| 章節 | 現代台語漢字2021版經文 |
| 29:1 | 佇摩押重新立約 上主佇何烈山及以色列人立約以後，閣佇摩押地命令摩西及以色列人立約。下面是立約的內容。 |
| 29:2 | 摩西召以色列眾人來，對𪜶講：上主佇埃及地，對法老及伊的眾人臣，以及𪜶全國所做一切的事，恁攏親目看著， |
| 29:3 | 就是恁所看著的大災難、神跡，及大奇事。 |
| 29:4 | 毋拘到今仔日，上主猶未互恁會明白的心、會看見的目睭、會聽見的耳仔。 |
| 29:5 | 我導恁佇曠野四十年，恁的衫仔褲無破，鞋嘛無歹去； |
| 29:6 | 恁無餅通食，無薄酒、厚酒通飲，毋拘上主供給恁所需要的一切，互恁知伊就是上主 — 恁的上帝。 |
| 29:7 | 恁來到此所在，希實本王西宏、巴珊王噩出來及咱交戰； |
| 29:8 | 咱給𪜶拍敗，攻取𪜶的地，將彼個地分互呂便及迦得兩個支族，以及瑪拿西半支族做產業； |
| 29:9 | 所以恁著切實遵行此個約的話，通互恁事事亨通。 |
| 29:10 | 今仔日恁逐支族的族長、長老、官長、以色列的男婦老幼，以及住佇恁中間給恁破柴，汲水的外族人，攏徛佇上主 — 恁的上帝面前， |
| 29:11 | 併於上節 |
| 29:12 | 恁著接受上主 — 恁的上帝立誓及恁立的約， |
| 29:13 | 互伊照伊對恁的應允，嘛照伊對恁的列祖亞伯拉罕、以撒、雅各立誓的，今仔日設立恁做伊的子民，伊做恁的上帝。 |
| 29:14 | 上主毋是干焦及恁立誓立此個約， |
| 29:15 | 是及今仔日及咱做夥徛佇上主 — 咱的上帝面前的人，以及猶未出世的子子孫孫立約。 |
| 29:16 | 恁知，咱曾住佇埃及，嘛有對列國經過； |
| 29:17 | 恁閣有看著𪜶中間許個用柴、石、金、銀製造，通厭惡的偶像； |
| 29:18 | 著謹慎，恁今仔日徛佇遮的人，無論查甫人、查某人、家族、支族，毋通違背上主 — 咱的上帝，去服事許個民族的神明，親像對歹的根生出毒菜及苦草； |
| 29:19 | 此款人聽著諸個咒詛的話，心內猶久家己安慰，講：「我雖然固執做此款代誌，連累所有的人，我猶原有平安。」 |
| 29:20 | 上主𣍐赦免此款人；上主的大受氣會給伊燒滅，將記載佇此本冊的咒詛，攏降落佇伊身上；上主閣會對天下擦消伊的名； |
| 29:21 | 上主嘛會照此個律法的冊所記載的約內面的咒詛，對以色列眾支族的中間給伊分別出來，互伊受災禍。 |
| 29:22 | 以後，恁的子子孫孫及對真遠的所在來的外族人，看著上主互此個地抵著的災難及病症， |
| 29:23 | 就是此個地逐所在有硫磺，有鹽，互火燒過，𣍐當種作，無出產，𣍐發草，親像上主佇大受氣中毀壞所多瑪、蛾摩拉、押瑪、洗扁按呢； |
| 29:24 | 𪜶攏會問：「上主哪會對此個地按呢做？伊的受氣哪會赫猛烈？」 |
| 29:25 | 人會對𪜶講：「是因為此所在的人棄拺上主 — 𪜶列祖的上帝導𪜶出埃及的時及𪜶立的約； |
| 29:26 | 𪜶去拜𪜶毋識，嘛是上主禁止𪜶拜的神明； |
| 29:27 | 所以上主發大受氣，將此本冊所記載一切的咒詛，攏降落佇此個地。 |
| 29:28 | 上主非常受氣，佇大受氣中將𪜶對此個地拔出，給𪜶㧒佇外邦，到今仔日。」 |
| 29:29 | 有一寡代誌上主 — 咱的上帝無給咱啟示；毋拘伊有啟示此個律法，互咱及咱的子孫永遠遵行。 |