| 章節 | 現代台語漢字2021版經文 |
| 4:1 | 伊施波設受暗殺 掃羅的子伊施‧波設聽著押尼珥死佇希伯崙，就驚惶失膽。以色列眾人嘛驚甲毋知欲按怎。 |
| 4:2 | 伊施‧波設有兩個官長，巴拿及利甲，是便雅憫支族比錄人臨門的子。 |
| 4:3 | 比錄人早前走到基他音，徛起佇遐，到今仔日。 |
| 4:4 | 掃羅的子約拿單有一個子兩腳攏跛，叫做米非波設。掃羅及約拿單死的消息對耶斯列傳來的時，伊抵仔五歲；伊的奶母給伊抱啲走；因為走真緊，囝仔跋落去，腳才跛。 |
| 4:5 | 比錄人臨門的子利甲及巴拿出去，差不多日中晝的時來伊施‧波設的厝。伊抵仔啲睏中晝。 |
| 4:6 | 𪜶入去厝內假影欲扒麥仔，就對伊施‧波設的腹肚揬落去；利甲及伊的兄弟巴拿就逃走。 |
| 4:7 | 𪜶入房內的時，伊施‧波設抵仔佇房間倒佇眠床啲睏；𪜶就給伊刣死，割伊的頭殼，給頭捾啲，向亞拉巴的方向透暝逃走。 |
| 4:8 | 𪜶帶伊施‧波設的頭殼去希伯崙 大闢遐，對王講：「請看！這是掃羅的子伊施‧波設的頭；你的對敵掃羅曾數想你的性命。上主今仔日已經有為著我的主我的王對掃羅及伊的後代報仇。」 |
| 4:9 | 大闢應比錄人臨門的子利甲及伊的兄弟巴拿，講：「上主救贖我的性命脫離所有的苦難，我指永活的上主咒誓； |
| 4:10 | 以前有人來洗革拉報我講：『掃羅已經死。』伊家己掠做是報好消息，毋拘我無給伊獎勵，顛倒給伊掠起來，刣死。 |
| 4:11 | 何況恁諸個歹人！恁趁無辜的人啲睏的時，入去厝內給伊刣死，我豈無欲對恁的手討恁流伊的血的罪，對地上給恁除滅？」 |
| 4:12 | 大闢命令部下給𪜶刣死，斬斷𪜶的腳手，給𪜶的屍體吊佇希伯崙的水池邊，然後將伊施‧波設的頭殼埋葬佇希伯崙 押尼珥的墓。 |