| 章節 | 現代台語漢字2021版經文 |
| 5:1 | 底波拉及巴拉的歌 彼日，底波拉及亞比挪菴的子巴拉唱歌，講： |
| 5:2 | 以色列中有領袖導頭，
人民甘願犧牲， 恁著稱讚上主！ |
| 5:3 | 君王啊，著聽！
統治者啊，著俯耳孔聽！ 我欲向上主唱歌； 我欲唱歌稱讚上主 — 以色列的上帝。 |
| 5:4 | 上主你對西珥出發，
對以東的地前進； 彼時大地搖泏，天摒水， 雲落大雨。 |
| 5:5 | 眾山佇西奈山的上主面前動搖，
佇上主 — 以色列上帝的面前搖泏。 |
| 5:6 | 佇亞拿的子珊迦的時，
佇雅億的日， 商隊無閣對遐經過， 旅行的人斡去行小路。 |
| 5:7 | 以色列農村拋荒，
攏無人住， 到我底波拉起來， 起來做以色列的老母。 |
| 5:8 | 以色列揀新的神明，
戰爭就來到𪜶的城門。 彼時以色列四萬人的中間， 看𣍐著盾牌及槍。 |
| 5:9 | 我的心意向以色列的領袖，
意向甘願犧牲的人民。 恁著稱讚上主！ |
| 5:10 | 騎白色驢母的、
坐馬鞍的、 旅行的人， 恁攏著報揚。 |
| 5:11 | 汲水的所在，有唱歌的人的歌聲，
𪜶啲講起上主公義的所做， 就是伊解救以色列農民的作為。 彼時，上主的子民落去到城門歡呼： |
| 5:12 | 底波拉，著興起，興起！
著醒起來，醒起來！ 著唱歌！ 巴拉，著起來！ 亞比挪菴的子，著掠你的俘虜來！ |
| 5:13 | 彼時，所賰的貴族落來，
上主的子民親像勇士為我出征。 |
| 5:14 | 對以法蓮來的，進入山谷；
隨佇便雅憫支族的後面。 有領袖對瑪吉落來； 有指揮官對西布倫出來。 |
| 5:15 | 以薩迦的領袖及底波拉做夥來；
以薩迦隨佇巴拉後面， 及伊做夥衝入山谷。 呂便心躊躇無決斷。 |
| 5:16 | 𪜶是按怎留佇羊椆，
聽顧羊的人歕𥰔仔？ 呂便心躊躇無決斷。 |
| 5:17 | 迦得住佇約旦河東旁；
但是按怎留佇船頂？ 亞設停留佇海邊， 安居佇港口。 |
| 5:18 | 西布倫是拼命毋驚死的人民；
拿弗他利佇戰場嘛是按呢。 |
| 5:19 | 君王攏來參戰；
彼時迦南諸王佇米吉多水邊的他納交戰， 毋拘無搶著銀。 |
| 5:20 | 星辰嘛對天參戰，
對𪜶的軌道攻擊西西拉。 |
| 5:21 | 基順河給𪜶沖走；
基順河的水強閣大。 我的心啊，著奮勇前進！ |
| 5:22 | 勇壯的馬奔跑親像啲飛；
馬蹄的聲親像雷赫呢響。 |
| 5:23 | 上主的使者講：「著咒詛米羅斯，
重重咒詛遐的住民； 因為𪜶無來幫贊上主， 無幫贊上主攻擊對敵。」 |
| 5:24 | 基尼人希百的某雅億
比所有的婦仁人較通謳咾， 比住佇厝裡的婦仁人較通謳咾。 |
| 5:25 | 西西拉討水，雅億互伊牛奶，
用貴重的盤捧起司互伊。 |
| 5:26 | 雅億手提杙仔，
正手攑工人的槌仔， 摃西西拉，拍碎伊的頭， 鑿迵伊的鬢邊。 |
| 5:27 | 佇伊的腳前，西西拉慄落去，倒直直，
佇伊的腳前慄落去，𣍐振動； 西西拉佇遐慄落去，死去。 |
| 5:28 | 西西拉的老母對窗仔看出去，
佇窗仔邊硞硞相，講： 「是按怎伊的戰車猶未轉來？ 是按怎猶未聽著車輪的聲？」 |
| 5:29 | 伊聰明的宮女回答伊，
伊嘛家己按呢講： |
| 5:30 | 「𪜶一定是啲分戰利品；
逐個勇士分著一兩個查某囝仔。 西西拉一定分著彩色的衫， 彩色繡花的衫， 兩領彩色繡花的衫， 袚佇頷頸做戰利品。」 |
| 5:31 | 上主啊，願你的對敵攏按呢滅亡。
願疼你的人親像日頭出現光映映。 以後彼個地區太平四十年。 |