| 章節 | 現代台語漢字2021版經文 |
| 25:1 | 人若有爭執，提出訴訟，審判官著定正直的做無罪，定作歹的做有罪； |
| 25:2 | 有罪的人若應該受拍，著互彼個人佇審判官的面前仆佇土腳，照伊犯罪的程度給伊拍； |
| 25:3 | 毋拘上多通拍四十下，毋通拍過頭；若超過四十下，就是侮辱此個兄弟。 |
| 25:4 | 牛啲碖五穀，毋通給伊掛嘴籠。 |
| 25:5 | 為過身的兄弟傳宗接代 兄弟住做夥，若其中一個無子就死，過身的人的某毋通嫁外人，伊丈夫的兄弟著娶伊作某，及伊同房，盡兄弟的本分。 |
| 25:6 | 伊生的大子，著續接伊死去的丈夫的名份，才免彼個丈夫的名佇以色列中受除去。 |
| 25:7 | 彼個人若無欲娶伊死去的兄弟的某，彼個婦仁人就著去廣場的長老遐，對𪜶講：「我丈夫的兄弟毋肯佇以色列中給伊死去的兄弟留後嗣，無欲盡兄弟的本分。」 |
| 25:8 | 佇廣場的長老著叫彼個人來，給伊苦勸；伊若堅持無欲給娶， |
| 25:9 | 彼個婦仁人著佇長老的面前行倚伊，給褪鞋，閣呸嘴涎佇伊的面，講：「所有無欲為著兄弟留後嗣的人，著按呢給侮辱。」 |
| 25:10 | 佇以色列人的中間，彼個人的家庭欲叫做「互人褪鞋的家」。 |
| 25:11 | 其他的條例 若有兩個人相拍，其中一個人的某倚來救伊的丈夫，伸手掠牢另外彼個人的下體， |
| 25:12 | 就著斬斷彼個婦仁人的手，毋通可憐伊。 |
| 25:13 | 恁的袋仔內毋通有大粒及細粒的兩款秤錘； |
| 25:14 | 厝內嘛毋通有大及細的兩款斗。 |
| 25:15 | 著用準確公道的秤錘及斗，通互恁佇上主 — 恁的上帝賞賜恁的地食長歲壽； |
| 25:16 | 所有做無公道的代誌的人，攏是上主 — 恁的上帝所厭惡。 |
| 25:17 | 著消滅亞瑪力人 著會記得恁出埃及的時，亞瑪力人佇路裡按怎對待恁。 |
| 25:18 | 𪜶佇路裡攻擊恁；當等恁厭倦無力的時，攻擊恁後面軟弱的人；𪜶攏無啲驚上帝。 |
| 25:19 | 所以，到上主 — 恁的上帝救恁脫離四圍的對敵，互恁佔領伊賞賜恁的地，享受太平，彼時，恁著將亞瑪力的名，對天下擦消。毋通𣍐記得！ |