| 章節 | 現代台語漢字2021版經文 |
| 18:1 | 押沙龍的死 大闢召集隨伊的軍兵，用一千人及一百人做單位，照編制設立指揮官。 |
| 18:2 | 大闢派軍兵出去，將三分一交互洗璐雅的子約押，三分一交互約押的兄弟亞比篩，三分一交互迦特人以太。王對軍兵講：「我一定欲及恁做夥出戰。」 |
| 18:3 | 毋拘軍兵講：「你毋通出去；阮若刣輸逃走，對敵𣍐注意阮；阮若一半陣亡，對敵嘛𣍐看做要緊；你一人比阮一萬人較重要。你留佇城內幫贊阮較好。」 |
| 18:4 | 王給𪜶講：「恁看做好的，我照按呢做。」王就徛佇城門邊，軍兵一百一百，一千一千，照次序出去。 |
| 18:5 | 王命令約押、亞比篩、以太，講：「恁著帶念我，毋通傷害彼個少年人押沙龍。」王為押沙龍命令許個首領的話，軍兵攏有聽著。 |
| 18:6 | 軍兵就出去野外，佇以法蓮的樹林及以色列人交戰。 |
| 18:7 | 佇遐，以色列的軍隊刣輸大闢的部下；彼日戰死的真多，有兩萬人。 |
| 18:8 | 交戰湠到全地區；彼日佇樹林內死的，比互刀刣死的較多。 |
| 18:9 | 押沙龍騎騾，抵著大闢的部下。騾走對大欉橡樹真艷的樹椏下面經過，伊的頭毛鉤著橡樹枝，人吊佇半空中；所騎的騾做伊去。 |
| 18:10 | 有一個兵士看著，給約押講：「我看著押沙龍吊佇橡樹。」 |
| 18:11 | 約押給報伊的人講：「啥？你有看著噢！哪無當場給拍死？你若按呢做，我就賞你十塊銀，及一條腰帶。」 |
| 18:12 | 彼個人對約押講：「你就是互我一千塊銀，我嘛毋敢動手害王的子；因為阮有聽著王命令你及亞比篩、以太，講：『恁著細膩，毋通害彼個少年人押沙龍。』 |
| 18:13 | 我若敢按呢做害伊的性命，王一定會知，到時你嘛會毋插我。」 |
| 18:14 | 約押講：「我無時間閣及你講。」約押就攑三支短槍去；彼時押沙龍吊佇橡樹猶活啲。約押鑿迵押沙龍的心。 |
| 18:15 | 為約押攑武器的十個少年人給押沙龍圍啲，給伊刣死。 |
| 18:16 | 約押歕哨角，軍兵就倒來，無閣趇以色列人；因為約押給𪜶阻止。 |
| 18:17 | 𪜶將押沙龍㧒佇樹林內一個大深坑，頂面疊一大堆石頭；所有的以色列人攏走倒去家己的厝。 |
| 18:18 | 押沙龍活啲的時，佇王的山谷為家己𫞼一支柱；伊講伊無子通留名，就給彼支柱號做押沙龍。到今仔日，人猶稱呼彼支柱做押沙龍紀念碑。 |
| 18:19 | 大闢為押沙龍哀傷 撒督的子亞希瑪斯講：「准我走去對王報告，上主已經有解救伊脫離對敵的手。」 |
| 18:20 | 約押給伊講：「你今仔日毋通去報消息，另日才去。今仔日你毋通報消息，因為王的子死去。」 |
| 18:21 | 約押給一個古實奴隸講：「你去將你所看著的給王報告。」古實人對約押鞠躬就用走的去。 |
| 18:22 | 撒督的子亞希瑪斯閣給約押講：「無論按怎，求你准我隨古實人用走的去。」 約押講：「我的子，你報消息𣍐得著賞，是按怎欲去？」 |
| 18:23 | 伊應講：「無論按怎，我欲去。」 約押講：「你去！」 亞希瑪斯就對約旦平原的路走去，趇過古實人。 |
| 18:24 | 大闢抵仔坐佇內城門及外城門的中間；守望的人𬦰上城牆，到城門的樓頂觀看，看著一個人單身走來。 |
| 18:25 | 守望的大聲喝，對王報告。王講：「伊若家己一個來，一定是欲報好消息。」彼個人那走那近倚。 |
| 18:26 | 守望的人閣看著另外一個人走來，守望的給顧城門的人講：「你看，閣有一個人單身走來。」 王講：「這嘛是報好消息的。」 |
| 18:27 | 守望的講：「我看頭前啲走的親像撒督的子亞希瑪斯。」 王講：「伊是好人，來報好消息。」 |
| 18:28 | 亞希瑪斯對王叫講：「平安！」就佇王的面前仆拜，講：「上主 — 你的上帝應該受稱讚！伊已經將許個起手攻擊我的主我的王的人拍敗啦。」 |
| 18:29 | 王講：「少年人押沙龍平安抑無？」 亞希瑪斯應講：「約押派王的僕人，就是你的僕人來的時，我有看著混亂的場面，毋知發生什麼代誌。」 |
| 18:30 | 王講：「你徛𫢶邊仔。」伊就閃開，徛啲。 |
| 18:31 | 古實人嘛到；報告講：「有好消息報告我的主我的王。上主今仔日有替你申冤，拍敗起來攻擊你的人。」 |
| 18:32 | 王問古實人講：「少年人押沙龍有平安無？」 古實人應講：「願我的主我的王的對敵，及所有起來攻擊你，欲害你的人，攏及彼個少年人仝款。」 |
| 18:33 | 王就真傷心。伊上城門頂的房間啼哭，那行那講：「我的子押沙龍啊！我的子，我的子，押沙龍啊！我苦𣍐得替你死。押沙龍啊，我的子，我的子！」 |