| 章節 | 現代台語漢字2021版經文 |
| 22:1 | 亞伯拉罕獻以撒 諸個代誌了後，上帝考驗亞伯拉罕，叫伊講：「亞伯拉罕。」伊應講：「我佇遮。」 |
| 22:2 | 上帝講：「你導你獨一的子，你所疼的以撒，去摩利亞地區，佇我欲指示你的一座山將伊獻做燒化祭。」 |
| 22:3 | 隔日透早，亞伯拉罕給驢仔縛鞍，導兩個僕人及伊的子以撒，給燒化祭欲用的柴破好勢，出發去上帝指示伊的所在。 |
| 22:4 | 到第三日，亞伯拉罕攑頭看著遠遠彼個所在。 |
| 22:5 | 亞伯拉罕對伊的僕人講：「恁及驢仔𫢶遮聽候，我及我的子去遐敬拜，後來會轉來恁遮。」 |
| 22:6 | 亞伯拉罕將燒化祭的柴互伊的子以撒揹，家己手提刀及火種；然後兩個人做夥去。 |
| 22:7 | 以撒給伊的老父亞伯拉罕講：「阿爸。」 伊講：「我的子，我佇遮。」 以撒講：「火種及柴咱攏有，毋拘獻燒化祭的羊仔佇叨位？」 |
| 22:8 | 亞伯拉罕講：「我的子，上帝會家己準備燒化祭的羊仔。」兩個人就閣做夥行。 |
| 22:9 | 𪜶到上帝指示伊的所在。亞伯拉罕佇遐起祭壇，將柴排佇祭壇頂。伊給伊的子以撒縛啲，下佇祭壇許個柴的頂面。 |
| 22:10 | 亞伯拉罕就給刀攑起來，欲刣伊的子。 |
| 22:11 | 上主的使者對天頂叫伊講：「亞伯拉罕！亞伯拉罕！」 伊應講：「我佇遮。」 |
| 22:12 | 使者講：「毋通下手，毋通傷害此個囝仔。今我知你敬畏上帝，𣍐將你獨一的子留啲，毋互我。」 |
| 22:13 | 亞伯拉罕攑頭看，看著後面有一隻羊，角纏佇歸部的樹仔。亞伯拉罕就去給彼隻羊掠來，代替伊的子獻做燒化祭。 |
| 22:14 | 亞伯拉罕給彼個所在號名做「上主以勒」；到今仔日人猶啲講：「佇上主的山伊會看顧。」 |
| 22:15 | 上主的使者第二遍對天頂叫亞伯拉罕，講： |
| 22:16 | 「上主講：『你已經做此個代誌，無留你獨一的子毋互我，所以我立誓， |
| 22:17 | 我一定欲加倍賜福你，互你的子孫人額加添真多，親像天頂的星、海邊的沙；你的後代欲佔領對敵的城。 |
| 22:18 | 地上萬國欲對你的後代得著福氣，因為你聽趁我的話。』」 |
| 22:19 | 亞伯拉罕倒來伊的僕人遐，𪜶就做夥出發去別是巴。亞伯拉罕就住佇別是巴。 |
| 22:20 | 拿鶴的後代 諸個代誌了後，有人給亞伯拉罕講：「蜜迦給你的小弟拿鶴生子： |
| 22:21 | 大子烏斯、第二子布斯、亞蘭的老父基慕利、 |
| 22:22 | 基薛、哈瑣、必達、益拉、 |
| 22:23 | 及麗百加的老父彼土利；此八個攏是蜜迦給亞伯拉罕的小弟拿鶴生的。 |
| 22:24 | 拿鶴的細姨流瑪生提八、迦含、他轄，及瑪迦。」 |