| 章節 | 現代台語漢字2021版經文 |
| 23:1 | 大闢的遺言 下面是大闢的遺言。 耶西的子大闢， 就是得著高升， 雅各的上帝所選立， 以色列人人意愛的詩人講： |
| 23:2 | 上主的神通過我傳達，
伊的話佇我的嘴。 |
| 23:3 | 以色列的上帝有講，
以色列的石磐對我講： 用公義治理， 用敬畏上帝來治理的人， |
| 23:4 | 會親像無雲的清早抵仔出的日光，
落雨了後大地青草反射的光彩。 |
| 23:5 | 我的家佇上帝面前豈毋是按呢？
伊有及我立永遠的約， 逐項安排齊全閣穩固。 我所有的拯救及所有的願望， 伊攏給我成全。 |
| 23:6 | 毋拘匪類攏會親像互人㧒确的刺仔，
人毋敢用手提； |
| 23:7 | 欲磕𪜶的人，
著用鐵器及槍柄； 佇遐刺仔一定互火燒滅。 |
| 23:8 | 大闢的勇士 ( 代上 11:10-41 ) 大闢的勇士的名單記佇下面： 哈革摩尼人約設‧巴設，嘛叫做伊斯尼人亞底挪，是三個勇士的首領，曾一遍拍死八百個人。 |
| 23:9 | 第二個是亞何亞人朵多的子以利亞撒，伊是隨大闢三個勇士的一個。有一遍，非利士人聚集來攻擊以色列人，以色列人撤退，毋拘此三個勇士對非利士人嗆聲。 |
| 23:10 | 以利亞撒起來拍非利士人，拍到手痠，手黏佇刀柄。彼日，上主互𪜶大勝利；軍兵倒轉來以利亞撒的後面，干焦啲搶戰利品。 |
| 23:11 | 第三個是哈拉人亞基的子沙瑪。有一日，非利士人佇一坵紅豆園集合排陣；以色列軍兵逃走。 |
| 23:12 | 沙瑪徛佇園中防守彼坵園，拍非利士人；上主互伊大勝利。 |
| 23:13 | 收割的時，三十個首領中有三個落去亞杜蘭洞見大闢。非利士的軍隊佇利乏音山谷紮營。 |
| 23:14 | 彼時，大闢佇要塞；非利士的軍隊駐在佇伯利恆。 |
| 23:15 | 大闢用真渴慕的口氣講：「若有人會當去提伯利恆城門邊的井水互我飲，毋知偌仔呢好！」 |
| 23:16 | 此三個勇士就衝過非利士人的營地，對伯利恆城門邊的井汲水，捾來互大闢。毋拘大闢毋飲，倒出來獻互上主， |
| 23:17 | 講：「上主啊，我哪通飲此個水？這豈毋是諸個用性命去換來的人的血？」所以大闢毋飲。這是此三個勇士做的代誌。 |
| 23:18 | 洗璐雅的子，約押的小弟亞比篩是另外三個勇士的首領；伊曾攑槍刣死三百個人，就佇三個勇士中有名。 |
| 23:19 | 伊是三個勇士中第一出名的，所以做𪜶的領袖；毋拘伊猶不及前彼三個勇士。 |
| 23:20 | 閣有甲薛人耶何耶大的子比拿雅；伊是勇士，有做真多大事：伊曾刣死摩押兩個強猛的勇士；閣佇落雪的時，落去坑內刣死一隻獅； |
| 23:21 | 閣刣死一個高大的埃及人。彼個埃及人手攑槍，比拿雅只有攑棍落去伊遐，搶伊的槍，用彼支槍給伊刣死。 |
| 23:22 | 這是耶何耶大的子比拿雅所做的事，就佇三個勇士中有名。 |
| 23:23 | 伊比三十個勇士較有名望，毋拘不及前彼三個勇士。大闢有設立伊做侍衛長。 |
| 23:24 | 三十個勇士中有：
約押的小弟亞撒黑 伯利恆人朵多的子伊勒哈難 |
| 23:25 | 哈律人沙瑪及以利加
|
| 23:26 | 帕勒提人希利斯
提哥亞人益吉的子以拉 |
| 23:27 | 亞拿突人亞比以謝
戶沙人米本乃 |
| 23:28 | 亞何亞人撒們
尼陀法人瑪哈萊 |
| 23:29 | 尼陀法人巴拿的子希立
便雅憫支族基比亞人利拜的子以太 |
| 23:30 | 比拉頓人比拿雅
迦實溪人希太 |
| 23:31 | 亞拉巴人亞比‧亞本
巴魯米人亞斯瑪威 |
| 23:32 | 沙本人以利雅哈巴
雅善的一個子約拿單 |
| 23:33 | 哈拉人沙瑪及沙拉的子亞希暗
|
| 23:34 | 瑪迦人亞哈拜的子以利法列
基羅人亞希多弗的子以連 |
| 23:35 | 迦密人希斯羅
亞巴人帕萊 |
| 23:36 | 瑣巴人拿單的子以甲
迦得人巴尼 |
| 23:37 | 亞捫人洗勒
給洗璐雅的子約押攑軍器的比錄人拿哈萊 |
| 23:38 | 以帖人以拉及迦立
|
| 23:39 | 赫人烏利亞 共三十七人。 |