| 章節 | 現代台語漢字2021版經文 |
| 4:1 | 疊石頭做記號 全體人民已經過約旦河，上主吩咐約書亞，講： |
| 4:2 | 「著對人民的中間揀十二人，每支族一個人； |
| 4:3 | 命令𪜶對約旦河中，祭司徛的所在，取十二塊石，帶過去，下佇恁今暝欲歇睏的所在。」 |
| 4:4 | 約書亞就將伊對以色列人所選出彼十二人，每支族一個，攏召集倚來。 |
| 4:5 | 約書亞給𪜶講：「恁去約旦河中，到上主 — 恁的上帝約櫃的頭前，照以色列支族的數目，逐個人取一塊石頭夯佇肩頭頂； |
| 4:6 | 諸個石頭通佇恁中間做記號；將來恁的子孫若問恁：『諸個石頭對恁有什麼意思？』 |
| 4:7 | 恁通對𪜶講：『是因為以前約旦河的水佇上主的約櫃前截斷；約櫃過約旦河的時，約旦河的水無閣流；諸個石頭欲做以色列人永遠的記念。』」 |
| 4:8 | 以色列人聽約書亞的命令，照以色列人支族的數目，對約旦河中取十二塊石頭。𪜶照上主對約書亞的吩咐，帶許個石頭過河，下佇𪜶歇睏的所在。 |
| 4:9 | 約書亞另外用十二塊石頭疊佇約旦河中，佇扛約櫃的祭司徛啲的所在；到今仔日，許個石頭猶佇遐。 |
| 4:10 | 扛約櫃的祭司徛佇約旦河中，一直到上主通過約書亞對人民的命令攏完成，抵照摩西吩咐約書亞的話。 人民真緊過去。 |
| 4:11 | 全體人民一下過河，上主的約櫃及祭司就佇人民的面前過去。 |
| 4:12 | 呂便人、迦得人、瑪拿西半支族的人，攏照摩西對𪜶講的話，帶軍器佇以色列人的頭前過去； |
| 4:13 | 𪜶約略有四萬人帶軍器佇上主的面前過去，到耶利哥平原，準備好勢欲交戰。 |
| 4:14 | 彼日，上主互以色列眾人尊約書亞做大；伊一生受人民敬畏，親像𪜶敬畏摩西按呢。 |
| 4:15 | 上主吩咐約書亞，講： |
| 4:16 | 「你命令扛約櫃的祭司對約旦河起來。」 |
| 4:17 | 約書亞就按呢命令祭司。 |
| 4:18 | 扛上主約櫃的祭司對約旦河起來；祭司的腳一下踏上岸，約旦河的水就回復原狀，親像以前漲滿雙旁岸。 |
| 4:19 | 正月初十，以色列人民對約旦河上來，佇耶利哥東旁的吉甲紮營。 |
| 4:20 | 約書亞將𪜶對約旦河取來彼十二塊石頭，疊佇吉甲， |
| 4:21 | 然後對以色列人講：「將來恁的子孫若問𪜶的老父：『諸個石頭是什麼意思？』 |
| 4:22 | 彼時著互恁的子孫知，講：『以色列人曾行焦地，過此個約旦河。』 |
| 4:23 | 上主 — 恁的上帝佇恁的頭前互約旦河的水焦去，聽候恁過河，親像伊早前佇紅海做的一樣，就是互河佇阮的頭前焦去，聽候阮過來； |
| 4:24 | 欲互全人類攏知，上主的手有大能力；嘛欲互恁永遠敬畏上主 — 恁的上帝。」 |