| 章節 | 現代台語漢字2021版經文 |
| 1:1 | 以利加拿及伊的家眷 有一個人叫做以利加拿；伊住佇以法蓮山區，蘇弗宗族啲住的拉瑪；伊是以法蓮人，蘇弗的元孫，託戶的曾孫，以利戶的孫，耶羅罕的子。 |
| 1:2 | 以利加拿有兩個某，一個叫做哈娜，一個叫做比尼娜；比尼娜有子兒，哈娜無子。 |
| 1:3 | 以利加拿逐年對伊的本城上去示羅敬拜上主 — 萬軍的統帥，閣對伊獻祭。以利兩個子何弗尼及非尼哈佇遐做上主的祭司。 |
| 1:4 | 以利加拿逐遍獻祭，攏分獻祭的肉互伊的某比尼娜及伊的子查某子各一份。 |
| 1:5 | 毋拘以利加拿互哈娜較好份，因為伊疼哈娜，可惜上主互伊無生子。 |
| 1:6 | 因為上主互伊無生子，及伊做對頭的比尼娜不時激伊，互伊凝心。 |
| 1:7 | 此款代誌逐年啲發生。逐遍哈娜上去上主的厝的時，比尼娜照常按呢激伊；伊就啼哭，食𣍐落飯。 |
| 1:8 | 伊的丈夫以利加拿給伊講：「哈娜，你是按怎啲哮？是按怎毋食？是按怎啲傷心？有我豈無比有十個子較好？」 |
| 1:9 | 哈娜及以利 𪜶佇示羅飲食了後，哈娜就徛起來；彼時祭司以利坐佇上主的殿門柱邊的坐位。 |
| 1:10 | 哈娜的心艱苦，對上主祈禱，直直流目屎。 |
| 1:11 | 哈娜下願講：「上主 — 萬軍的統帥，你若真正關心你女婢的苦情，眷顧我，無𣍐記得你的女婢，賜你的女婢生一個後生，我欲給伊一世人獻互上主，攏𣍐給伊剃頭。」 |
| 1:12 | 哈娜對上主祈禱無停，以利注意看伊的嘴。 |
| 1:13 | 哈娜靜靜祈求，只有嘴唇振動無出聲，所以以利想講伊是酒醉。 |
| 1:14 | 以利給伊講：「你欲醉偌久？毋通閣飲啦！」 |
| 1:15 | 哈娜應講：「先生，我無啲醉；我是一個真傷心的查某人，薄酒厚酒攏無飲，不過是啲對上主吐出苦情。 |
| 1:16 | 毋通看你的女婢做歹查某。我祈禱無停，因為真怨嘆，心艱苦。」 |
| 1:17 | 以利應伊講：「你平安倒去。願以色列的上帝照你所求的賜互你。」 |
| 1:18 | 哈娜講：「願你的女婢對你得著恩惠。」哈娜倒去，食飽了後，就無閣憂頭結面。 |
| 1:19 | 撒母耳出世 隔日𪜶真早起來，敬拜上主了後，就倒去𪜶佇拉瑪的厝。以利加拿及哈娜同房；上主會記得哈娜。 |
| 1:20 | 哈娜就懷孕，到時生一個子，給伊號名叫做撒母耳，意思是：「伊是我對上主求來的。」 |
| 1:21 | 獻撒母耳互上主 以利加拿及𪜶全家攏上去示羅，對上主獻年祭，閣謝伊所下的願。 |
| 1:22 | 毋拘哈娜無上去，給伊的丈夫講：「聽候囝仔斷奶，我才導伊去獻互上主，一世人住佇遐。」 |
| 1:23 | 伊的丈夫以利加拿給伊講：「你若看做好就按呢去做，聽候囝仔斷奶才去；願上主實現伊的話。」婦仁人就佇厝裡育子到伊斷奶。 |
| 1:24 | 囝仔斷奶了後，哈娜就導伊去示羅上主的厝；閣帶一隻三歲的牛、十公斤的幼麵粉、一皮袋的酒。彼時囝仔猶細漢。 |
| 1:25 | 𪜶就刣彼隻牛，導囝仔去以利遐。 |
| 1:26 | 婦仁人講：「先生，我確實就是以前徛佇你面前對上主祈禱彼個婦仁人。 |
| 1:27 | 我對上主求此個囝仔，伊有照我所求的互我； |
| 1:28 | 所以我將此個囝仔獻互上主，互伊一世人服事上主。」 𪜶就佇遐敬拜上主。 |