| 章節 | 現代台語漢字2021版經文 |
| 10:1 | 示巴女王來拜訪 ( 代下 9:1-12 ) 示巴的女王聽見所羅門因為上主的名所得著的名聲，就來欲用難題給伊考。 |
| 10:2 | 伊導真多人臣來到耶路撒冷，閣有駱駝載香料、真多黃金及寶石。伊見所羅門的時，就將心內所有的難題給伊問。 |
| 10:3 | 所羅門照伊所問的一一給伊回答，無一項困難甲王𣍐曉應。 |
| 10:4 | 示巴女王見識著所羅門所有的智慧，看著伊起的宮殿、 |
| 10:5 | 桌頂的食物、排列坐啲的人臣、跟隨服事的奴僕，及𪜶的衣服，以及斟酒的奴僕，閣看著伊佇上主的聖殿所獻的燒化祭，就歸個人攏愣去。 |
| 10:6 | 示巴女王就對王講：「我佇阮本國所聽著你的事蹟及你的智慧，攏是真的！ |
| 10:7 | 本來我毋信許個話，到我親目看著才相信。人給我講的猶無事實的一半；你的智慧及你的富足超過我所聽著的。 |
| 10:8 | 你的部屬真有福氣！你的人臣真有福氣！𪜶不時佇你的面前聽你智慧的話。 |
| 10:9 | 上主 — 你的上帝應該受稱讚！伊意愛你，互你坐以色列的王位；因為上主永遠疼以色列，所以選立你作王，互你通秉公行義。」 |
| 10:10 | 示巴女王將大約四千公斤的金、真多香料，及寶石送互王；前到今毋曾有人親像示巴女王送赫多香料互所羅門王。 |
| 10:11 | 希蘭的船對俄斐運金來，閣帶真多檀香柴及寶石來。 |
| 10:12 | 王用諸個檀香柴做上主的殿及王宮的欄杆，嘛為唱歌的人做琴及瑟；前到今毋曾有人看見赫多檀香柴運來。 |
| 10:13 | 所羅門用真多禮物送示巴女王；以外閣照女王所意愛、所要求的攏送互伊。女王及伊的人臣就倒去𪜶本國。 |
| 10:14 | 所羅門的財富 ( 代下 9:13-28 1:14-17 ) 所羅門逐年收著的金共兩萬三千公斤， |
| 10:15 | 以外猶有對生理人及貿易商收的稅金，以及對阿拉伯諸個王及國內諸個省長所收的。 |
| 10:16 | 所羅門王拍大盾牌兩百面，每一面用金七公斤； |
| 10:17 | 閣拍小盾牌三百面，每一面用金兩公斤。王將諸個盾牌下佇黎巴嫩林宮。 |
| 10:18 | 王閣用象牙做一個大寶座，用純金貼啲。 |
| 10:19 | 寶座前有六層崎仔；座位撐的頂面是圓的，雙旁有手按，手按的邊仔各有一座獅徛啲； |
| 10:20 | 閣有十二座獅徛佇六層崎仔逐層的雙旁邊；別個王國攏毋曾按呢做。 |
| 10:21 | 所羅門王所有飲的器具攏是金的；黎巴嫩林宮一切的器具嘛是純金的；佇所羅門的時代，銀無互人看做真有價值。 |
| 10:22 | 王有他施的船隊，及希蘭的船隊做夥航海；諸個他施的船隊運金、銀、象牙、猴、孔雀，每三年倒來一遍。 |
| 10:23 | 所羅門王的財富及智慧贏過天下諸王。 |
| 10:24 | 全世界的人攏想欲來見所羅門的面，聽上帝賜互伊的智慧。 |
| 10:25 | 𪜶逐個帶進貢的禮物，就是金器、銀器、衣服、軍器、香料、馬，及騾；逐年攏有一定的數量。 |
| 10:26 | 所羅門王有建立軍隊，戰車一千四百台，馬兵一萬兩千名；安置𪜶佇許個囤戰車的城，及耶路撒冷王遐。 |
| 10:27 | 王統治的期間，耶路撒冷的銀親像石頭赫多，柏香柴親像山埔的桑材樹赫多。 |
| 10:28 | 所羅門的馬攏對埃及及科威進口，是王的生理人對科威照市價買來的。 |
| 10:29 | 對埃及進口的戰車，逐台大約七公斤的銀；戰馬逐隻大約兩公斤的銀。所羅門的生理人嘛經手將諸個出口賣互赫人及敘利亞人許個王。 |