| 章節 | 現代台語漢字2021版經文 |
| 9:1 | 亞比米勒 耶路巴力的子亞比米勒去示劍伊的母舅遐，對𪜶及伊的外公全家的人講： |
| 9:2 | 「請恁問示劍的眾人，看是耶路巴力七十個子統治恁，抑是一個人給恁統治較好？恁嘛著帶念我是恁的骨肉。」 |
| 9:3 | 伊許個母舅就將諸個話講互示劍的人聽；𪜶就擁護亞比米勒，講：「伊是咱的兄弟。」 |
| 9:4 | 𪜶對巴力‧比利土的廟提七十個銀仔互亞比米勒；伊就用諸個銀仔倩一寡匪類來隨伊。 |
| 9:5 | 伊去俄弗拉𪜶老父的厝，將伊的兄弟，就是耶路巴力的七十個子，攏刣死佇一塊石磐頂；只有耶路巴力的煞尾子約坦有走去匿，無死。 |
| 9:6 | 示劍人及伯‧米羅人攏聚集，佇示劍橡樹邊仔的柱像遐，設立亞比米勒作王。 |
| 9:7 | 約坦一下聽著此個代誌，就去徛佇基利心山頂，對示劍人大聲喝，講：「示劍人，著聽我講，上帝就會聽恁。 |
| 9:8 | 有一遍，樹仔欲設立一欉樹做𪜶的王。𪜶去給橄欖樹講：『請你做阮的王。』 |
| 9:9 | 橄欖樹應𪜶講：『我哪通停止生產互上帝及人得著榮光的油，去佇恁的頂面展威？』 |
| 9:10 | 諸個樹去給無花果樹講：『請你做阮的王。』 |
| 9:11 | 無花果樹應𪜶講：『我哪通停止生產我甜閣好食的果子，去佇恁的頂面展威？』 |
| 9:12 | 諸個樹去給葡萄樹講：『請你做阮的王。』 |
| 9:13 | 葡萄樹應𪜶講：『我哪通停止生產互上帝及人歡喜快樂的新酒，去佇恁的頂面展威？』 |
| 9:14 | 諸個樹對莿講：『你做阮的王。』 |
| 9:15 | 莿應𪜶講：『恁若真正欲設立我做恁的王，著來我的蔭影下互我保護；若毋，火就會對莿發出，燒毀黎巴嫩的柏香樹。』 |
| 9:16 | 「恁若誠心實意設立亞比米勒作王，若照耶路巴力為著恁所做的，公道對待伊及伊的家 — |
| 9:17 | 我的老父曾無顧性命為著恁交戰，救恁脫離米甸人的手； |
| 9:18 | 恁今仔日竟然攻擊阮老父的家，佇一塊石磐頂刣死伊七十個子，閣設立伊女婢的子，恁的兄弟亞比米勒做示劍人的王； |
| 9:19 | 恁今仔日若真誠公道對待耶路巴力及伊的家，我祝恁及亞比米勒攏歡喜快樂； |
| 9:20 | 若無，願火對亞比米勒發出，燒滅示劍人及伯‧米羅人；願火嘛對示劍人及伯‧米羅人發出，燒死亞比米勒。」 |
| 9:21 | 約坦因為驚伊的兄弟亞比米勒，就逃走去匿佇比珥，住佇遐。 |
| 9:22 | 亞比米勒統治以色列三年。 |
| 9:23 | 上帝派歹神去佇亞比米勒及示劍人的中間，互示劍人背叛亞比米勒， |
| 9:24 | 來報應亞比米勒，因為伊刣死耶路巴力七十個子；嘛報復示劍人，因為𪜶幫贊亞比米勒殘害伊的兄弟。 |
| 9:25 | 示劍人反對亞比米勒，就佇山頂埋伏，搶所有經過彼條路的人；有人將此項代誌給亞比米勒報告。 |
| 9:26 | 以別的子迦勒及伊的兄弟來到示劍；示劍人攏信任伊。 |
| 9:27 | 𪜶出去園裡收葡萄，踏酒，慶祝，佇𪜶的神廟亦食亦飲，咒詛亞比米勒。 |
| 9:28 | 以別的子迦勒講：「亞比米勒算啥？咱示劍人是什麼款人，哪著服事伊？伊不過是耶路巴力的子；西布勒不過是伊的部下。咱著服事咱示劍的開拓者哈抹的後代，哪欲服事亞比米勒？ |
