| 章節 | 現代台語漢字2021版經文 |
| 33:1 | 摩西祝福逐支族 上帝重用的人摩西欲死以前，給以色列人祝福。祝福的話記佇下面： |
| 33:2 | 上主對西奈山來，
親像日頭對以東起來， 對巴蘭山照光； 伊導千千萬萬天使來， 正手提發光的律法互𪜶。 |
| 33:3 | 上主實在疼萬民，
眷顧伊聖的子民。 𪜶坐佇你的腳下， 聽受你的教示。 |
| 33:4 | 摩西用律法傳互咱，
做雅各會眾寶貴的產業。 |
| 33:5 | 上主作王統治以色列，
人民的領袖及以色列眾支族聚集慶祝。 |
| 33:6 | 呂便支族雖然人額少，
願𪜶繼續生存無斷絕。 |
| 33:7 | 關係猶大，伊講：
願上主聽猶大的祈求， 導𪜶及別個支族重新聯合； 𪜶為家己交戰， 願你幫贊𪜶拍敗對敵。 |
| 33:8 | 關係利未，伊講：
願上主將土明賜互利未，將烏陵賜互對你忠誠的人； 你佇瑪撒考驗𪜶， 佇米利巴水泉及𪜶爭論。 |
| 33:9 | 𪜶忠誠遵行你的話，
堅守你的約， 超過看顧父母、 重視兄弟姊妹、 照顧子兒。 |
| 33:10 | 𪜶欲用你的規例教示雅各，
用你的律法教示以色列； 𪜶欲佇你的面前燒香敬拜， 佇祭壇獻歸隻牲生做燒化祭。 |
| 33:11 | 願上主賜福𪜶的產業，
接納𪜶的手所做的工作； 許個起來攻擊𪜶，怨恨𪜶的人， 願你拍斷𪜶的腰， 互𪜶𣍐當閣起來。 |
| 33:12 | 關係便雅憫，伊講：
願上主互伊所疼的佇伊的身邊安然徛起； 上主歸日保護𪜶， 互𪜶佇伊的胸前享受安歇。 |
| 33:13 | 關係約瑟，伊講：
願𪜶的土地得著上主賜福， 得著天頂的甘露， 地下的水泉； |
| 33:14 | 願𪜶對日頭得著豐收，
對月娘收成土產， |
| 33:15 | 對古早就有的山得著寶物，
對永遠徛在的山嶺得著寶貝； |
| 33:16 | 願𪜶得著土地及出產的寶物，
以及臨在佇莿的上主的恩惠。 願諸個攏賜互約瑟， 歸佇兄弟中受揀選做領袖的約瑟。 |
| 33:17 | 願伊親像頭上生的牛，
有大威嚴； 伊兩支角親像野牛的角， 將萬國觸到天邊海角； 此兩支角是以法蓮萬萬的精兵， 及瑪拿西千千的勇士。 |
| 33:18 | 關係西布倫，伊講：
願西布倫歡喜出外； 願以薩迦快樂𫢶厝內。 |
| 33:19 | 𪜶欲召集萬族來山裡，
佇遐獻公義的祭； 𪜶欲吸收海裡豐富的資源， 及藏佇沙裡的寶貝。 |
| 33:20 | 關係迦得，伊講：
著稱讚擴展迦得領土的上主！ 願迦得親像匿啲的獅母， 拆裂獵物的前腿及頭殼。 |
| 33:21 | 伊為家己選擇上好的土地，
是掌權者的份額； 伊及以色列的領袖做夥， 實行上主的公義， 執行上主為以色列所做的判斷。 |
| 33:22 | 關係但，伊講：
但是少壯的獅， 對巴珊跳出來。 |
| 33:23 | 關係拿弗他利，伊講：
拿弗他利，你得著充足的恩惠， 得著上主滿滿的賜福； 願你得著西旁及南旁的地。 |
| 33:24 | 關係亞設，伊講：
亞設是上主上祝福的子兒； 願伊得著兄弟的歡喜， 橄欖油淹伊的腳目。 |
| 33:25 | 你城門的閂是鐵的、銅的；
你會久長享受太平。 |
| 33:26 | 以色列啊，無一個會當及上帝比；
伊對天頂幫贊你， 伊坐雲顯出伊的榮光。 |
| 33:27 | 對古早就有的上帝是避難所，
伊的手永遠扶持你； 伊佇你的面前將對敵趕出去， 閣講：「給𪜶消滅！」 |
| 33:28 | 以色列通享受太平，
雅各的後代住佇出產五穀及新酒的地； 天嘛降落露水互伊。 |
| 33:29 | 以色列，你真有福氣！
你是上主拯救的子民， 有叨一個民族親像你？ 伊是保護你的盾牌， 是你得勝的刀劍； 你欲征服對敵， 欲踏𪜶的尻脊骿。 |