| 章節 | 現代台語漢字2021版經文 |
| 26:1 | 以撒住佇基拉耳 以撒住的所在，佇亞伯拉罕在生的時曾發生飢荒，現在閣有飢荒。以撒就去基拉耳，到非利士人的王亞比米勒遐。 |
| 26:2 | 上主對以撒顯現，講：「你毋通落去埃及，著住佇我指示你的地。 |
| 26:3 | 你著寄居佇遮，我欲及你同在，賜福你；因為我欲將此個地攏互你及你的後代；我嘛欲堅立我立誓對你的老父亞伯拉罕所立的約。 |
| 26:4 | 我欲互你的後代人數加添，親像天頂的星赫多；閣欲將諸個地攏賜互你的後代；欲互地上萬族因為你的後代得著福氣， |
| 26:5 | 這是因為亞伯拉罕有聽趁我的話，遵守我的吩咐、命令、規例，及教示。」 |
| 26:6 | 以撒住佇基拉耳。 |
| 26:7 | 彼所在的人講著伊的某，伊就講「是我的小妹」，毋敢講「是我的某」。伊心內想講：「因為麗百加生做真媠，驚了彼所在的人為著伊的緣故給我刣。」 |
| 26:8 | 伊佇遐住真久。有一日，非利士王亞比米勒對窗仔看出去，看著以撒及伊的某麗百加啲相親熱。 |
| 26:9 | 亞比米勒叫以撒來，給伊講：「伊明明是你的某，你哪會講『伊是我的小妹』？」 以撒講：「我想講我會因為伊互人刣死。」 |
| 26:10 | 亞比米勒講：「你哪會對阮做此款代誌？人民的中間險險有人及你的某做夥睏；你就害阮犯罪。」 |
| 26:11 | 亞比米勒就命令人民，講：「若有人磕著此個人及伊的某，一定欲互伊死。」 |
| 26:12 | 以撒佇彼所在種作，彼年得著百倍的收成，因為上主賜福伊。 |
| 26:13 | 伊的家業不斷增加，非常好額。 |
| 26:14 | 伊的牛羊真多，閣有真多僕人；非利士人就怨妒伊。 |
| 26:15 | 伊的老父亞伯拉罕活啲的時，僕人開的井，非利士人攏給𪜶塞啲，用土填起來。 |
| 26:16 | 亞比米勒對以撒講：「你著離開阮，因為你比阮加足強盛。」 |
| 26:17 | 以撒就離開遐，去基拉耳的山谷搭布棚徛起。 |
| 26:18 | 伊的老父亞伯拉罕在生的時開的井，攏互非利士人填去。以撒重再開許個井，照𪜶老父所號的名給許個井號名。 |
| 26:19 | 以撒的僕人佇山谷挖井，挖著一口活水的井。 |
| 26:20 | 基拉耳的牧者及以撒的牧者相爭，講：「此口井是阮的。」以撒就給彼口井號名叫做埃色；因為𪜶及伊相爭。 |
| 26:21 | 以撒的僕人閣挖一口井，𪜶閣為著此口井相爭；以撒就給伊號名叫做西提拿。 |
| 26:22 | 以撒離開遐，閣去開一口井；𪜶無閣為著此口井相爭。以撒就給伊號名叫做利河伯；伊講：「今上主互阮開闊的地通發展；阮欲佇此個地興旺。」 |
| 26:23 | 以撒對遐上去別是巴。 |
| 26:24 | 彼暝，上主對伊顯現，講：「我是你的老父亞伯拉罕的上帝。毋免驚，因為我及你同在；我欲為著我的僕人亞伯拉罕的緣故賜福你，互你的後代興旺。」 |
| 26:25 | 以撒就佇遐起一座祭壇，敬拜上主，搭布棚徛起。伊的僕人佇遐挖一口井。 |
| 26:26 | 以撒及亞比米勒立約 亞比米勒導伊的顧問亞戶撒及元帥非各，對基拉耳來見以撒。 |
| 26:27 | 以撒對𪜶講：「恁既然怨恨我，給我趕走，是按怎閣來尋我？」 |
| 26:28 | 𪜶講：「阮清楚知上主及你同在，所以阮想，咱雙方來咒誓，立約。 |
| 26:29 | 你毋通傷害阮，親像阮毋曾磕著你；以前阮好款待你，閣送你安全離開。今上主有賜福你。」 |
| 26:30 | 以撒辦桌請𪜶，𪜶就做夥飲食。 |
| 26:31 | 隔日透早，𪜶互相咒誓。以撒送𪜶起身，𪜶就平安離開。 |
| 26:32 | 像彼日，以撒的僕人來，將𪜶開井的事給伊報告，講：「阮挖著水啦。」 |
| 26:33 | 以撒就給彼口井叫做示巴；所以到今仔日，彼個城叫做別是巴。 |
| 26:34 | 以掃娶某 以掃四十歲的時娶赫人備利的查某子猶滴，及赫人以倫的查某子芭實抹做某。 |
| 26:35 | 此兩個婦仁人常常互以撒及麗百加心內憂悶操煩。 |