| 章節 | 現代台語漢字2021版經文 |
| 13:1 | 彼時，有一個上帝重用的人照上主的話對猶大來到伯特利；耶羅波安抵仔徛佇祭壇邊啲燒香。 |
| 13:2 | 上帝重用的人照上主的話，對彼個祭壇大聲喝講：「祭壇啊，祭壇啊，上主按呢講：『看咧，大闢家會有一個子出世，叫做約西亞，伊欲將許個佇山頭壇燒香的祭司刣死佇你頂面；嘛會佇你頂面燒人的骨頭。』」 |
| 13:3 | 像彼日，伊閣互耶羅波安一個兆頭，講：「看咧，此個祭壇欲受拆毀，壇頂的火灰欲撒甲歸土腳；這就是上主所講的兆頭。」 |
| 13:4 | 耶羅波安王聽著上帝重用的人對伯特利的祭壇所講的話，就對壇頂伸手，講：「給伊掠起來！」伊伸出來的手煞硬去，𣍐當勼倒轉； |
| 13:5 | 壇就破裂，壇頂的火灰嘛撒甲歸土腳，抵照上帝重用的人奉上主的話所講的兆頭實現。 |
| 13:6 | 王對上帝重用的人講：「請你為我祈求上主 — 你的上帝施恩，互我的手復原。」上帝重用的人祈求上主施恩，王的手就復原。 |
| 13:7 | 王給上帝重用的人講：「請你及我來去阮兜，食寡物件，回復元氣；我嘛欲送禮物互你。」 |
| 13:8 | 上帝重用的人對王講：「你就是將你王宮的一半互我，我嘛𣍐及你去，嘛𣍐佇遮食飯飲水。 |
| 13:9 | 因為上主有給我吩咐講：『你毋通食飯，毋通飲水，嘛毋通對原路倒去。』」 |
| 13:10 | 上帝重用的人就行別條路，無對來伯特利彼條倒去。 |
| 13:11 | 伯特利的老先知 伯特利有一個老先知，伊的子來，將彼日上帝重用的人佇伯特利所做的代誌，及對王講的話，攏給𪜶老父講。 |
| 13:12 | 老父對𪜶講：「伊對叨一條路倒去？」伊的子就報𪜶老父知對猶大來上帝重用的人倒去的路。 |
| 13:13 | 伊就吩咐伊的子講：「恁給我準備驢。」𪜶準備好勢，伊就騎驢 |
| 13:14 | 去趇上帝重用的人，看著伊坐佇橡樹腳，就問伊講：「你是對猶大來彼個上帝重用的人是無？」 伊講：「我就是。」 |
| 13:15 | 老先知給伊講：「請你及我倒去阮兜食飯。」 |
| 13:16 | 上帝重用的人就講：「我𣍐當及你去恁兜，嘛𣍐當佇此所在及你食飯飲水。 |
| 13:17 | 因為上主的話吩咐我講：『你佇遐毋通食飯，毋通飲水，嘛毋通對你去彼條路倒來。』」 |
| 13:18 | 老先知就給伊講：「我及你仝款是先知，有天使奉上主的命令給我講：『你導伊及你倒去恁兜，互伊食飯飲水。』」老先知是啲騙伊。 |
| 13:19 | 伊就及伊倒去，佇𪜶兜食飯飲水。 |
| 13:20 | 𪜶兩個人做夥食的時，上主的話臨到彼個導伊倒來的老先知。 |
| 13:21 | 伊就給彼個對猶大來上帝重用的人講：「上主按呢講：『因為你有違背上主的話，無遵守上主 — 你的上帝對你的命令， |
| 13:22 | 倒來伊禁止你毋通食飯飲水的所在飲食，所以你的身屍𣍐當埋佇你列祖的墓。』」 |
| 13:23 | 食飯飲水了後，老先知給伊帶倒來的先知準備驢。 |
| 13:24 | 彼個先知騎驢離開了後，佇路裡抵著一隻獅，獅就給伊咬死；伊的身屍倒佇路裡，驢及獅攏徛佇身屍的邊仔。 |
| 13:25 | 有人對遐經過，看著身屍倒佇路裡，獅徛佇身屍的邊仔，就來老先知所住的城，講起此個代誌。 |
| 13:26 | 彼個導上帝重用的人對路裡倒來的老先知聽著就講：「此個上帝重用的人違背上主的命令，所以上主叫獅來咬伊；獅給伊拆裂，給伊咬死，抵照上主對伊講的話。」 |
| 13:27 | 老先知就吩咐伊的子講：「恁給我準備驢。」𪜶就去準備。 |
| 13:28 | 伊騎驢仔出去，看著上帝重用的人的身屍倒佇路裡，驢及獅徛佇身屍的邊仔，獅無食身屍，嘛無給驢拆裂。 |
| 13:29 | 老先知就將上帝重用的人的身屍下佇驢的頂面，載倒來家己的城，欲為著伊啼哭，給伊埋葬。 |
| 13:30 | 老先知將上帝重用的人的身屍葬佇伊家己的墓，伊及伊的子就為著上帝重用的人啼哭，講：「唉啊，我的兄弟啊！」 |
| 13:31 | 埋葬了後，伊就給伊的子講：「我死了後，著給我埋佇安葬上帝重用的人的墓內，互我的骨頭倚伊骨頭的邊仔。 |
| 13:32 | 因為伊奉上主的命令，對伯特利的祭壇及撒馬利亞全城所有的山頭壇宣布的話，一定實現。」 |
| 13:33 | 耶羅波安繼續犯罪 此個代誌了後，耶羅波安猶原無欲離開伊的歹路，繼續設立一般人做山頭壇的祭司；有意願的，就給𪜶封立做祭司。 |
| 13:34 | 此個代誌互耶羅波安王朝陷落罪，致到𪜶對地上完全消滅。 |