| 章節 | 現代台語漢字2021版經文 |
| 12:1 | 耶弗他及以法蓮人 以法蓮人佇撒分聚集，對耶弗他講：「你去及亞捫人交戰，是按怎無召集阮參加？阮欲用火燒你及你的厝。」 |
| 12:2 | 耶弗他給𪜶講：「我及我的軍兵及亞捫人大交戰的時，我招恁來，恁毋肯來救我脫離𪜶的手； |
| 12:3 | 我看著恁無來救我，就拼命進前攻擊亞捫人；上主將𪜶交佇我的手。今仔日恁是按怎來欲攻擊我？」 |
| 12:4 | 耶弗他就召集基列的軍兵及以法蓮人交戰。基列人拍敗以法蓮人。以法蓮人曾講：「恁基列人佇以法蓮及瑪拿西的中間，是以法蓮的逃兵。」 |
| 12:5 | 基列人顧守約旦河的渡口，毋互以法蓮人過去；逃走的以法蓮人若講：「請互阮過去。」基列人就問伊講：「你豈是以法蓮人？」 |
| 12:6 | 伊若講：「毋是。」𪜶就叫伊講示播列；伊會講做西播列，因為以法蓮人的發音講𣍐正；基列人就掠伊，佇約旦河的渡口給伊刣死。彼時有四萬兩千個以法蓮人受刣死。 |
| 12:7 | 耶弗他做以色列的士師六年。基列人耶弗他死，人給伊安葬佇基列的一座城。 |
| 12:8 | 以比讚、以倫、亞伯頓 耶弗他死了後，伯利恆人以比讚做以色列的士師。 |
| 12:9 | 伊有三十個子、三十個查某子；伊將查某子嫁互別個宗族，嘛為著伊的後生對別個宗族娶三十個新婦。伊做以色列的士師七年。 |
| 12:10 | 以比讚死，人給伊安葬佇伯利恆。 |
| 12:11 | 以比讚死了後，西布倫支族的人以倫做以色列的士師十年。 |
| 12:12 | 以倫死，人給伊安葬佇西布倫地區的亞雅崙。 |
| 12:13 | 以倫死了後，比拉頓人希列的子亞伯頓做以色列的士師。 |
| 12:14 | 伊有四十個子、三十個孫；𪜶騎七十隻驢仔。伊做以色列的士師八年。 |
| 12:15 | 比拉頓人希列的子亞伯頓死，人給伊安葬佇亞瑪力人的山地，以法蓮地區的比拉頓。 |