| 章節 | 現代台語漢字2021版經文 |
| 8:1 | 拍敗米甸人 以法蓮人對基甸講：「你去及米甸人交戰，哪無叫阮？你哪按呢對待阮？」𪜶就強烈指責基甸。 |
| 8:2 | 基甸對𪜶講：「我所做的及恁𣍐比得。以法蓮拾賰落來的葡萄，豈無比阮亞比以謝族的人收成的葡萄較好？ |
| 8:3 | 上帝已經將米甸兩個領袖俄立及西伊伯交佇恁的手；我所做的及恁豈會比得？」基甸講諸個話了後，𪜶就無閣受氣。 |
| 8:4 | 基甸及隨伊的三百人過約旦河；雖然真悿，毋拘猶繼續追趇。 |
| 8:5 | 基甸對疏割人講：「請恁提一寡餅互隨我的軍兵，因為𪜶真厭倦，我嘛啲追趇米甸兩個王，西巴及撒慕拿。」 |
| 8:6 | 疏割許個領袖應講：「你都猶未掠著西巴及撒慕拿，阮哪著用餅互你的軍隊？」 |
| 8:7 | 基甸講：「上主互我掠著西巴及撒慕拿了後，我就欲用曠野的莿及籐條給恁捽。」 |
| 8:8 | 伊對遐去到比努伊勒，嘛對𪜶提出像款的要求；比努伊勒人嘛用及疏割人仝款的話應伊。 |
| 8:9 | 伊對比努伊勒人講：「我平安倒來的時，我欲拆此個城樓。」 |
| 8:10 | 彼時，西巴及撒慕拿，以及𪜶的軍隊攏佇加各，大約有一萬五千人，攏是東旁的部族賰落來的軍兵；𪜶攑刀的戰士已經死十二萬人。 |
| 8:11 | 基甸對挪巴及約比哈東旁，順商隊的路上去，趁米甸的軍隊無啲警覺的時給𪜶突擊。 |
| 8:12 | 西巴及撒慕拿此兩個王逃走，基甸追趇𪜶，掠著𪜶，𪜶的軍隊敗退四散。 |
| 8:13 | 約阿施的子基甸對戰場，順希列斯的山坪倒來的時， |
| 8:14 | 掠著一個疏割的少年人，給伊查問；伊就將疏割七十七個領袖及長老的名寫出來交互基甸。 |
| 8:15 | 基甸到疏割，對遐的人講：「恁以前給我恥笑，講：『你都猶未掠著西巴及撒慕拿，阮哪著用餅互恁厭倦的軍兵？』今恁看，西巴及撒慕拿佇遮。」 |
| 8:16 | 伊就掠城內的長老，用曠野的莿及籐條教示疏割人； |
| 8:17 | 閣拆比努伊勒的城樓，刣死城內的人。 |
| 8:18 | 基甸問西巴及撒慕拿講：「恁佇他泊山刣的人生做什麼款？」 𪜶應講：「親像你，逐個人看起來攏親像王子。」 |
| 8:19 | 基甸講：「𪜶是我仝母的兄弟。我指永活的上主咒誓，恁若有留𪜶的性命，我就𣍐刣恁。」 |
| 8:20 | 伊就給伊的大子益帖講：「給𪜶刣死！」毋拘益帖驚，毋敢拔刀，因為伊猶少年。 |
| 8:21 | 西巴及撒慕拿給基甸講：「你家己動手。你才有夠力。」基甸就起來刣死西巴及撒慕拿，將𪜶的駱駝頷頸月眉形的妝飾提去。 |
| 8:22 | 以色列人對基甸講：「你已經救阮脫離米甸人，請你及你的子、你的孫統治阮。」 |
| 8:23 | 基甸講：「我無欲統治恁，我的子嘛無欲統治恁；只有上主才是恁的統治者。」 |
| 8:24 | 基甸閣對𪜶講：「我有一項要求，請恁逐個人將搶著的耳環互我。」(𪜶的對敵以實瑪利人有此款金的耳環。) |
| 8:25 | 𪜶講：「阮真歡喜互你。」𪜶就舒一領外衫，逐個人將搶來的耳環㧒佇彼頂面。 |
| 8:26 | 人民互基甸的金耳環，大約二十公斤；以外閣有米甸王月眉形的妝飾、耳墜、紫色的外袍，及駱駝頷頸的鍊仔。 |
| 8:27 | 基甸用諸個金仔製造一個以弗得，下佇伊的本城俄弗拉；後來以色列人攏去遐拜彼個以弗得背叛上帝；此個代誌成做基甸及伊全家的羅網。 |
| 8:28 | 按呢，米甸人受以色列人制伏，無力通閣反抗。佇基甸活啲的日，彼個地區太平四十年。 |
| 8:29 | 基甸死 約阿施的子基甸倒去住佇伊家己的厝。 |
| 8:30 | 基甸娶真多某，有生七十個子。 |
| 8:31 | 伊佇示劍的細姨嘛給伊生一個子，伊給號名叫做亞比米勒。 |
| 8:32 | 約阿施的子基甸年老歲壽多，就死；人給伊安葬佇亞比以謝族的俄弗拉，𪜶老父約阿施的墓。 |
| 8:33 | 基甸死了後，以色列人背叛上帝，去拜巴力，用巴力‧比利土做𪜶的神明。 |
| 8:34 | 以色列人𣍐記得解救𪜶脫離四圍對敵的上主 — 𪜶的上帝， |
| 8:35 | 嘛無因為耶路巴力，就是基甸，為著以色列人做的好事，好款待伊的家庭。 |