| 章節 | 現代台語漢字2021版經文 |
| 20:1 | 示巴背叛 彼時有一個匪類，叫做示巴，是便雅憫人比基利的子。伊歕哨角講： 「大闢的王國咱無份， 耶西的子及咱無關係。 以色列人啊，恁攏倒去恁兜。」 |
| 20:2 | 對按呢，所有的以色列人攏離開大闢去隨比基利的子示巴；毋拘猶大人，對約旦河到耶路撒冷，歸綴路攏給王隨牢牢。 |
| 20:3 | 大闢到耶路撒冷，入王宮。伊將前所留啲顧王宮的十個嬪妃，給𪜶關禁佇別間厝，供給𪜶食、穿、用，無及𪜶親近；𪜶受關禁，親像寡婦，直到𪜶死。 |
| 20:4 | 王對亞瑪撒講：「你著佇三日內招集猶大人來我遮，你嘛著來。」 |
| 20:5 | 亞瑪撒就去招集猶大人，毋拘伊延延超過期限。 |
| 20:6 | 大闢給亞比篩講：「今比基利的子示巴對咱的傷害，會比押沙龍較嚴重。你著帶你主人的軍隊給伊追趇，才免伊佔著堅固的城，成做咱的困擾。」 |
| 20:7 | 約押的部下，及基利提人、比利提人，以及眾勇士，攏隨亞比篩對耶路撒冷出去，追趇比基利的子示巴。 |
| 20:8 | 𪜶到基遍的大石磐遐，亞瑪撒來到𪜶的面前。彼時約押穿戰甲，縖帶刀劍的腰帶，刀插佇鞘內。伊行進前的時，刀對鞘裡落出來。 |
| 20:9 | 約押給亞瑪撒講：「兄弟，平安。」約押就用正手搙亞瑪撒的嘴鬚，欲給伊唚。 |
| 20:10 | 亞瑪撒無注意約押倒手攑劍；約押用彼支劍鑿入亞瑪撒的腹肚，伊的腸仔流出來佇土腳；一刀就死。 約押及伊的小弟亞比篩去追趇比基利的子示巴。 |
| 20:11 | 有一個約押的部下徛佇亞瑪撒的屍體邊仔，講：「擁護約押，歸順大闢的人攏著隨約押去。」 |
| 20:12 | 亞瑪撒的屍體滒甲全血倒佇路中，約押彼個部下看著眾人攏停腳啲看，就將屍體對路中徙去園裡，用衫給伊蓋啲。 |
| 20:13 | 身屍對路中徙走以後，所有的人就攏隨約押，去追趇比基利的子示巴。 |
| 20:14 | 示巴行透以色列所有的支族，到伯‧瑪迦的亞伯；比基利仝宗族的人嘛聚集來隨伊。 |
| 20:15 | 約押及伊的軍兵到伯‧瑪迦的亞伯，圍困此個城；面對城的外牆起土堆，閣挵城欲互伊倒。 |
| 20:16 | 有一個聰明的婦仁人對城頂叫講：「聽咧，聽咧。恁去給約押講，請伊來遮，我有話欲及伊講。」 |
| 20:17 | 約押就行倚去。婦仁人講：「你是約押是無？」 伊應講：「我就是。」 婦仁人講：「請聽女婢的話。」 伊應講：「我啲聽。」 |
| 20:18 | 婦仁人講：「古早人有按呢講：『有代誌著去亞伯遐問，才會解決。』 |
| 20:19 | 阮佇以色列中是上和平上忠誠的一座城。你是想欲毀滅以色列中此個即呢要緊的城，愛欲吞滅上主的產業是無？」 |
| 20:20 | 約押應講：「我絕對毋是欲吞，抑是欲滅此個城。 |
| 20:21 | 代誌毋是按呢，是因為以法蓮山區有一個人，比基利的子示巴起手攻擊大闢王。恁將此個人交出來，我就離開此個城。」 婦仁人給約押講：「好！伊的頭殼我會㧒過城牆互你。」 |
| 20:22 | 婦仁人就用伊的智慧說服眾人。𪜶斬比基利的子示巴的頭殼，㧒互約押。約押歕哨角，軍兵就離開城解散，逐個人倒去𪜶兜。約押倒去耶路撒冷，去王遐。 |
| 20:23 | 大闢的大臣 約押做以色列的元帥；耶何耶大的子比拿雅管轄基利提人及比利提人。 |
| 20:24 | 亞多蘭管理勞役；亞希律的子約沙法做史官； |
| 20:25 | 示法做書記。撒督及亞比亞他做祭司； |
| 20:26 | 睚珥人以拉嘛做大闢的祭司。 |