| 章節 | 現代台語漢字2021版經文 |
| 9:1 | 上主閣對所羅門顯現 ( 代下 7:11-22 ) 所羅門完成上主的聖殿、王宮，及伊所愛起的建築了後， |
| 9:2 | 上主第二遍對所羅門顯現，親像以前佇基遍對伊顯現仝款。 |
| 9:3 | 上主對伊講：「你佇我的面前祈禱懇求的，我攏有聽著。我已經將你所起此間殿分別作聖，做永遠敬拜我的所在。我的目睭、我的心嘛欲不時佇遐。 |
| 9:4 | 你若親像你的老父大闢，佇我的面前心純全，所行所做正直，遵趁我的誡命，執守我的規例及命令， |
| 9:5 | 我就欲堅固你佇以色列國的王位到永遠；親像我有應允你的老父大闢講：『你的後代會坐以色列的王位永無斷。』 |
| 9:6 | 恁及恁的子孫若越走離開我，無執守我頒布互恁的誡命及規例，去服事敬拜別個神明， |
| 9:7 | 我就欲將以色列人對我賞賜𪜶的地給𪜶消滅，嘛欲棄拺此間分別作聖用來敬拜我的殿，互以色列人佇萬國中做笑談，受人恥笑。 |
| 9:8 | 此間聖殿現在雖然堂皇，到彼時，經過的人會著驚恥笑，講：『上主哪會按呢對待此個地及此間殿？』 |
| 9:9 | 有人會應講：『是因為𪜶棄拺導𪜶的列祖出埃及地的上主 — 𪜶的上帝，去信奉別個神明，敬拜服事𪜶，所以上主互諸個一切的災禍臨到𪜶。』」 |
| 9:10 | 所羅門及希蘭的協約 ( 代下 8:1-2 ) 所羅門用二十年起上主的聖殿及王宮，此兩間完工的時， |
| 9:11 | 所羅門王將加利利地二十個城互泰爾王希蘭；因為希蘭有照所羅門的請求，用柏香柴、松樹柴，及金互伊。 |
| 9:12 | 希蘭對泰爾出來，去看所羅門互伊的城，看了無合意， |
| 9:13 | 就講：「我的兄弟，你互我此款的城噢？」伊就叫許個城做迦步勒地，到今仔日。 |
| 9:14 | 希蘭曾送金大約四千公斤互所羅門王。 |
| 9:15 | 所羅門其他的事蹟 ( 代下 8:3-18 ) 所羅門王派強制勞工起造上主的聖殿、家己的王宮、米羅、耶路撒冷的城牆，及夏瑣、米吉多，以及基色諸個城。 |
| 9:16 | (早前埃及王法老上來攻取基色，放火燒城，刣死城內的迦南人，將城互伊的查某子，所羅門的某，做嫁妝。) |
| 9:17 | 所羅門重建基色，下‧伯‧和崙； |
| 9:18 | 巴拉，及猶大曠野的達莫。 |
| 9:19 | 所羅門嘛起造真多城，囤積軍用品、戰車及戰馬；閣佇耶路撒冷、黎巴嫩，及伊治理的全地，起造伊所愛起的建築。 |
| 9:20 | 所有住佇境內的亞摩利人、赫人、比利洗人、希未人、耶布斯人賰落來的後代，毋是屬佇以色列， |
| 9:21 | 無互以色列人消滅的，所羅門強制𪜶做苦工，到今仔日。 |
| 9:22 | 毋拘所羅門無互以色列人做奴隸；互𪜶做伊的戰士、人臣、首領、軍長、戰車長、馬兵長。 |
| 9:23 | 所羅門的督工有五百五十人，管理作工的人。 |
| 9:24 | 法老的查某子對大闢城搬入去所羅門為著伊起的宮殿。所羅門閣起米羅。 |
| 9:25 | 所羅門逐年三遍佇伊為上主起的祭壇獻燒化祭及平安祭；閣佇上主的面前燒香。按呢，伊完成起造聖殿的工程。 |
| 9:26 | 所羅門王佇以東地區的紅海海邊，倚近以祿的以旬‧迦別造船。 |
| 9:27 | 希蘭派伊的部下，就是經驗豐富的船員，及所羅門的部下做夥行船。 |
| 9:28 | 𪜶去俄斐，對遐運送金一萬四千公斤到所羅門王遐。 |