叫上主 — 伊的上帝的名，佇患著病的所在搖手，醫好我的痲瘋病。 |
| 5:12 | 大馬士革的亞瑪拿河及法珥法河，豈無比以色列所有的水較好？我佇遐洗身軀豈𣍐得著清氣？」伊就受氣，越轉身做伊去。 |
| 5:13 | 伊許個僕人進前，對伊講：「主人，先知若教你去做困難的代誌，你豈無欲做？何況伊干焦對你講，去洗就清氣？」 |
| 5:14 | 乃縵就照上帝重用的人的話落去約旦河浸七遍；伊的肉復原親像囝仔的肉，伊就清氣。 |
| 5:15 | 伊及所有隨伊的人轉來上帝重用的人遐，徛佇伊的面前講：「今我知，全世界以色列以外，無上帝。現在請你收你的僕人的禮物。」 |
| 5:16 | 以利沙講：「我指我所服事永活的上主咒誓，我無收。」乃縵一再請伊收，伊攏毋肯。 |
| 5:17 | 乃縵講：「你若無欲接受，請你將兩隻騾會當載的土互你的僕人。對現在起，你的僕人無欲閣對別個神明獻燒化祭抑是別款的祭，只有獻互上主。 |
| 5:18 | 毋拘有一項事，願上主赦免你的僕人，就是我的主人入臨門廟仆拜的時，我著侍候伊，所以我嘛著佇臨門廟仆拜；願上主佇此項事赦免你的僕人。」 |
| 5:19 | 以利沙就給伊講：「你通平安倒去。」 乃縵離開了，行一站路， |
| 5:20 | 上帝重用的人以利沙的僕人基哈西想講：「我的主人毋肯接受此個敘利亞人乃縵帶來的禮物；我指永活的上主咒誓，我欲走去趇伊，對伊提一寡。」 |
| 5:21 | 基哈西就去趇乃縵。乃縵看著有人啲趇伊，就落車迎接伊，講：「豈有什麼代誌？」 |
| 5:22 | 基哈西講：「無，無特別的代誌。毋拘我的主人差我來，講：『抵即有先知的兩個少年學生，對以法蓮山區來我遮；請你用銀三十公斤，衣服兩套互𪜶。』」 |
| 5:23 | 乃縵講：「請接受六十公斤。」乃縵一再請伊收。乃縵就將裝佇兩個袋仔彼六十公斤的銀，及兩套衣服，交互伊兩個僕人揹啲，行佇基哈西的頭前。 |
| 5:24 | 𪜶到山崙仔，基哈西對𪜶的手接物件，下入去厝內；就差𪜶轉去，𪜶就倒去。 |
| 5:25 | 伊入去徛佇主人的面前。以利沙問伊講：「基哈西，你對叨位來？」 基哈西應講：「你的僕人無去叨位。」 |
| 5:26 | 以利沙給伊講：「彼個人落車迎接你的時，我的心豈無及你佇遐？這豈是接受銀，接受衣服、橄欖園、葡萄園、牛、羊、僕人、女婢的時？ |
| 5:27 | 因為按呢乃縵的痲瘋病欲傳互你及你的後代，直到永遠。」基哈西對以利沙的面前退出去，就致著痲瘋病，肉白甲親像雪。 |