| 章節 | 現代台語漢字2021版經文 |
| 22:1 | 米該雅警告亞哈 ( 代下 18:2-27 ) 以色列及敘利亞三年久無交戰。 |
| 22:2 | 到第三年，猶大王約沙法落去以色列王遐。 |
| 22:3 | 以色列王對伊的人臣講：「基列的拉末是咱的，恁知無？咱哪無欲採取行動，對敘利亞王的手提倒來？」 |
| 22:4 | 亞哈對約沙法講：「你欲及我做夥去攻打基列的拉末無？」 約沙法對以色列王講：「我的就是你的，我的人民就是你的人民，我的馬就是你的馬。」 |
| 22:5 | 約沙法閣對以色列王講：「請你先問上主的意思。」 |
| 22:6 | 以色列王就召集先知大約四百人，問𪜶講：「我通去攻打基列的拉末，抑是毋通？」 𪜶應講：「通去攻打；主欲將此個城交佇王的手。」 |
| 22:7 | 約沙法講：「遮豈無閣有上主的先知互咱通問？」 |
| 22:8 | 以色列王給約沙法講：「猶有一個人，是音拉的子米該雅，咱通對伊請問上主；毋拘我怨恨伊，因為伊對我講的預言無一項好，只有講災禍。」 約沙法講：「請王毋通按呢講。」 |
| 22:9 | 以色列王就召一個官員來，講：「你趕緊去叫音拉的子米該雅來。」 |
| 22:10 | 以色列王及猶大王約沙法佇撒馬利亞城門口的五穀場，穿禮服，坐佇𪜶的寶座；所有的先知攏佇𪜶的面前講預言。 |
| 22:11 | 基拿拿的子西底家做鐵的角，講：「上主按呢講：『你欲用諸個鐵角觸敘利亞人，觸甲𪜶攏消滅。』」 |
| 22:12 | 所有的先知攏按呢預言講：「通去攻打基列的拉末，一定得勝，上主欲將此個城交佇王的手。」 |
| 22:13 | 彼個去叫米該雅的使者給伊講：「你看，所有的先知攏對王講好話，請你嘛及𪜶像款講好話。」 |
| 22:14 | 米該雅講：「我指永活的上主咒誓，上主對我講什麼，我就對王講什麼。」 |
| 22:15 | 米該雅來到王的面前，王問伊講：「米該雅，阮通去攻打基列的拉末，抑是毋通？」 伊應講：「好啊，做你去攻打，一定會勝利；上主欲將此個城交佇王的手。」 |
| 22:16 | 王對伊講：「我著叫你咒誓幾遍，你才會奉上主的名對我講實在話？」 |
| 22:17 | 米該雅講：「我看見以色列眾人親像無牧者的羊四散佇山裡；上主按呢講：『諸個人無主人；逐個人通平安倒去𪜶兜。』」 |
| 22:18 | 以色列王對約沙法講：「我豈無給你講，此個人對我講的預言攏無好話，只有講災禍。」 |
| 22:19 | 米該雅繼續講：「所以，著聽上主的話！我看見上主坐佇寶座，天頂的萬軍徛佇伊的正旁倒旁。 |
| 22:20 | 上主講：『什麼人欲引誘亞哈，互伊去基列的拉末，死佇遐？』此個講按呢，彼個講按呢。 |
| 22:21 | 後來有一個神出來，徛佇上主的面前，講：『我去給伊引誘。』 |
| 22:22 | 上主問伊講：『你欲按怎給引誘？』伊應講：『我欲出去做白賊的神，互許個先知講白賊。』上主講：『你給伊引誘，一定會成功。你去，照按呢做。』 |
| 22:23 | 現在上主有互白賊的神入佇你諸個先知的嘴；上主宣布欲降災禍互你。」 |
| 22:24 | 基拿拿的子西底家行進前，搧米該雅的嘴䩃，講：「上主的神什麼時離開我來對你講話？」 |
| 22:25 | 米該雅講：「你去匿佇密房彼日就會知。」 |
