| 章節 | 現代台語漢字2021版經文 |
| 3:1 | 以色列及摩押交戰 猶大王約沙法十八年，亞哈的子約何蘭佇撒馬利亞做以色列王十二年。 |
| 3:2 | 伊做上主看做歹的事，毋拘無親像伊的父母所做的赫呢歹，因為伊有將伊的老父所造巴力的柱像除去。 |
| 3:3 | 猶久伊及尼八的子耶羅波安仝款，互以色列人陷落罪，攏無停止。 |
| 3:4 | 摩押王米沙飼真多羊，曾用十萬隻羊仔，十萬隻綿羊的毛，向以色列王進貢。 |
| 3:5 | 亞哈死了後，摩押王背叛以色列王。 |
| 3:6 | 彼時約何蘭王對撒馬利亞出發，召集以色列軍兵。 |
| 3:7 | 像時，伊嘛派人去見猶大王約沙法，講：「摩押王背叛我，你豈欲及我做夥去攻打摩押？」 約沙法講：「我願意及你做夥去；我的就是你的，我的人民就是你的人民，我的馬就是你的馬。 |
| 3:8 | 今咱欲對叨一條路去攻打？」 約何蘭講：「對以東曠野的路。」 |
| 3:9 | 以色列王及猶大王，以及以東王做夥出發；𪜶踅一大輪行七日的路站，軍隊及隨𪜶的牲生無水通飲。 |
| 3:10 | 以色列王講：「慘啊，上主聚集咱三個王，原來是欲將咱交佇摩押人的手。」 |
| 3:11 | 約沙法講：「遮豈無上主的先知互咱通請問上主？」 以色列王一個人臣應講：「以前啲服事以利亞，沙法的子以利沙佇遮。」 |
| 3:12 | 約沙法講：「伊一定有上主的話。」以色列王、約沙法，及以東王就落去見伊。 |
| 3:13 | 以利沙對以色列王講：「我及你有什麼關係？你去尋恁老父老母的先知。」 以色列王給伊講：「按呢講。上主聚集阮三個王，是欲將阮交佇摩押人的手是無？」 |
| 3:14 | 以利沙講：「我指我所侍奉永活的上主 — 萬軍的統帥咒誓，我若毋是尊重猶大王約沙法，就毋見你，毋插你。 |
| 3:15 | 今著給我叫一個琴師來遮。」 琴師彈的時，上主的氣力臨到以利沙。 |
| 3:16 | 伊就講：「上主按呢講：『恁著佇此個山谷逐所在挖溝。 |
| 3:17 | 因為上主按呢講：雖然恁無看見風，無看見雨；猶久此個山谷欲有水滿滿，通互恁及恁的牛羊牲生飲。』 |
| 3:18 | 此個事對上主來講猶是小事；伊欲閣將摩押人交佇恁的手。 |
| 3:19 | 恁欲攻破𪜶逐個堅固的城及媠的城，剉逐欉好的果子樹，塞牢攏總的水泉，用石頭毀壞所有好的田園。」 |
| 3:20 | 隔早起獻祭的時，忽然有水對以東流來，逐所在有水滿滿。 |
| 3:21 | 摩押人戰敗 摩押人聽著此三個王上來，欲及𪜶交戰，所有會當攑武器的，對老到少年，攏來邊界防守。 |
| 3:22 | 隔早起𪜶早早起來，日頭照佇水面，𪜶對遠遠看，水紅親像血。 |
| 3:23 | 摩押人就講：「歸個攏是血！許個王互相攻擊，一定攏死啊。摩押人啊，咱著來去搶戰利品。」 |
| 3:24 | 摩押人來到以色列的軍營，以色列人起來攻擊𪜶，𪜶就逃走。以色列人追殺𪜶， |
| 3:25 | 毀壞𪜶的城；用石頭填滿所有好的田園，塞牢攏總的水泉，閣剉𪜶逐欉好的果子樹；只有賰吉珥‧哈列設的石牆；挕石的兵四圍攻擊此個城。 |
| 3:26 | 摩押王看著交戰對伊不利，就帶七百個攑刀的兵欲衝出包圍，去敘利亞王遐，毋拘無法度。 |
| 3:27 | 伊就將欲續接伊作王的大子，佇城頂獻做燒化祭；有大受氣臨到以色列。彼三個王就離開摩押，倒去𪜶本國。 |