| 章節 | 現代台語漢字2021版經文 |
| 28:1 | 遵行誡命受祝福 ( 利 26:3-13 申 7:12-24 ) 恁若真正聽趁上主 — 恁的上帝的話，遵行我今仔日所命令恁伊一切的誡命，上主 — 恁的上帝欲互恁比天下萬國閣較強盛。 |
| 28:2 | 恁若聽趁上主 — 恁的上帝的話，諸個福氣就欲豐豐富富臨到恁： |
| 28:3 | 恁佇城鎮，佇鄉村，欲得著祝福。 |
| 28:4 | 恁生的兒女、土地出產的、牲生生的，以及牛仔子、羊仔子，攏欲得著祝福。 |
| 28:5 | 恁的籃仔及抄麵粉的盆，攏欲得著祝福。 |
| 28:6 | 恁出，恁入，攏欲得著祝福。 |
| 28:7 | 許個攻擊恁的對敵，上主欲互恁給𪜶拍敗；𪜶對一條路來攻擊，欲佇恁的面前對七條路逃走。 |
| 28:8 | 上主欲互恁的粟倉滿滿，事事亨通。上主 — 恁的上帝欲佇賞賜恁的地賜福恁。 |
| 28:9 | 恁若遵守上主 — 恁的上帝的誡命，行伊的道路，上主欲照伊對恁立誓的，設立恁做伊聖潔的子民； |
| 28:10 | 天下萬族看見恁屬佇上主，就會驚畏恁。 |
| 28:11 | 上主欲佇伊對恁列祖立誓賞賜恁的地，互恁所生的、牲生生的、土地出產的，充足有賰。 |
| 28:12 | 上主欲給恁開伊天頂的寶庫，照季節落雨互恁的土地，互恁事事亨通；恁欲借互真多國，毋拘毋免給人借。 |
| 28:13 | 恁若聽趁我今仔日所命令恁上主 — 恁的上帝的誡命，切實遵行，無偏左偏右，離開我所命令恁諸個話，去服事別個神明，上主就欲互恁佇列國中作頭，無受支配。 |
| 28:14 | 併於上節 |
| 28:15 | 違背誡命的後果 ( 利 26:14-46 ) 恁若無聽趁上主 — 恁的上帝的話，無切實遵行我今仔日所命令恁伊一切的誡命及規例，諸個咒詛就會真緊臨到恁： |
| 28:16 | 恁佇城鎮，佇鄉村，會受咒詛。 |
| 28:17 | 恁的籃仔及抄麵粉的盆，會受咒詛。 |
| 28:18 | 恁所生的、土地出產的，以及牛仔子、羊仔子，攏會受咒詛。 |
| 28:19 | 恁出，恁入，攏會受咒詛。 |
| 28:20 | 因為恁做歹棄拺我，上主欲互恁所做的事受咒詛、擾亂、責罰，直到恁真緊完全受毀滅。 |
| 28:21 | 上主欲互瘟疫苦楚恁，佇恁入去承接的地給恁消滅。 |
| 28:22 | 上主欲用肺癆、熱病、發炎、毒熱、曠旱、火燒風、病害攻擊恁；諸個攏會追趇恁，直到恁滅亡。 |
| 28:23 | 恁頭殼頂的天會變做銅𣍐落雨，腳下的地會變做鐵赫呢碇。 |
| 28:24 | 上主欲互土沙粉代替雨水，落佇恁身上，直到伊給恁消滅。 |
| 28:25 | 上主欲互恁佇對敵的面前刣輸；恁對一條路出去攻擊𪜶，會對七條路逃走；天下萬國看著恁的情形會著驚。 |
| 28:26 | 恁的身屍會成做空中飛鳥及地上走獸的食物，無人給𪜶趕走。 |
| 28:27 | 上主會互恁親像早前埃及人生瘡，閣生痔瘡、濕疹、癬，𣍐醫得。 |
| 28:28 | 上主會互恁掠狂、睛瞑、著驚。 |
| 28:29 | 恁佇日中晝，會親像失明的人佇烏暗中摸來摸去；恁做的事𣍐亨通，常常受壓迫，受搶奪，無人救恁。 |
| 28:30 | 恁及查某囝仔定婚，別人會及伊做夥睏；恁起厝，無通住；恁栽種葡萄園，嘛無通食許個果子。 |
| 28:31 | 恁的牛佇恁的面前互人刣死，毋拘恁食𣍐著肉；恁的驢佇恁的面前互人搶去，閣討𣍐轉來；恁的羊互人掠去，無人幫贊恁。 |
| 28:32 | 恁的子查某子會佇恁的面前互別族掠去；恁的目睭歸日金金看，等𪜶轉來，毋拘恁無能為力。 |
| 28:33 | 恁的土產，及恁勞苦得著的，會互恁毋識的民族食了了。恁會常常互人欺負，受壓制， |
| 28:34 | 直到恁因為抵著的景況掠狂。 |
| 28:35 | 上主會互恁對腳底、腳頭窩、腳腿，到頭殼頂，染著𣍐醫得的毒瘡。 |
