| 章節 | 現代台語漢字2021版經文 |
| 3:1 | 掃羅的家及大闢的家交戰真久；大闢愈強盛，掃羅的家愈衰微。 |
| 3:2 | 大闢佇希伯崙生的子 大闢佇希伯崙生六個子：大子暗嫩，是耶斯列人亞希暖生的； |
| 3:3 | 第二個基利押，是迦密人拿霸的遺孀愛比該生的；第三個押沙龍，是基述王達買的查某子瑪迦生的； |
| 3:4 | 第四個亞多尼雅，是哈及生的；第五個示法提雅，是亞比她生的； |
| 3:5 | 第六個以特念，是大闢的某以格拉生的。諸個是大闢佇希伯崙所生的子。 |
| 3:6 | 押尼珥投靠大闢 掃羅的家及大闢的家繼續啲交戰，押尼珥佇掃羅的家掌握實權。 |
| 3:7 | 掃羅有一個妃，名叫利斯巴，是愛亞的查某子。伊施‧波設對押尼珥講：「你哪及我老父的妃做夥睏？」 |
| 3:8 | 押尼珥因為伊施‧波設的話就真受氣，講：「你看我做猶大家的狗仔頭是無？我忠誠對待恁老父掃羅的家，及伊的兄弟、伊的朋友，無將你交佇大闢的手，你今仔日竟然因為此個婦仁人責備我。 |
| 3:9 | 我若無照上主所立誓對大闢的應允來做，廢除掃羅家的王位，建立大闢的王權，互伊治理以色列及猶大，對但到別是巴，願上帝加倍責罰我押尼珥。」 |
| 3:10 | 併於上節 |
| 3:11 | 伊施‧波設因為驚押尼珥，連一句話都毋敢應。 |
| 3:12 | 押尼珥差使者代表伊去見大闢，講：「此個國什麼人啲統治？」閣講：「你及我立約，我欲幫贊你，互全以色列攏歸順你。」 |
| 3:13 | 大闢講：「好，我及你立約。毋拘我有一個要求，你來見我的時，著將掃羅的查某子米甲導來；若無，一定𣍐當見我的面。」 |
| 3:14 | 大闢就差使者去見掃羅的子伊施‧波設，講：「著將我的某米甲還我，伊是我用一百個非利士人的包皮做聘金娶來的。」 |
| 3:15 | 伊施‧波設就派人對米甲的丈夫，拉億的子帕鐵遐導米甲來。 |
| 3:16 | 伊的丈夫隨佇伊的後面，那行那哮，到巴戶琳。押尼珥對帕鐵講：「倒去啦。」伊就倒去。 |
| 3:17 | 押尼珥及以色列的長老參詳，講：「恁早就愛大闢作王給恁治理， |
| 3:18 | 今著採取行動。因為上主有應允講：『我欲用我的僕人大闢的手，救我的子民以色列脫離非利士人及所有對敵的手。』」 |
| 3:19 | 押尼珥嘛將諸個話講互便雅憫人聽。後來伊去希伯崙，將以色列人及便雅憫全家共同的決定，講互大闢聽。 |
| 3:20 | 押尼珥導二十個人來希伯崙見大闢。大闢設宴席歡迎𪜶。 |
| 3:21 | 押尼珥給大闢講：「我欲去招集全以色列來見我的主我的王，互𪜶及你立約，你就會當作王，照你的心願治理全國。」大闢就送押尼珥，互伊平安離開。 |
| 3:22 | 約押刣死押尼珥 彼時，大闢的兵隨約押出戰倒來，帶真多戰利品。押尼珥已經無佇希伯崙 大闢遐，因為大闢有送伊平安離開。 |
| 3:23 | 約押及隨伊的全軍已經到，有人給約押講：「尼珥的子押尼珥有來見王，王嘛送伊平安離開。」 |
| 3:24 | 約押去見王講：「你哪按呢做？押尼珥來見你，你哪放伊去，互伊離開？ |
| 3:25 | 你知尼珥的子押尼珥來是欲騙你，愛知你的動靜，及你一切所做的代誌。」 |
| 3:26 | 約押對大闢遐出來，就派人去趇押尼珥。𪜶就對西拉的井給伊帶來；毋拘大闢毋知。 |
| 3:27 | 押尼珥轉來到希伯崙的時，約押導伊到城門內的城牆邊，假欲私下及伊講話，就對伊的腹肚揬落去，伊就死。這是因為伊有刣死約押的小弟亞撒黑。 |
| 3:28 | 後來大闢聽著，就講：「流尼珥的子押尼珥的血此個罪，及我以及我的國無關係，阮佇上主的面前是無辜的。 |
| 3:29 | 願彼個罪約押及𪜶老父全家家己擔；閣願約押的家不斷有人致著下消抑是痲瘋，有人無攑柺仔𣍐當行路，有人互刀刣死，抑是無通食。」 |
| 3:30 | 約押及伊的小弟亞比篩刣死押尼珥，是因為押尼珥佇基遍及𪜶交戰的時，刣死𪜶的兄弟亞撒黑。 |
| 3:31 | 埋葬押尼珥 大闢命令約押及隨伊的人講：「恁著拆裂衫，穿麻衫，為著押尼珥啼哭。」大闢王嘛隨佇棺材後面。 |
| 3:32 | 𪜶給押尼珥埋葬佇希伯崙。王倚押尼珥的墓啼哭，眾人嘛啼哭。 |
| 3:33 | 王為著押尼珥唱哀歌，講：
「押尼珥哪會親像戇人按呢死？ |
| 3:34 | 你的手無受捆縛，你的腳無銬鎖鍊；
你竟然死佇歹人的手頭。」 眾人閣為著押尼珥哀哭。 |
| 3:35 | 日頭猶未落山以前，眾人來勸大闢食飯，毋拘大闢咒誓講：「我若佇日落以前食飯抑是食別項物件，願上帝加倍責罰我。」 |
| 3:36 | 眾人知影此個代誌，攏感覺真好；王所做的，眾人攏看做好。 |
| 3:37 | 彼日，跟隨大闢的人及所有以色列人才知，刣死尼珥的子押尼珥毋是出佇王的意思。 |
| 3:38 | 王對伊的部下講：「恁豈毋知今仔日佇以色列中，死一個偉大的將領？ |
| 3:39 | 我雖然受抹油選立作王，毋拘今仔日猶無夠力；洗璐雅許個子比我較強。願上主照歹人所做的歹報應𪜶。」 |