| 章節 | 現代台語漢字2021版經文 |
| 10:1 | 陀拉 亞比米勒死了後，有以薩迦支族的人朵多的孫，普瓦的子，陀拉興起，解救以色列人；伊住佇以法蓮山區的沙密。 |
| 10:2 | 伊做以色列的士師二十三年。伊死，人給伊安葬佇沙密。 |
| 10:3 | 睚珥 陀拉死了後，基列人睚珥興起，做以色列的士師二十二年。 |
| 10:4 | 伊有三十個子，騎三十隻驢仔，閣有三十座城，攏佇基列地區；諸個城到今仔日猶叫做哈倭特‧睚珥。 |
| 10:5 | 睚珥死，人給伊安葬佇加們。 |
| 10:6 | 耶弗他 以色列人閣做上主看做歹的事，去服事巴力及亞斯她錄，以及敘利亞、西頓、摩押、亞捫人，及非利士人的神明；𪜶棄拺上主，無服事伊。 |
| 10:7 | 上主對以色列人發受氣，將𪜶交互非利士人及亞捫人。 |
| 10:8 | 𪜶擾亂閣壓制住佇約旦河東旁，亞摩利人境內，基列地區的以色列人有十八年久。 |
| 10:9 | 亞捫人閣過約旦河，去攻擊猶大、便雅憫，及以法蓮諸個支族，以色列人就非常困苦。 |
| 10:10 | 以色列人哀求上主，講：「阮有得罪你，因為阮棄拺阮的上帝，去服事巴力。」 |
| 10:11 | 上主對以色列人講：「我豈無將恁對埃及人、亞摩利人、亞捫人，及非利士人的手解救出來？ |
| 10:12 | 西頓人、亞瑪力人，及瑪雲人壓制恁，恁哀求我，我嘛有解救恁脫離𪜶的手。 |
| 10:13 | 今恁竟然放拺我，去服事別個神明，所以我無欲閣救恁。 |
| 10:14 | 恁去哀求恁所揀的神明，互𪜶佇恁患難的時解救恁。」 |
| 10:15 | 以色列人對上主講：「阮有犯罪，出在你的意思對待阮；毋拘懇求你今仔日解救阮。」 |
| 10:16 | 𪜶就將𪜶中間的外邦神明除去，只有服事上主；上主對以色列人的困苦真不忍心。 |
| 10:17 | 亞捫人閣聚集，佇基列紮營；以色列人嘛聚集，紮營佇米斯巴。 |
| 10:18 | 基列的軍兵及官長參詳決定，講：「什麼人先去攻擊亞捫人，伊就做基列住民的領袖。」 |