| 9:29 | 諸個人民若互我指揮，我就會給亞比米勒消滅。」伊就給亞比米勒嗆聲：「加派你的軍兵，出來輸贏！」 |
| 9:30 | 市長西布勒聽著以別的子迦勒的話，非常受氣， |
| 9:31 | 就暗中派人去給亞比米勒報告，講：「以別的子迦勒及伊的兄弟來示劍，煽動城內的人反抗你； |
| 9:32 | 所以，你及你的部下著透暝出發，佇野外埋伏； |
| 9:33 | 日抵仔出的時，你著趕緊攻城；迦勒及隨伊的人出來攻擊你，你著全力對付𪜶。」 |
| 9:34 | 亞比米勒及伊的部下暝時出發，分做四隊，佇示劍附近埋伏。 |
| 9:35 | 以別的子迦勒出去，徛佇城門口；亞比米勒及伊的部下對埋伏的所在出來。 |
| 9:36 | 迦勒看著許個人，就對西布勒講：「你看，有人對山頂落來。」 西布勒講：「彼是山的影，你煞看做是人。」 |
| 9:37 | 迦勒閣講：「看咧，有人對高的所在落來，閣有一隊對米惡尼尼橡樹的路過來。」 |
| 9:38 | 西布勒對伊講：「你曾講：『亞比米勒算啥？咱哪著服事伊？』你講的大聲話佇叨位？諸個人豈毋是你藐視的人民？今你著出去及𪜶交戰。」 |
| 9:39 | 迦勒就導示劍人出去，及亞比米勒交戰。 |
| 9:40 | 亞比米勒追趇迦勒，迦勒就逃走；死傷的人真多，倒甲滿四界，一直到城門口。 |
| 9:41 | 亞比米勒住佇亞魯瑪；西布勒趕迦勒及伊的兄弟，毋准𪜶𫢶佇示劍。 |
| 9:42 | 隔日，示劍人出去野外；有人給亞比米勒講。 |
| 9:43 | 伊就將伊的部下分做三隊，埋伏佇野外；看著示劍人對城內出來，就起來攻擊𪜶，刣𪜶。 |
| 9:44 | 亞比米勒及隨伊彼隊衝進前，截佇城門口；另外彼兩隊直直衝去野外，刣死許個人。 |
| 9:45 | 亞比米勒歸日攻城。伊攻取彼個城了後，刣死城內的人，給城拆毀，閣撒鹽佇頂面。 |
| 9:46 | 住佇示劍城樓的人聽著，就走入去巴力‧比利土廟的地穴。 |
| 9:47 | 有人給亞比米勒講：「示劍城樓的人攏集中佇一所在。」 |
| 9:48 | 亞比米勒及隨伊的人就攏上撒們山；亞比米勒手攑斧頭，剉一支樹椏，夯佇肩頭頂。伊給隨伊的人講：「我按怎做，恁著趕緊隨我做。」 |
| 9:49 | 所有的人就攏剉樹椏，隨亞比米勒去到地穴遐，將樹椏疊佇彼頂面，放火燒，示劍城樓的人攏死；男女大約一千人。 |
| 9:50 | 亞比米勒去到提備斯，佇遐紮營，攻取彼座城。 |
| 9:51 | 城內有一座堅固的城樓；城內的人，無論男女，攏走去遐，關門，上樓頂。 |
| 9:52 | 亞比米勒來到城樓的門前，欲放火燒城樓。 |
| 9:53 | 有一個婦仁人將石磨的頂面座擲落去，擲著亞比米勒的頭殼，挵破伊的頭殼碗。 |
| 9:54 | 伊趕緊叫替伊攑軍器的少年人，給伊講：「拔刀給我刣死，才免人講我互查某人刣死。」少年人就給伊鑿死。 |
| 9:55 | 以色列人看著亞比米勒死，就攏倒去逐個人家己的厝。 |
| 9:56 | 按呢，上帝報應亞比米勒對伊的老父所做邪惡的事，就是刣死伊七十個兄弟。 |
| 9:57 | 上帝嘛報應示劍人所做攏總的歹事。耶路巴力的子約坦咒詛的話攏照按呢發生。 |