| 章節 | 現代台語漢字2021版經文 |
| 25:1 | 撒母耳死 撒母耳死，以色列眾人聚集，為著伊啼哭，給伊埋葬佇伊的故鄉拉瑪。 大闢及愛比該 大闢落去巴蘭的曠野。 |
| 25:2 | 佇瑪雲有一個大好額人，伊的產業佇迦密；伊有綿羊三千隻，山羊一千隻。彼陣，伊佇迦密啲剪羊毛。 |
| 25:3 | 彼個人屬迦勒宗族，叫做拿霸，伊的某愛比該是賢慧閣媠的婦仁人。毋拘拿霸作人粗魯閣兇惡。 |
| 25:4 | 大闢佇曠野聽著拿霸啲剪羊毛， |
| 25:5 | 就派十個少年人，叫𪜶去迦密見拿霸，吩咐𪜶用伊的名給拿霸請安， |
| 25:6 | 講：「祝你長歲壽！願恁全家平安！願你事事順利！ |
| 25:7 | 大闢有聽講你佇遮啲剪羊毛；你的顧羊的及阮做夥佇迦密的時，阮毋曾欺負𪜶，𪜶嘛毋曾失落什麼。 |
| 25:8 | 你通問你的工人，𪜶會給你講。大闢請你好款待阮諸個少年人，今仔日抵抵是節日。請隨便提淡薄互阮及你的後輩大闢。」 |
| 25:9 | 大闢的少年人到位，就代表大闢將諸個話給拿霸講。𪜶講了，靜靜聽候。 |
| 25:10 | 拿霸應大闢的部下講：「大闢是啥人？耶西的子是啥人？最近不時有僕人背叛主人。 |
| 25:11 | 我的餅、我的水，及欲互剪羊毛的人食的肉，豈通提互毋知對叨位來的人？」 |
| 25:12 | 大闢的少年人越轉身對原路倒去，將諸個話給大闢報告。 |
| 25:13 | 大闢對跟隨伊的人講：「恁逐個人攏著帶刀。」𪜶就攏帶刀，大闢嘛帶。隨大闢去的約有四百人，兩百個留啲顧守補給品。 |
| 25:14 | 拿霸的工人有一個來給拿霸的某愛比該講：「大闢對曠野差使者來給阮主人請安，主人顛倒大聲給𪜶侮辱。 |
| 25:15 | 毋拘許個人對阮真好，阮佇野外及𪜶往來的時攏無受傷害，嘛毋曾失落什麼。 |
| 25:16 | 阮佇𪜶遐飼羊的時，𪜶暝日攏有給阮保護。 |
| 25:17 | 請你詳細想，看著按怎做，因為災禍一定會臨到阮的主人及伊的全家。阮主人性情兇惡，無人敢及伊講話。」 |
| 25:18 | 愛比該就趕緊將兩百個餅，兩皮袋酒，五隻烘好的羊，十七公斤焙熟的麥仔，一百粒葡萄乾丸，兩百粒無花果乾丸，互驢仔載。 |
| 25:19 | 然後伊給許個工人講：「恁先行，我隨恁的後面去。」毋拘伊無給伊的丈夫拿霸講。 |
| 25:20 | 愛比該就騎驢落山，對山彼旁斡過來的時，抵著大闢及跟隨伊的人抵好對對面啲來。 |
| 25:21 | 大闢抵仔啲講：「此個人佇曠野所有的一切，我給伊顧甲無失落半項，實在無採工；伊竟然用歹報好！ |
| 25:22 | 明仔載天光以前，我若無將𪜶兜所有的查甫人攏刣死，願上帝加倍責罰我。」 |
| 25:23 | 愛比該看著大闢，趕緊對驢仔落來，佇大闢的面前仆佇土腳拜伊。 |
| 25:24 | 愛比該仆佇伊的腳前，講：「我的主啊，攏是我毋著。求你准你的女婢講互你聽。請聽女婢的話。 |
| 25:25 | 我的主，插彼個性情兇惡的人；伊叫做拿霸，名符其實是戇人。毋拘我，你的女婢，無抵著我的主派來的少年人。 |
| 25:26 | 我的主啊，既然上主阻止你無犯刣死人的罪，無互你親手替家己報仇，我指永活的上主及你的性命咒誓：『願我的主的對敵及計謀欲害你的人攏及拿霸仝款。』 |
| 25:27 | 今你的女婢帶來互我的主的禮物，請分互跟隨我的主的少年人。 |
| 25:28 | 求你寬赦你女婢的罪過。上主一定會給我的主建立穩固的王朝，因為我的主為著上主交戰，閣你一生尋𣍐出有什麼過失。 |
| 25:29 | 雖然有人起來追趇你，數想你的性命，毋拘我的主的性命會得著上主 — 你的上帝保護，親像啲保護極貴重的寶物。你對敵的性命會互上主㧒确，親像用挕索挕出去。 |
| 25:30 | 將來上主照伊對我的主的應允成就一切好事，選立你做以色列的領袖的時， |
| 25:31 | 我的主就毋免為著無緣無故刣人，抑是替家己報仇，致到後悔，自責。當上主賜福互我的主的時，求你會記得你的女婢。」 |
| 25:32 | 大闢給愛比該講：「上主 — 以色列的上帝應該受稱讚，因為伊今仔日差你來見我。 |
| 25:33 | 你及你的見識攏真通謳咾，因為你今仔日阻止我無親手報仇，互我無犯著刣死人的罪。 |
| 25:34 | 上主有阻止我無傷害你。佇上主 — 以色列永活的上帝面前，我敢講，佳哉你有隨時趕來見我，若無，到明仔早起，所有屬拿霸的查甫人，一定連一個都𣍐活啲。」 |
| 25:35 | 然後，大闢接受愛比該帶來的禮物，就給伊講：「你通平安倒去恁兜；我知你的意思。我答應你。」 |
| 25:36 | 愛比該轉去拿霸遐，拿霸抵佇厝內啲辦桌，親像王排設宴席。拿霸心情非常爽快，飲甲醉茫茫。所以，彼暝愛比該無將所有發生的代誌給伊講。 |
| 25:37 | 隔早起，拿霸酒退，伊的某才將諸個代誌給伊講；伊聽了隨時失去意識，歸身軀𣍐振動。 |
| 25:38 | 大約十日後，上主拍拿霸，伊就死去。 |
| 25:39 | 大闢聽著拿霸已經死，就講：「上主應該受稱讚，因為我對拿霸受的侮辱，伊有替我申冤，閣阻止我無去做歹；上主照拿霸所做的歹給伊刑罰。」大闢就差人去給愛比該講欲娶伊做某。 |
| 25:40 | 大闢的僕人去迦密見愛比該，給伊講：「大闢差阮來見你，講欲娶你做某。」 |
| 25:41 | 愛比該就起來，仆佇土腳，講：「我願意做差用，給我的主的僕人洗腳。」 |
| 25:42 | 愛比該隨時起來，騎驢，導五個女婢隨大闢的使者做夥去；伊就做大闢的某。 |
| 25:43 | 大闢已經有娶耶斯列人亞希暖；𪜶兩個人攏做伊的某。 |
| 25:44 | 掃羅已經將伊的查某子米甲，就是大闢的某，互迦琳人拉億的子帕鐵做某。 |