| 章節 | 現代台語漢字2021版經文 |
| 15:1 | 過一段時間，到割麥仔的時，參孫帶一隻山羊仔去尋伊的某。伊對伊的丈人講：「我欲入去房間尋阮某。」伊的丈人毋准伊入去。 |
| 15:2 | 丈人講：「我想你足慼伊，所以我將伊嫁互你的伴娶的。伊的小妹比伊較媠，你通娶伊。」 |
| 15:3 | 參孫給𪜶講：「此遍我有正當的理由對付非利士人。」 |
| 15:4 | 參孫就去掠三百隻狐狸，將𪜶兩隻兩隻的尾縛做夥，閣將火把縛佇狐狸尾的中間。 |
| 15:5 | 伊將火把點𤏸，放狐狸入去非利士人的麥園，將割好𫞼佇遐，及猶未割的麥仔攏燒了了，連葡萄園及橄欖樹嘛攏燒去。 |
| 15:6 | 非利士人講：「這是啥人做的？」 有人講：「是亭拿人的子婿參孫，因為伊的丈人將伊的某嫁互伊的伴娶的。」非利士人就去放火燒彼個婦仁人及伊的老父。 |
| 15:7 | 參孫對非利士人講：「恁既然做此款代誌，我一定欲報仇，毋放恁煞。」 |
| 15:8 | 參孫就出重手攻擊𪜶，刣死真多人。後來，伊落去住佇以坦的石洞內。 |
| 15:9 | 參孫拍敗非利士人 非利士人去紮營佇猶大，佇利希排陣。 |
| 15:10 | 猶大人講：「恁是按怎上來攻擊阮？」 𪜶講：「阮來是欲掠參孫；伊按怎對待阮，阮嘛欲按呢對待伊。」 |
| 15:11 | 對按呢，三千個猶大人就去以坦的石洞遐，給參孫講：「你豈毋知非利士人壓制咱？你哪給阮惹即大的麻煩？」 參孫應講：「𪜶按怎對待我，我嘛按呢對待𪜶。」 |
| 15:12 | 猶大人給伊講：「阮來欲給你縛起來交互非利士人。」 參孫給𪜶講：「恁著咒誓，恁𣍐害我。」 |
| 15:13 | 𪜶對伊講：「阮一定𣍐害你，干焦欲給你縛起來交互非利士人。」𪜶就用兩條新的索縛參孫，對石洞給伊帶出來。 |
| 15:14 | 參孫到利希；非利士人就行倚去，對伊大聲喝。上主的神大大充滿伊，縛伊的手的索就親像火燒過的麻索，對伊的手落落去。 |
| 15:15 | 伊看著一塊猶未焦的驢仔的嘴䩃骨，就拾起來，用來拍死一千人。 |
| 15:16 | 參孫講：
「我用驢的嘴䩃骨拍死一千人； 我用驢的嘴䩃骨拍死人，一堆閣一堆。」 |
| 15:17 | 講煞，就將手裡的嘴䩃骨㧒确；彼所在就叫做拉末‧利希。 |
| 15:18 | 參孫非常嘴焦，就求叫上主講：「你既然互你的僕人大勝利，哪通互我嘴焦甲欲死，互無受割禮的人掠去？」 |
| 15:19 | 上帝就互利希塌窩的所在裂開，水對遐淐出來。參孫飲了，元氣回復；彼個水泉就叫做隱‧哈歌利，到今仔日猶佇利希。 |
| 15:20 | 以色列人互非利士人壓制的時，參孫做士師二十年。 |