| 28:36 | 上主會將恁及恁所設立管轄恁的王，遷徙去恁及恁的列祖毋識的國家；佇遐恁欲服事別個神明，是用柴及石頭造的。 |
| 28:37 | 恁佇上主趕恁去的列國中，人會將恁當做笑談，給恁恥笑，閣因為恁抵著的情形著驚。 |
| 28:38 | 恁佇園裡撒真多種籽，毋拘收成真少，因為草蜢來食。 |
| 28:39 | 恁栽種閣修整葡萄園，毋拘無酒通飲，無果子通挽，因為蟲來食。 |
| 28:40 | 恁全國種橄欖樹，毋拘無油通抹身軀，因為橄欖落了了。 |
| 28:41 | 恁的子查某子𣍐當留佇身軀邊，因為𪜶會互人掠去。 |
| 28:42 | 恁的樹木及土地的出產，會互草蜢食了了。 |
| 28:43 | 住佇恁中間的外族人會愈來愈尊貴，恁會愈來愈卑微； |
| 28:44 | 𪜶有通借恁，恁無通借𪜶；𪜶會作頭管恁，恁會作尾。 |
| 28:45 | 諸個咒詛攏會臨到恁，追趇恁，給恁掠牢牢，直到恁滅亡，因為恁無聽趁上主 — 恁的上帝的話，無守伊所命令恁的誡命及規例。 |
| 28:46 | 諸個咒詛會臨到恁及恁的後代，永遠成做記號及警戒。 |
| 28:47 | 恁無佇逐項富裕的時，甘心樂意服事上主 — 恁的上帝， |
| 28:48 | 所以恁會做上主差來攻擊恁的對敵的奴隸，致到枵餓、嘴焦、褪裼、一無所有。𪜶會用鐵的軛掛佇恁的頷頸，直到恁滅亡。 |
| 28:49 | 上主欲對真遠的所在興起一國，親像鷹鳥真緊衝落來攻擊恁；彼國的話恁聽無， |
| 28:50 | 𪜶的人面雄介介，𣍐尊敬老人，𣍐疼惜囝仔； |
| 28:51 | 𪜶會吞食恁的牲生所生的，及恁的土地出產的，直到恁滅亡；閣將恁的五穀、新酒、新油、牛仔子及羊仔子，食甲無賰半項，直到恁餓死。 |
| 28:52 | 𪜶欲佇全國逐個城圍困恁，直到恁所倚靠高大閣堅固的城牆攏倒壞。𪜶欲將恁圍困佇上主 — 恁的上帝所賞賜恁全國逐個城。 |
| 28:53 | 恁佇窘迫困苦的中間，欲食家己的親生子，就是上主 — 恁的上帝賞賜恁的後生查某子的肉。 |
| 28:54 | 恁中間溫和，有同情心的人，會冷淡對待伊的兄弟、伊所疼的某，及賰落來的囝仔， |
| 28:55 | 無欲將家己所食親生子的肉，分一點仔互𪜶；因為恁佇逐個城受對敵圍困，受窘迫，攏無賰半項。 |
| 28:56 | 恁中間溫和，有同情心，平時毋敢褪赤腳踏土的婦仁人，會冷淡對待伊所疼的丈夫，及伊的後生查某子； |
| 28:57 | 偷偷仔食伊生落來的胎盤，甚至食家己生的兒女，因為恁佇逐個城受對敵圍困，受窘迫，攏無賰半項。 |
| 28:58 | 恁若無切實遵行此本冊所記載律法的話，無敬畏上主 — 恁的上帝榮光通驚畏的名， |
| 28:59 | 上主就會用恁想𣍐到的災禍，就是大閣久長的災難、嚴重閣長期的病，降落互恁及恁的後代。 |
| 28:60 | 伊嘛會互恁所驚埃及人的病攏臨到恁，給恁纏啲，永遠醫𣍐好； |
| 28:61 | 連此本律法的冊無記載的病及災禍，上主嘛會互𪜶臨到恁，直到恁滅亡。 |
| 28:62 | 恁以前雖然親像天頂的星赫呢多，毋拘恁無聽趁上主 — 恁的上帝的話，所以恁賰落來的人口大大減少。 |
| 28:63 | 以前上主意愛好款待恁，互恁人口加添，毋拘以後上主意愛給恁毀壞，給恁消滅；恁嘛會對入去承接的地受拔出。 |
| 28:64 | 上主會互恁四散佇萬國中，對地的此旁到地的彼旁；恁會佇遐服事別個神明，是用柴用石雕刻，恁及恁的列祖毋識的神明。 |
| 28:65 | 佇許個國，恁𣍐當有安定的生活，無定居的所在；上主嘛欲互恁佇遐心神不安，目神無青彩，精神衰敗； |
| 28:66 | 恁的性命無安全，暝日提心吊膽，性命難保。 |
| 28:67 | 恁會因為心內的驚惶，及目睭看著的，早起時欲講：「天哪猶未暗！」暗時欲講：「天哪猶未光！」 |
| 28:68 | 上主會互恁坐船倒去埃及，行彼條我曾吩咐恁毋通閣倒去的路；佇遐，恁會賣家己互對敵做奴僕女婢，毋拘無人欲買。 |