| 章節 | 現代台語漢字2021版經文 |
| 9:1 | 基遍人騙約書亞 住佇約旦河西旁的山區、山埔，以及地中海沿岸到黎巴嫩地區的赫人、亞摩利人、迦南人、比利洗人、希未人、耶布斯人，諸個王一下聽著以色列人刣贏的消息， |
| 9:2 | 就攏聚集，同心合意，欲及約書亞，以及以色列人交戰。 |
| 9:3 | 基遍的住民聽著約書亞按怎對待耶利哥及艾城， |
| 9:4 | 就設計謀，假做使者，用驢仔載貯物件的舊布袋，及補過的舊酒袋； |
| 9:5 | 穿補過的舊鞋及舊衫，帶焦閣碎碎的餅。 |
| 9:6 | 𪜶來到吉甲的營地見約書亞，對伊及以色列人講：「阮是對真遠的所在來的；今請及阮立約。」 |
| 9:7 | 以色列人對諸個希未人講：「恁可能是此所在的住民，阮哪會當及恁立約？」 |
| 9:8 | 基遍人對約書亞講：「阮是你的奴僕。」 約書亞問𪜶講：「恁是什麼人，是對叨位來的？」 |
| 9:9 | 𪜶對伊講：「你的奴僕對真遠的所在來；阮有聽見上主 — 你的上帝的名聲，就是伊佇埃及一切的所做， |
| 9:10 | 以及伊佇約旦河東旁對亞摩利兩個王，希實本王西宏及住佇亞斯他錄的巴珊王噩，一切的所做。 |
| 9:11 | 阮的領袖及阮遐的人攏給阮講：『恁著帶路中需要的食物去迎接以色列人，給𪜶講：阮是恁的奴僕，請及阮立約。』 |
| 9:12 | 阮出發欲來恁遮的時，帶出來的餅猶燒燒，毋拘今已經攏焦閣碎碎去啦； |
| 9:13 | 因為路真遠，諸個酒袋，貯酒的時猶是新的，毋拘今已經破裂；阮的衫及鞋嘛攏舊去啦。」 |
| 9:14 | 以色列人檢查𪜶的食物，無問上主。 |
| 9:15 | 約書亞就及𪜶定和平條約，無刣𪜶；會眾的領袖嘛對𪜶咒誓。 |
| 9:16 | 以色列人發見受欺騙 以色列人及𪜶立約了後，過三日，才知𪜶原來住佇附近。 |
| 9:17 | 以色列人出發，第三日來到𪜶住的城；許個城就是基遍、基非拉、比錄、基列‧耶琳。 |
| 9:18 | 因為會眾的領袖已經指上主 — 以色列的上帝對𪜶咒誓，以色列人就無給𪜶刣；因為按呢，民眾就不滿𪜶的領袖。 |
| 9:19 | 許個領袖對民眾講：「阮已經指上主 — 以色列的上帝對𪜶咒誓，所以咱毋通給𪜶磕著。 |
| 9:20 | 咱著留𪜶的性命，才免咱因為違背咒誓，互上帝給咱刑罰。」 |
| 9:21 | 領袖閣對𪜶講：「著互𪜶活啲。」對按呢，基遍人就照領袖講的話，為著民眾破柴汲水。 |
| 9:22 | 約書亞叫𪜶來，給𪜶講：「恁是按怎騙阮講『阮是對真遠的所在來的』？其實恁是此所在的住民。 |
| 9:23 | 所以恁著受上主責罰，恁中間不斷有人會做奴隸，為著阮上帝的厝做破柴汲水的。」 |
| 9:24 | 𪜶應約書亞講：「因為確實有人給你的奴僕講，上主 — 你的上帝有應允伊的僕人摩西，欲將此個全地賞賜恁，閣佇恁的頭前剿滅此個地所有的住民；阮因為驚互恁刣死才按呢做。 |
| 9:25 | 今阮佇你的手頭；你通照你看做好，看做著的對待阮。」 |
| 9:26 | 約書亞就按呢對待𪜶，救𪜶免互以色列人刣死。 |
| 9:27 | 對彼日起，約書亞就互𪜶佇上主所揀選的所在，為著民眾及祭壇破柴汲水，直到今仔日。 |