| 章節 | 現代台語漢字2021版經文 |
| 17:1 | 米迦的偶像 有一個人叫做米迦，住佇以法蓮山區。 |
| 17:2 | 伊對老母講：「你一千一百塊銀互人偷提去，你給彼個人咒詛，閣講互我聽。你看，許個銀佇我遮，是我提的。」 伊的老母講：「願上主賜福我的子。」 |
| 17:3 | 伊就將彼千一塊銀還伊的老母。後來伊的老母講：「我欲將諸個銀獻互上主，互我的子通刻一身神像，閣鑄一身神像。今我將諸個銀交你。」 |
| 17:4 | 米迦閣將許個銀還伊的老母。伊的老母就用兩百塊銀互拍金師傅，造雕刻的神像及鑄的神像。諸個神像下佇米迦的厝。 |
| 17:5 | 米迦有一間神廟，閣造以弗得及家族神像；伊閣給伊一個子設立做祭司。 |
| 17:6 | 彼時，以色列人無王，逐個人攏照伊看做著的去做。 |
| 17:7 | 猶大的伯利恆有一個少年人；伊是利未人，暫時住佇猶大支族的地區。 |
| 17:8 | 伊離開猶大的伯利恆城，欲尋一個通徛起的所在。伊來到以法蓮山區米迦的厝。 |
| 17:9 | 米迦問伊講：「你對叨位來？」 伊應講：「我是利未人，對猶大的伯利恆來，欲尋一個通徛起的所在。」 |
| 17:10 | 米迦給伊講：「請來及我住，做我的師父，做我的祭司；我逐年互你十塊銀、一套禮服，及食物。」利未人就入去。 |
| 17:11 | 利未人答應及米迦做夥住。米迦將此個少年人看做家己的子。 |
| 17:12 | 米迦給利未人設立做祭司，伊就住佇米迦的厝。 |
| 17:13 | 米迦講：「今我知上主欲好款待我，因為我有一個利未人做祭司。」 |