| 章節 | 現代台語漢字2021版經文 |
| 16:1 | 大闢受選立做王 上主給撒母耳講：「我已經棄拺掃羅，無愛伊閣作以色列王，你欲為著伊憂傷偌久？你用油給角貯互滿，準備出發，我欲差你去伯利恆人耶西遐；我佇伊的子中間已經揀一個欲作王。」 |
| 16:2 | 撒母耳講：「我哪通去？掃羅若聽著會刣我。」 上主講：「你帶一隻母的牛仔去，講你是欲去獻祭互上主。 |
| 16:3 | 你著請耶西來赴此個祭祀；我欲指示你應該做的事；我給你指示彼個人，你著替我給伊抹油作王。」 |
| 16:4 | 撒母耳照上主的話去做，去到伯利恆；城內的長老攏皮皮惙出來迎接伊，講：「你豈是帶平安來？」 |
| 16:5 | 伊講：「是，是帶平安來。我來是欲獻祭互上主。恁著潔淨家己，及我做夥赴祭祀。」撒母耳就給耶西及伊的子潔淨，然後請𪜶參加祭祀。 |
| 16:6 | 𪜶來的時，撒母耳看著以利押，心內想：「徛佇上主面前此個一定是伊所選立的人。」 |
| 16:7 | 毋拘上主給撒母耳講：「毋通看伊的外表，身材大漢；我揀的毋是此個。上主啲看無親像人啲看；人看外表，上主看內心。」 |
| 16:8 | 後來耶西叫亞比拿達對撒母耳面前行過；撒母耳講：「上主嘛無揀此個。」 |
| 16:9 | 耶西閣叫沙瑪經過；撒母耳講：「上主嘛無揀此個。」 |
| 16:10 | 耶西互伊七個子攏對撒母耳面前行過。撒母耳給耶西講：「上主攏無揀𪜶。」 |
| 16:11 | 撒母耳閣給耶西講：「你的子豈攏佇遮？」 伊應講：「猶有一個煞尾子，伊此陣啲飼羊。」 撒母耳給耶西講：「你差人去叫伊來；伊猶未來，咱無欲坐桌。」 |
| 16:12 | 耶西派人去叫伊來。伊紅膏赤蠘，目睭有神，生做英俊。上主講：「此個就是；你給伊抹油。」 |
| 16:13 | 撒母耳就佇大闢許個兄哥面前用角內的油給伊抹。對彼日起，上主的神完全支配大闢。撒母耳就出發倒去拉瑪。 |
| 16:14 | 大闢佇掃羅的宮內 上主的神離開掃羅，就有歹神對上主遐來互伊起驚惶。 |
| 16:15 | 掃羅的人臣對伊講：「今有歹神對上帝遐來互你驚惶。 |
| 16:16 | 請王命令跟隨你的部下尋一個𠢕彈琴的人來，按呢，對上帝遐來的歹神來的時，叫伊彈琴，你就會好。」 |
| 16:17 | 掃羅給伊的人臣講：「恁給我尋一個𠢕彈琴的，給伊導來我遮。」 |
| 16:18 | 有一個少年人講：「我曾看著伯利恆人耶西一個子𠢕彈琴；伊是勇敢的戰士，口才好，外表英俊，閣有上主及伊同在。」 |
| 16:19 | 掃羅差使者去見耶西，講：「請你去叫你彼個啲顧羊的子大闢來我遮。」 |
| 16:20 | 耶西就叫伊的子大闢用驢仔載真多餅、一皮袋酒，及一隻山羊仔，帶去送掃羅。 |
| 16:21 | 大闢到掃羅遐，給伊侍候。掃羅真疼伊，揀伊做侍衛，替掃羅攑軍器。 |
| 16:22 | 掃羅差人去給耶西講：「我真合意大闢。請你互伊佇我身邊侍候我。」 |
| 16:23 | 逐遍，對上帝遐來的歹神臨到掃羅的時，大闢攏會彈琴，掃羅心情就輕鬆，回復元氣；歹神就離開伊。 |