| 章節 | 現代台語漢字2021版經文 |
| 19:1 | 以利亞佇何烈山山頂 亞哈將以利亞所做一切的事，及伊用刀刣死巴力所有的先知的代誌，攏給耶洗碧講。 |
| 19:2 | 耶洗碧就派使者去給以利亞講：「明仔載此個時，我若無取你的性命親像你取𪜶逐個人的性命，願神明加倍責罰我。」 |
| 19:3 | 以利亞驚著，就趕緊逃命，來到猶大的別是巴，將僕人留佇遐。 |
| 19:4 | 伊家己佇曠野行一日，來到一欉羅騰樹腳，就坐佇遐求死，講：「夠額啦！上主啊，今求你取我的性命，因為我無比我的列祖較強。」 |
| 19:5 | 伊就倒佇羅騰樹腳，睏去；有天使來搭伊，講：「起來食。」 |
| 19:6 | 以利亞一下看，看著頭殼邊有用熱的石頭烘的餅，閣有一瓶水；伊就食就飲，閣倒落去睏。 |
| 19:7 | 上主的使者第二遍閣來給搭，講：「起來食，因為路猶真遠。」 |
| 19:8 | 伊就起來食，起來飲；靠此遍食的力，行四十暝，四十日，到上帝的山，就是何烈山。 |
| 19:9 | 伊到遐，入去一個洞，佇遐過暝；忽然，上主的話臨到伊，對伊講：「以利亞，你佇遮啲創什麼？」 |
| 19:10 | 伊應講：「我為著上主 — 萬軍的統帥上帝大熱心；因為以色列人棄拺你的約，毀壞你的祭壇，用刀刣你的先知，只有賰我一人；𪜶猶數想我的性命，欲刣我。」 |
| 19:11 | 上主講：「你出來徛𫢶山頂，佇我的面前。」彼時，上主經過，佇伊面前有大閣強的風，山崩石裂，毋拘上主無佇風的內面；風了後有地動，上主嘛無佇地動的中間； |
| 19:12 | 地動了後有火，上主嘛無佇火中；火了後，有細閣輕的聲。 |
| 19:13 | 以利亞聽見，就用外衫掩面，出去徛佇洞口。忽然，有聲臨到伊講：「以利亞，你佇遮啲創什麼？」 |
| 19:14 | 伊講：「我為著上主 — 萬軍的統帥上帝大熱心；因為以色列人棄拺你的約，毀壞你的祭壇，用刀刣你的先知，只有賰我一個；𪜶猶數想我的性命，欲刣我。」 |
| 19:15 | 上主給伊講：「你去，照原路倒去，去大馬士革的曠野；到遐了後，著用油抹哈薛做敘利亞王， |
| 19:16 | 抹寧示的孫耶戶做以色列王，閣抹亞伯‧米何拉人沙法的子以利沙做先知續接你。 |
| 19:17 | 將來，無互哈薛刣死的，會互耶戶刣死；無互耶戶刣死的，會互以利沙刣死。 |
| 19:18 | 總是，我佇以色列中有留七千人，𪜶的腳頭窩毋曾跪拜巴力，毋曾用嘴給唚。」 |
| 19:19 | 以利沙受選召 以利亞就離開遐；後來，尋著沙法的子以利沙。以利沙抵啲犁田；佇伊的頭前有十二對牛，伊家己趕第十二對。以利亞經過遐，將家己的外衫袚佇以利沙的身上。 |
| 19:20 | 以利沙就將許個牛放啲，走去趇以利亞，對伊講：「請互我代先及我的父母相辭，後來就來隨你。」以利亞給伊講：「你通倒去。著會記得我有對你做什麼。」 |
| 19:21 | 以利沙就對遐倒去，刣一對牛，用套牛的器具做柴煮肉，互眾人食。後來，以利沙就起來隨以利亞，服事伊。 |