| 章節 | 現代台語漢字2021版經文 |
| 5:1 | 約旦河西旁的亞摩利諸王及倚地中海的迦南諸王，聽見上主佇以色列人的面前互約旦河的水焦去，閣聽候𪜶過去；諸個王的心攏因為以色列人的緣故驚甲神不附體。 |
| 5:2 | 佇吉甲行割禮 彼時，上主對約書亞講：「你著用火石磨做刀，第二遍給以色列人行割禮。」 |
| 5:3 | 約書亞就製造火石刀，佇割禮山給以色列人行割禮。 |
| 5:4 | 約書亞給𪜶行割禮的原因是按呢：對埃及出來許個會交戰的查甫人攏死佇曠野的路裡， |
| 5:5 | 𪜶攏有受割禮；毋拘出埃及以後佇曠野出世的人民攏猶未受割禮。 |
| 5:6 | 以色列人佇曠野行四十年，出埃及的戰士因為無聽趁上主的話，攏受消滅；上主曾對𪜶宣誓，毋互𪜶看著上主對𪜶的列祖立誓欲賞賜𪜶的地，就是流奶及蜜的地。 |
| 5:7 | 𪜶的子孫，就是上主所興起新的一代，攏猶未受割禮，因為佇路裡無人給𪜶行割禮，約書亞才給𪜶行。 |
| 5:8 | 所有的以色列人攏受割禮了後，就留佇營內，聽候回復。 |
| 5:9 | 上主對約書亞講：「我今仔日已經除去恁佇埃及所受的見笑。」所以，彼所在就叫做吉甲，到今仔日。 |
| 5:10 | 彼時，以色列人佇吉甲紮營；彼月十四暗，𪜶佇耶利哥平原守𨃟過節。 |
| 5:11 | 𨃟過節隔日，𪜶就食彼所在的土產，就是無酵餅及烘的五穀。 |
| 5:12 | 𪜶食彼所在的土產彼日起，嗎哪無閣降落；以色列人就無閣有嗎哪。彼年𪜶開始食迦南地的土產。 |
| 5:13 | 約書亞及上主軍隊的統帥 約書亞接近耶利哥的時，忽然看著有一個人攑一支拔起來的刀，徛佇伊的對面；約書亞行進前，問伊講：「你是為阮此旁的，抑是為阮的對敵彼旁？」 |
| 5:14 | 伊應講：「攏毋是。我是上主軍隊的統帥。今我來啦！」 約書亞就仆佇土腳拜伊，講：「我的主對你的僕人有什麼吩咐？」 |
| 5:15 | 上主軍隊的統帥對約書亞講：「將你腳裡的鞋褪起來，因為你徛的所在是聖的。」約書亞就照按呢做。 |