| 章節 | 現代台語漢字2021版經文 |
| 24:1 | 以撒娶某 亞伯拉罕年老，長歲壽；伊一生所做的事攏得著上主祝福。 |
| 24:2 | 亞伯拉罕對伊資深的管家講：「請將你的手下佇我的大腿下， |
| 24:3 | 你著指上主 — 天及地的上帝咒誓，毋通給我娶遮的迦南女子做新婦。 |
| 24:4 | 你著去我的本地本族，給我的子以撒娶一個某。」 |
| 24:5 | 彼個管家應講：「彼個查某囝仔若毋肯隨我來咱遮，我豈通將你的子導轉去你的故鄉？」 |
| 24:6 | 亞伯拉罕給伊講：「你絕對毋通給我的子導倒去遐； |
| 24:7 | 上主 — 天頂的上帝曾導我離開阮老父的家及本族的地，閣對我立誓應允，講：『我欲將此個地賞賜你的後代。』伊會差伊的使者給你引導，互你通對遐給我的子娶某。 |
| 24:8 | 彼個查某囝仔若毋肯隨你來，此個咒誓就及你無關係；毋拘千萬毋通給我的子導轉去遐。」 |
| 24:9 | 管家就將手下佇伊的主人亞伯拉罕的大腿下，為著此個代誌咒誓。 |
| 24:10 | 彼個管家對伊主人的駱駝選十隻，閣帶伊主人逐款的財寶，出發去美索不達米亞，到拿鶴的城。 |
| 24:11 | 伊互駱駝跪佇城外的井邊；彼時抵抵黃昏，婦女出來汲水。 |
| 24:12 | 伊講：「上主 — 我的主人亞伯拉罕的上帝，求你施恩互我的主人亞伯拉罕，互我今仔日有好機會。 |
| 24:13 | 我今徛佇井邊，城內的查某囝仔出來汲水； |
| 24:14 | 我若對其中一個查某囝仔講『請放落你的水瓶，互我飲水』，伊若講『請飲，我嘛欲互你的駱駝飲』，願伊就是你所選欲互你的僕人以撒做某的查某囝仔；按呢，我就知你施恩互我的主人。」 |
| 24:15 | 話猶未講煞，麗百加肩頭頂下水瓶出來；伊是彼土利的查某子；彼土利是亞伯拉罕的小弟拿鶴的某蜜迦的子。 |
| 24:16 | 彼個查某囝仔面貌非常媠，是在室女，猶毋曾有查甫人及伊做夥睏。伊落去井邊，給水瓶貯滿就起來。 |
| 24:17 | 管家走去對伊講：「請你將瓶裡的水一屑仔互我飲。」 |
| 24:18 | 查某囝仔講：「先生，請飲。」伊就趕緊放落水瓶，靠佇手裡，互彼個管家飲。 |
| 24:19 | 互管家飲了，閣講：「我嘛欲互你的駱駝飲到飽。」 |
| 24:20 | 伊就趕緊將瓶內的水摒佇槽裡，閣走去井邊為駱駝汲水。 |
| 24:21 | 彼個管家注意給看，恬恬無講話，愛知上主是毋是會互伊的任務順利完成。 |
| 24:22 | 駱駝飲了，彼個人就提一個六公克的金鼻環、一對一百十四公克的金手環互此個查某囝仔， |
| 24:23 | 對伊講：「請問，你是什麼人的查某子？恁老父的厝豈有所在互阮歇暝？」 |
| 24:24 | 麗百加就給伊講：「我是彼土利的查某子；阮老父是蜜迦給拿鶴生的子。 |
| 24:25 | 阮有充足的草料米糧，嘛有所在通互恁歇暝。」 |
| 24:26 | 彼個管家就跪落去敬拜上主，講： |
| 24:27 | 「我欲稱讚上主 — 我的主人亞伯拉罕的上帝；伊一直用慈愛信實對待我的主人，一路引導我來到我的主人兄弟的家。」 |
| 24:28 | 查某囝仔走倒去，將諸個代誌給𪜶老母全家的人講。 |
| 24:29 | 麗百加有一個兄哥拉班，伊一下看著𪜶小妹身上的鼻環及手環，閣聽著麗百加講「彼個人對我講按呢，按呢」，就走去井邊，見彼個人。伊到的時，彼個人猶徛佇水井邊駱駝遐。 |
| 24:30 | 併於上節 |
| 24:31 | 伊給彼個人講：「你是上主賜福的人，哪猶徛佇外面？請來阮兜。你的房間及駱駝歇睏的所在，我已經準備好勢。」 |
| 24:32 | 彼個管家就入去拉班的厝。有人來解駱駝載的物件，用草料糧食飼駱駝，閣捧水互彼個管家以及及伊做夥來的人洗腳。 |
| 24:33 | 有人將食物排佇管家面前，欲請伊食，毋拘伊講：「聽候我將我來的目的講清楚，我才食。」拉班講：「請講。」 |
