| 章節 | 現代台語漢字2021版經文 |
| 32:1 | 天啊，著俯耳孔，我欲講話；
地啊，著注意聽我所講的話。 |
| 32:2 | 我的教示欲親像雨水降落，
我的話欲親像露水滴落； 親像雨濛仔落佇幼幼的草， 親像及時的雨水落佇菜蔬。 |
| 32:3 | 我欲宣揚上主的名；
恁著尊咱的上帝做大。 |
| 32:4 | 上主是石磐，
伊的所做完全、公平； 伊是信實的上帝，攏無不義； 伊公義閣正直。 |
| 32:5 | 此個彎曲敗壞的世代，
𪜶背逆，𣍐堪得做伊的子。 |
| 32:6 | 愚戇無知的人民，
恁哪會按呢報答上主？ 伊豈毋是恁的老父，恁的創造主， 有建立恁的國家？ |
| 32:7 | 著會記得古早的日，
回想歷代的年； 問你的老父，伊會指示你； 問你的序大，𪜶會給你講。 |
| 32:8 | 至高者分土地互萬國做產業，
將世間人分開； 照以色列人的人數， 定萬族的境界。 |
| 32:9 | 上主的份額是伊的子民；
雅各是伊的產業。 |
| 32:10 | 上主佇曠野尋著伊，
佇拋荒野獸啲哮的地抵著伊； 上主攬伊，照顧伊， 保護伊親像保護目睭仁。 |
| 32:11 | 閣親像鷹鳥撈伊的巢，
搧翼教細隻鷹仔學飛； 搋開翼股承伊，載佇翼股頂。 |
| 32:12 | 只有上主引導伊的子民，
無其他神明的幫贊。 |
| 32:13 | 上主互𪜶統治地高的所在，
互𪜶食田野的土產， 對石縫𠲿蜜， 對石頭地得著橄欖油； |
| 32:14 | 閣食牛奶做的起司、羊奶、
羊仔子的油、 巴珊的綿羊、山羊， 及上好的小麥， 嘛飲葡萄酒。 |
| 32:15 | 以色列肥就聳勢；
你已經大箍閣粗魯，皮肉金滑， 就棄拺創造你的上帝， 看輕解救你的石磐。 |
| 32:16 | 𪜶用別個神明激伊怨妒，
拜可惡的偶像惹伊受氣。 |
| 32:17 | 𪜶祭拜鬼神，
諸個鬼神毋是上帝， 是𪜶毋識的神明， 是新的，近來才有的， 是恁的列祖無啲驚的。 |
| 32:18 | 生恁的石磐，恁無看重伊；
生恁的上帝，恁𣍐記得伊。 |
| 32:19 | 上主看見，就放拺𪜶，
因為伊的子查某子惹伊受氣。 |
| 32:20 | 伊就講：我無欲閣插𪜶，
欲看𪜶的結局按怎； 𪜶是詭詰的世代， 無忠實的子兒。 |
| 32:21 | 𪜶拜毋是上帝的神明，激我怨妒；
𪜶拜偶像，惹我受氣； 我就用毋成民族的人民，激𪜶怨妒， 用愚戇的國民，惹𪜶受氣。 |
| 32:22 | 我受氣的火啲𤏸，
𤏸到陰間極深的所在， 燒滅大地及一切的土產， 吞滅山的根基。 |
| 32:23 | 上主閣講：
我欲不斷用災禍攻擊𪜶， 用我箭袋內所有的箭射𪜶。 |
| 32:24 | 𪜶因為飢荒消瘦，
互炎熱及瘟疫吞滅， 互野獸咬著， 受毒蛇攻擊。 |
| 32:25 | 外面有刀劍，
內面有驚惶， 互少年人及在室女、 食奶的嬰仔及白頭毛的老人攏滅亡。 |
| 32:26 | 我原本欲徹底消滅𪜶，
互世間人𣍐記得𪜶的名。 |
| 32:27 | 毋拘，我驚𪜶的對敵自誇，
驚了𪜶誤會， 驚了𪜶會講： 「是阮拍敗以色列， 毋是上主的作為。」 |
| 32:28 | 𪜶是𣍐曉想的民族，
無一屑仔智識。 |
| 32:29 | 苦𣍐得𪜶有智慧，會明白此個事，
會曉想家己的結局。 |
| 32:30 | 若毋是𪜶的石磐給𪜶賣互人，
若毋是上主棄拺𪜶， 𪜶的對敵哪會一個拍敗𪜶一千個， 兩個互𪜶一萬個逃走？ |
| 32:31 | 𪜶的石磐無親像咱的石磐，
咱的對敵嘛按呢承認。 |
| 32:32 | 對敵的葡萄樹是所多瑪的種，
對蛾摩拉的園徙來的； 𪜶的葡萄是毒葡萄， 歸葩攏是苦的。 |
| 32:33 | 𪜶的酒是大尾蛇的毒，
是毒蛇致命的毒。 |
| 32:34 | 上主將對敵所做的歹，
攏封密佇伊的府庫。 |
| 32:35 | 申冤報應在佇上主，
時機一下到伊會給𪜶報應； 𪜶抵著災難的日近啦， 會真緊受刑罰。 |
| 32:36 | 上主欲為著伊的子民申冤，
欲憐憫伊的僕人， 因為伊看見𪜶氣力已經無去， 自由的及無自由的，連一個都無留啲。 |
| 32:37 | 伊欲講：𪜶的神明佇叨位？
𪜶倚靠的石磐佇叨位？ |
| 32:38 | 許個食𪜶獻祭的油，
飲𪜶奠酒祭的酒的神明， 今著起來幫贊𪜶，保護𪜶。 |
| 32:39 | 今，恁著知，只有我是上帝，
我以外無別個神明； 我互人死，嘛互人活； 我拍傷人，嘛醫治人； 無人會當對我的手頭解救𪜶。 |
| 32:40 | 我向天攑手，
用我永遠的活命立誓，講： |
| 32:41 | 我欲將我金鑠鑠的刀磨利，
執行審判， 報復我的對敵， 報應怨恨我的人。 |
| 32:42 | 我欲互我的箭飲血，
飲許個受刣受掠戰士的血； 我的刀欲食肉， 食對敵許個長頭毛的領袖的肉。 |
| 32:43 | 列國啊，著及上主的子民做夥歡呼；
上主欲為著伊的僕人所流的血申冤， 報復伊的對敵， 贖回伊的地及伊的子民。 |
| 32:44 | 摩西及嫩的子約書亞做夥來，將此首歌唸互會眾聽。 |
| 32:45 | 摩西的遺言 摩西將諸個話攏講互以色列眾人聽了後， |
| 32:46 | 閣對𪜶講：「我今仔日警戒恁的話，恁著會記得，嘛著吩咐恁的後代切實遵行此個律法一切的話； |
| 32:47 | 因為此個律法對恁毋是空空無路用，是恁的性命；此個律法會互恁佇過約旦河欲佔領的地久長徛起。」 |
| 32:48 | 彼日，上主吩咐摩西，講： |
| 32:49 | 「你著去耶利哥對面的摩押地，上去亞巴琳山區的尼波山，看我欲賞賜互以色列人做家業的迦南地。 |
| 32:50 | 你會死佇你上去的山，親像你的兄哥亞倫死佇何珥山，倒去恁的列祖遐。 |
| 32:51 | 因為恁兩個佇尋的曠野，加低斯的米利巴水泉，佇以色列人中間得罪我，無尊我做聖。 |
| 32:52 | 你通看對面彼個地，毋拘𣍐當入去我賞賜互以色列人的地。」 |