| 章節 | 現代台語漢字2021版經文 |
| 20:1 | 以色列人準備交戰 對按呢，所有的以色列人，對但到別是巴，及住佇基列的人，攏徛出來，團結一致，聚集佇米斯巴，上主的面前。 |
| 20:2 | 以色列眾支族的領袖攏來徛佇上帝子民的會中；攑刀的步兵有四十萬人。 |
| 20:3 | 便雅憫人有聽見以色列人攏來佇米斯巴。 以色列人問，講：「給阮講，此個歹代誌按怎發生的？」 |
| 20:4 | 彼個利未人，就是受害死的婦仁人的丈夫，應講：「我及我的細姨到便雅憫的基比亞歇暝。 |
| 20:5 | 基比亞人起來攻擊我，暝時包圍我歇暝的厝，想欲害死我；𪜶閣給我的細姨強姦到死。 |
| 20:6 | 我就將我的細姨切做一塊一塊，請人提去以色列人徛起的所有地區；因為基比亞人佇以色列人的中間做淫亂及見笑事。 |
| 20:7 | 恁所有的以色列人著參詳，做決定。」 |
| 20:8 | 所有的人民攏起來，團結一致，講：「阮無一個人會轉去伊的布棚，嘛無一個會倒去伊的厝。 |
| 20:9 | 今，阮對基比亞人欲按呢處理：阮照抽的籤去攻擊𪜶。 |
| 20:10 | 阮欲佇以色列眾支族的中間，一百人選十人，一千選一百，一萬選一千，給軍兵送糧食，互軍兵到便雅憫的基比亞，照基比亞人佇以色列中所做可惡的事給𪜶報復。」 |
| 20:11 | 對按呢，所有的以色列人團結一致，攻擊彼個城。 |
| 20:12 | 以色列所有的支族派人去便雅憫支族徛起的逐所在，講：「恁做的代誌實在有夠可惡！ |
| 20:13 | 今恁著將基比亞許個匪類交出來，阮欲互𪜶死，對以色列人的中間掃除此個邪惡。」毋拘便雅憫人毋肯聽𪜶的同胞以色列人的話。 |
| 20:14 | 便雅憫人攏對𪜶家己的城出來，來基比亞集合，欲及以色列人交戰。 |
| 20:15 | 便雅憫人對逐個城召集兩萬六千個攑刀的兵士，另外猶有基比亞人召集七百個精兵。 |
| 20:16 | 全部的軍隊中間有七百個特選的精兵；𪜶慣勢用倒手，逐個會用索挕石，真準，分毫不差。 |
| 20:17 | 以色列逐支族，便雅憫人以外，所召集攑刀的戰士，總共四十萬。 |
| 20:18 | 攻打便雅憫人 以色列人就起來，去伯特利求問上帝講：「阮中間叨一個支族著先去攻打便雅憫人？」 上主講：「猶大先去。」 |
| 20:19 | 以色列人透早起來，佇基比亞對面紮營。 |
| 20:20 | 以色列人出來，佇基比亞排陣欲及便雅憫人交戰。 |
| 20:21 | 便雅憫人嘛對基比亞出來；彼日，刣死以色列人兩萬兩千。 |
| 20:22 | 以色列人去到上主的面前，啼哭到暗時，請問上主講：「阮豈著閣進前及阮的同胞便雅憫人交戰？」 上主講：「著進前攻擊。」 以色列人就提出勇氣，猶原佇頭一日排陣的所在閣排陣。 |
| 20:23 | 併於上節 |
| 20:24 | 第二日，以色列人閣進前去攻擊便雅憫人。 |
| 20:25 | 便雅憫人嘛佇彼日對基比亞出來迎戰，閣刣死以色列人一萬八千個攑刀的戰士。 |
| 20:26 | 以色列人，就是所有的軍兵，攏上去伯特利，坐佇上主的面前啼哭。彼日，𪜶禁食到日暗，閣佇上主的面前獻燒化祭及平安祭。 |
| 20:27 | 彼時，上帝的約櫃佇伯特利。亞倫的孫，以利亞撒的子非尼哈佇上主的面前服事。以色列人請問上主，講：「阮著閣去及阮的同胞便雅憫人交戰，抑是著煞？」 上主講：「著去，明仔載我欲將𪜶交佇恁的手。」 |
| 20:28 | 併於上節 |
| 20:29 | 以色列人就派兵佇基比亞的四圍埋伏。 |
| 20:30 | 第三日，以色列人閣去攻擊便雅憫人，及前兩遍像款，佇基比亞排陣。 |
| 20:31 | 便雅憫人出去迎戰，受引誘離開城。𪜶佇兩條大路，一條迵伯特利，一條迵基比亞的野外，親像前兩遍，刣死以色列人約略三十個。 |
| 20:32 | 便雅憫人講：「𪜶會親像以前按呢互咱拍敗。」 毋拘以色列人講：「咱來走，引誘𪜶離開城到大路。」 |
| 20:33 | 以色列人的主力軍來巴力‧他瑪重新排陣；以色列埋伏的兵士對基比亞的西旁衝出來。 |
| 20:34 | 全部的以色列人有一萬個精兵，進前攻擊基比亞；交戰的勢面真猛烈，毋拘便雅憫人毋知災禍到啊。 |
| 20:35 | 上主互便雅憫人刣輸；彼日，以色列人刣死兩萬五千一百個便雅憫攑刀的兵士。 |
| 20:36 | 便雅憫人知𪜶已經刣輸。
以色列人刣贏 以色列人撤退，是因為𪜶信任派佇基比亞四圍埋伏的戰士。 |
| 20:37 | 埋伏的兵真緊衝入基比亞，用刀刣死全城的人。 |
| 20:38 | 以色列人的主力軍及埋伏的兵有約定一個信號，看著城內淐火燻的時， |
| 20:39 | 𪜶著越轉身反攻。代先，便雅憫人有刣死大約三十個以色列人，就講：「𪜶會親像以前按呢互咱拍敗。」 |
| 20:40 | 煙柱對城內淐高的時，便雅憫人越頭看著全城的火燻抵天。 |
| 20:41 | 以色列人閣越轉身反攻，便雅憫人就驚甲愣去，因為知災禍到啦。 |
| 20:42 | 𪜶佇以色列人的面前越轉身向曠野的路逃走；毋拘以色列人追趇𪜶真倚，𪜶就互主力軍及對逐個城出來的兵包圍，消滅。 |
| 20:43 | 以色列人包圍便雅憫人，追趇𪜶，到基比亞的東旁，一路給𪜶追殺。 |
| 20:44 | 便雅憫人死一萬八千個勇士。 |
| 20:45 | 其他的人越轉身向曠野逃走，到臨門巖。以色列人沿路刣死𪜶五千人；追趇𪜶到基頓，閣刣死兩千人。 |
| 20:46 | 彼日，便雅憫人攏總死兩萬五千個攑刀的戰士。 |
| 20:47 | 便雅憫人猶賰六百個戰士，𪜶逃走去曠野，佇臨門巖匿四個月。 |
| 20:48 | 以色列人閣越轉攻擊便雅憫人，用刀刣死城內的住民、牲生，及所有抵著的人；𪜶閣一路放火燒附近的城。 |