| 章節 | 現代台語漢字2021版經文 |
| 19:1 | 設立避難城 ( 民 35:9-28 書 20:1-9 ) 上主 — 恁的上帝消滅許個國，將𪜶的地賞賜恁，互恁徛起佇𪜶的城及𪜶的厝以後， |
| 19:2 | 恁著將上主 — 恁的上帝賞賜恁做產業的地，分做三區，每一區設一個城，閣開路迵到遐，互刣死人的攏通走去遐。 |
| 19:3 | 併於上節 |
| 19:4 | 若有人無意中刣死及伊過去無冤仇的人，伊通走去避難城保全性命。 |
| 19:5 | 譬喻講，人及伊的厝邊去樹林剉柴；手攑斧頭一下剉，斧頭肉黜去，傷著厝邊，厝邊煞死去，此個人著走去任何一座避難城，通保全性命； |
| 19:6 | 才免因為路真遠，報冤仇的心火𤏸，趇著彼個刣人的人給伊刣死；其實伊毋應該死，因為伊及彼個受誤殺的人無冤仇。 |
| 19:7 | 所以我命令恁，著設立三座避難城。 |
| 19:8 | 上主 — 恁的上帝若照伊對恁的列祖所立誓的，互恁的土地擴展，將應允欲賞賜恁列祖的全地互恁， |
| 19:9 | 恁若遵行我今仔日所命令恁一切的誡命，疼上主 — 恁的上帝，常常行伊的道路，此三座城以外，著閣設立三座城； |
| 19:10 | 才免無辜的人的血流佇上主 — 恁的上帝賞賜恁做產業的地，致到恁著承擔無辜的人受刣死的罪。 |
| 19:11 | 若有人怨恨厝邊，埋伏攻擊伊，給伊刣死，後來走去避難城； |
| 19:12 | 彼個人本城的長老著派人對遐給伊掠出來，交互報冤仇的人，給伊處死。 |
| 19:13 | 恁毋通可憐伊；著對以色列中除去殺害無辜的人的罪，互恁事事順利。 |
| 19:14 | 佇上主 — 恁的上帝賞賜恁做產業的土地，恁毋通移徙厝邊的界址；彼個是以前的人所定的。 |
| 19:15 | 證人的條例 若有人做什麼毋著，犯什麼罪，毋通干焦聽一個人的證詞，著有兩個抑是三個證人，才通給伊定罪。 |
| 19:16 | 若有人惡意作偽證，控告某人背叛上主， |
| 19:17 | 此兩個人著去上主所揀選敬拜伊的所在，徛佇值班的祭司及審判官的面前； |
| 19:18 | 審判官著詳細查問。若發見證人作偽證，欲害伊的同胞， |
| 19:19 | 恁著照伊想欲對付伊的同胞按呢給伊處罰；按呢恁就對恁中間除去此款邪惡的事。 |
| 19:20 | 其他的人聽著就會驚，無人敢閣做此款可惡的事。 |
| 19:21 | 恁毋通可憐伊；著用命賠命，目睭賠目睭，嘴齒賠嘴齒，手賠手，腳賠腳。 |