| 章節 | 現代台語漢字2021版經文 |
| 23:1 | 約書亞的遺言 上主互以色列人享受太平，無受四圍對敵的攻擊。經過一段真長的時間，約書亞年老； |
| 23:2 | 伊召集全以色列的長老、族長、審判官，及官長，對𪜶講：「我已經年老啦。 |
| 23:3 | 恁有看著上主 — 恁的上帝為著恁對許個國所做一切的事；因為上主 — 恁的上帝為恁交戰。 |
| 23:4 | 我所消滅許個國家的土地，對約旦河到西旁地中海，包括猶未征服的國，我已經抽籤分互恁逐支族做家業。 |
| 23:5 | 上主 — 恁的上帝欲為著恁將𪜶趕走離開恁；恁就會照上主 — 恁的上帝對恁的應允，得著𪜶的土地做家業。 |
| 23:6 | 所以恁著加倍勇敢，忠實遵行摩西律法的冊所有的記載，毋通偏左偏右。 |
| 23:7 | 恁中間猶未互恁征服的國，恁毋通及𪜶交插，毋通提起𪜶的神明的名，毋通指𪜶咒誓，毋通服事𪜶，毋通跪拜𪜶。 |
| 23:8 | 恁著忠誠無離開上主 — 恁的上帝，親像恁過去到現在攏按呢做。 |
| 23:9 | 因為上主已經將大閣強的國對恁的面前趕走；到今仔日無一個人會當對抗恁。 |
| 23:10 | 恁一個人會當趕走一千人，因為上主 — 恁的上帝會照伊對恁的應允為恁交戰。 |
| 23:11 | 恁著謹慎，著疼上主 — 恁的上帝。 |
| 23:12 | 恁若越走離開上主，及佇恁中間留落來的人民交插，及𪜶通婚，往來； |
| 23:13 | 恁著確實知，上主 — 恁的上帝一定無欲將許個人民對恁的面前趕走；𪜶會成做恁的羅網圈套，拍恁的鞭，目睭內的刺，直到恁對上主 — 恁的上帝賜互恁此個媠的土地消滅。 |
| 23:14 | 「今，我欲行世間人攏著行的路。恁確實知，上主 — 恁的上帝應允欲互恁的福氣，無一項落空，攏實現佇恁身上。 |
| 23:15 | 上主 — 恁的上帝所應允一切的福氣按怎臨到恁，上主嘛會按呢互逐款的災禍到佇恁，直到上主 — 恁的上帝給恁對伊賞賜恁此個媠的土地除滅。 |
| 23:16 | 恁若違背上主 — 恁的上帝所命令恁的約，去服事跪拜別個神明，上主會對恁發受氣，恁會真緊對伊賞賜互恁此個媠的地滅亡。」 |