| 章節 | 現代台語漢字2021版經文 |
| 17:1 | 西旁的瑪拿西支族 下面是約瑟的大子瑪拿西的後代抽籤得著的家業：瑪吉是瑪拿西的大子，基列的開拓者；瑪吉是勇士，得著基列及巴珊。 |
| 17:2 | 約瑟的子瑪拿西其他的後生，就是亞比以謝、希勒、亞斯烈、示劍、希弗、示米大，𪜶的子孫照宗族嘛抽籤得著土地。 |
| 17:3 | 瑪拿西的元孫，瑪吉的曾孫，基列的孫，希弗的子西羅非哈無子，只有查某子，就是瑪拉、挪阿、曷拉、蜜迦，及得撒。 |
| 17:4 | 𪜶來到祭司以利亞撒及嫩的子約書亞，以及眾領袖的面前，講：「上主有命令摩西，著互阮及阮的親族像款分著家業。」約書亞就照上主的命令，互𪜶及𪜶的阿伯阿叔仝款分著家業。 |
| 17:5 | 佇約旦河東旁的基列及巴珊地區以外，瑪拿西閣抽籤得著十份的家業， |
| 17:6 | 因為瑪拿西許個查某孫，佇伊的子孫中得著家業。基列地分互瑪拿西其他的後代。 |
| 17:7 | 瑪拿西的地界，對亞設起，到示劍東旁的密米他，向南到隱‧他普亞的住民遐。 |
| 17:8 | 他普亞地區歸瑪拿西；毋拘瑪拿西邊界的他普亞城屬以法蓮的後代。 |
| 17:9 | 此個地界對遐落去到加拿溪；溪南旁的城鎮雖然佇瑪拿西境內，毋拘屬以法蓮；瑪拿西的地界順加拿溪的北旁，迵到地中海為止。 |
| 17:10 | 以法蓮佇南旁，瑪拿西佇北旁；地中海是𪜶西旁的地界；亞設佇西北旁，以薩迦佇東北旁。 |
| 17:11 | 瑪拿西佇以薩迦及亞設的境內有伯‧善、以伯蓮，及多珥，以及𪜶附近的庄社；閣有隱‧多珥、他納、米吉多此三區，以及𪜶的住民及附近的庄社。 |
| 17:12 | 毋拘瑪拿西人無法度將許個城的住民趕出去；迦南人堅持欲住佇遐。 |
| 17:13 | 以色列人強盛的時，就互迦南人做苦工，無攏將𪜶趕出去。 |
| 17:14 | 約瑟的後代要求較多土地 約瑟的子孫對約書亞講：「上主有賜福阮，互阮成做大族，你哪干焦互阮抽一支籤，分一份做家業？」 |
| 17:15 | 約書亞應𪜶講：「恁若人多，嫌以法蓮山區傷狹，恁通去比利洗人及利乏音人地區的樹林開墾。」 |
| 17:16 | 約瑟的後代講：「彼個山區無夠阮住；閣住佇伯‧善及附近的庄社，以及耶斯列山谷的迦南人攏有鐵的戰車。」 |
| 17:17 | 約書亞對約瑟家，就是以法蓮人及瑪拿西人，講：「恁人多閣強盛，應該毋若一支籤的份互恁。 |
| 17:18 | 歸個山區攏是恁的；彼個地區雖然有樹林，恁通開墾，到邊界就攏屬恁。迦南人雖然有鐵的戰車，閣強盛，恁嘛會當給𪜶趕出去。」 |