| 24:34 | 伊就講：「我是亞伯拉罕的僕人。 |
| 24:35 | 上主有大大賜福我的主人，互伊真好額，閣互伊牛、羊、金、銀、僕人、女婢、駱駝及驢仔。 |
| 24:36 | 我的主人的某莎拉年老的時，給伊生一個子；我的主人嘛將伊所有的互此個子。 |
| 24:37 | 我的主人教我咒誓，講：『毋通給我娶遮的迦南女子做新婦。 |
| 24:38 | 你著去我的老父的家，我本族遐，給我的子娶一個某。』 |
| 24:39 | 我對我的主人講：『彼個查某囝仔若毋肯隨我來咱遮，欲按怎？』 |
| 24:40 | 伊就給我講：『我服事的上主會差伊的使者及你做夥去，互你一路順利，你就通對我的宗族，阮老父的家，給我的子娶某。 |
| 24:41 | 你若有去到我本族遐，就算有照咒誓做；萬一𪜶毋將彼個查某囝仔交互你，此個咒誓就及你無關係。』 |
| 24:42 | 「今仔日我到井邊，祈禱講：上主 — 我主人亞伯拉罕的上帝，求你互我一路順利。 |
| 24:43 | 我今徛佇井邊，對出來汲水的一個查某囝仔講『請你將水瓶的水一屑仔互我飲』， |
| 24:44 | 伊若講『請飲，我嘛欲互你的駱駝飲』，願伊就是上主所選欲互我主人的子做某的查某囝仔。 |
| 24:45 | 我心內的話講猶未了，麗百加就出來，肩頭頂下水瓶；落去井邊汲水；我給伊講：『請你互我飲。』 |
| 24:46 | 伊就趕緊對肩頭頂放落水瓶，講：『請飲，我嘛欲互你的駱駝飲。』我就飲，伊嘛互我的駱駝飲。 |
| 24:47 | 我閣問伊：『你是什麼人的查某子？』伊講：『我是彼土利的查某子；阮老父是蜜迦給拿鶴生的子。』我就將鼻環掛佇伊的鼻，手環掛佇伊的手。 |
| 24:48 | 我跪落去敬拜上主，稱讚上主 — 我的主人亞伯拉罕的上帝，因為伊引導我一路順利，互我尋著我主人的小弟的查某孫來互伊做新婦。 |
| 24:49 | 今恁若欲用慈愛信實對待我的主人，就給我講；若毋，嘛給我講，互我通決定閣來欲按怎。」 |
| 24:50 | 拉班及彼土利應講：「此個代誌既然上主按呢安排，阮𣍐當對你講什麼。 |
| 24:51 | 今，麗百加佇遮，你通導伊去，照上主的安排，互你的主人的子做某。」 |
| 24:52 | 亞伯拉罕的管家聽著諸個話，就仆佇土腳敬拜上主。 |
| 24:53 | 彼個管家起來，提金器、銀器，及衣服送麗百加，閣將貴重的禮物送互伊的兄哥及老母。 |
| 24:54 | 彼個管家及隨伊的人此時才飲食歇暝。隔日透早，管家對𪜶講：「請互我倒去我的主人遐。」 |
| 24:55 | 麗百加的兄哥及老母講：「請互查某囝仔及阮住幾日仔，上少十日，伊才及恁去。」 |
| 24:56 | 伊對𪜶講：「請毋通給我留。上主已經互我一路順利，請互我趕緊倒去我的主人遐。」 |
| 24:57 | 𪜶講：「阮叫查某囝仔來，探伊的話意。」 |
| 24:58 | 𪜶就叫麗百加來，問伊講：「你豈欲及此個管家做夥去？」 麗百加應講：「我欲。」 |
| 24:59 | 𪜶就送小妹麗百加及伊的奶母，隨亞伯拉罕的管家及跟隨伊的人去。 |
| 24:60 | 𪜶給麗百加祝福，講：
阮的小妹， 願你的子孫千千萬萬； 願你的後代佔領對敵的城。 |
| 24:61 | 麗百加及伊的女婢騎駱駝隨彼個管家去；管家就導麗百加轉去。 |
| 24:62 | 彼時，以撒徙去比珥‧拉海‧萊，住佇尼革夫。 |
| 24:63 | 黃昏的時，以撒出來野外散步，攑頭一下看，看著駱駝啲來。 |
| 24:64 | 麗百加看著以撒，就對駱駝落來。 |
| 24:65 | 伊問彼個管家講：「佇野地向咱遮行來的是什麼人？」 彼個管家講：「是我的主人。」麗百加就用帕遮面。 |
| 24:66 | 管家將伊所做的代誌攏給以撒報告。 |
| 24:67 | 以撒就牽麗百加入去伊的老母莎拉的布棚，娶伊做某。以撒真疼麗百加；伊對老母死了後，到此時才得著安慰。 |