| 22:26 | 以色列王講：「將米該雅掠起來，交互市長亞們及王的子約阿施， |
| 22:27 | 給𪜶講：『王交代：將此個人關落監，互伊一屑仔餅及水就好，聽候我平安倒來。』」 |
| 22:28 | 米該雅講：「你若真正平安倒來，就是上主無託我講話。」閣講：「恁大家，著會記得我講的話！」 |
| 22:29 | 亞哈戰死 ( 代下 18:28-34 ) 以色列王亞哈及猶大王約沙法去進攻基列的拉末。 |
| 22:30 | 以色列王對約沙法講：「我欲改裝上戰場，你通穿你的王服。」以色列王就改裝上陣。 |
| 22:31 | 敘利亞王有吩咐伊三十二個戰車長，講：「毋通及𪜶的士兵抑是官長交戰，只有及以色列王交戰。」 |
| 22:32 | 戰車長看著約沙法就講：「此個一定是以色列王！」𪜶就斡去欲攻擊伊。約沙法就喝救命。 |
| 22:33 | 戰車長一下看著伊毋是以色列王，就越走無閣追伊。 |
| 22:34 | 有一個敘利亞的兵仔開弓，無拍算射入以色列王戰甲的敆綴。王給駛車的講：「我著重傷。緊踅翻頭，帶我離開戰場。」 |
| 22:35 | 彼日，交戰非常猛烈。有人扶王互伊徛佇車裡，面向敘利亞人；到黃昏王就死，血對著傷的孔嘴流到車底。 |
| 22:36 | 日欲落的時，有聲傳遍軍營，講：「逐個人倒去家己的本城，倒去家己的本地。」 |
| 22:37 | 王死，人將伊帶倒去撒馬利亞；𪜶將王安葬佇遐。 |
| 22:38 | 有人佇撒馬利亞的水池邊洗伊的車 (娼妓嘛佇遐洗身軀)，狗來舐伊的血，抵照上主所講的話。 |
| 22:39 | 亞哈其他的事蹟，及伊的所做，以及伊起造象牙宮及城，攏記載佇《以色列列王史》。 |
| 22:40 | 亞哈轉去伊的列祖遐；伊的子亞哈謝續接伊作王。 |
| 22:41 | 猶大王約沙法 ( 代下 20:31-21:1 ) 以色列王亞哈第四年，亞撒的子約沙法做猶大王。 |
| 22:42 | 約沙法坐位的時三十五歲，佇耶路撒冷作王二十五年；伊的老母叫做阿蘇芭，是示利希的查某子。 |
| 22:43 | 約沙法行伊老父亞撒的路，攏無偏離，做上主看做好的事；毋拘山頭壇猶未廢除，人民猶原佇遐獻祭燒香。 |
| 22:44 | 約沙法及以色列王和平相處。 |
| 22:45 | 約沙法其他的事蹟、伊的成就，以及按怎交戰，攏記載佇《猶大列王史》。 |
| 22:46 | 伊的老父亞撒留落來的孌童，約沙法攏對國內除去。 |
| 22:47 | 彼時以東無王，約沙法派總督治理。 |
| 22:48 | 約沙法造他施的船隊欲去俄斐運金來；毋拘去無成，因為船佇以旬‧迦別失事。 |
| 22:49 | 亞哈的子亞哈謝對約沙法講：「請互我的部下及你的部下坐船做夥去。」毋拘約沙法毋肯。 |
| 22:50 | 約沙法轉去伊的列祖遐，及伊的列祖安葬佇大闢城；伊的子約蘭續接伊作王。 |
| 22:51 | 以色列王亞哈謝 猶大王約沙法十七年，亞哈的子亞哈謝佇撒馬利亞做以色列王，統治以色列兩年。 |
| 22:52 | 伊做上主看做歹的事，行伊的老父及老母的路，就是行尼八的子耶羅波安的路，互以色列人陷落罪。 |
| 22:53 | 伊及伊的老父仝款服事敬拜巴力，激上主 — 以色列的上帝受氣。 |