| 章節 | 現代台語漢字2021版經文 |
| 16:1 | 𨃟過節的條例 ( 出 12:1-20 利 23:5-8 民 28:16-25 ) 恁著佇亞筆月守上主 — 恁的上帝的𨃟過節；因為上主 — 恁的上帝佇亞筆月的一個暗暝導恁出埃及。 |
| 16:2 | 著佇上主揀選互恁服事伊的所在，向上主 — 恁的上帝獻牛及羊做𨃟過節的祭物。 |
| 16:3 | 𨃟過節的食物毋通有酵。恁著食無酵的餅七日，因為恁離開埃及地的時真趕緊，食的是無酵的餅。此種餅嘛叫做困苦的餅，恁著食，互恁一生記念出埃及，脫離苦難的日。 |
| 16:4 | 佇恁的境內，七日久逐個人的厝攏毋通有酵；頭一日下昏所獻的祭肉，毋通留到天光。 |
| 16:5 | 恁毋通佇上主 — 恁的上帝賞賜恁任何一個城獻𨃟過節的祭， |
| 16:6 | 只有通佇上主 — 恁的上帝揀選互恁服事伊的所在獻；著佇日落的時獻，因為恁佇日落的時出埃及。 |
| 16:7 | 著佇上主 — 恁的上帝揀選的所在烘來食；隔早起才倒去恁兜。 |
| 16:8 | 恁著食無酵餅六日；第七日舉行嚴肅會敬拜上主 — 恁的上帝，毋通做工。 |
| 16:9 | 七七收割節的條例 ( 出 34:22 利 23:15-22 民 28:26-31 ) 恁著對用鐮𠠝仔收割的日開始，算七個七日， |
| 16:10 | 守七七收割節敬拜上主 — 恁的上帝，照伊賜福互恁的收成，甘心獻禮物互伊。 |
| 16:11 | 恁及恁的子、查某子、奴僕、女婢，及住佇恁中間的利未人，及外族人，以及孤兒、寡婦，攏著佇上主 — 恁的上帝揀選互恁服事伊的所在，佇伊的面前做夥慶祝。 |
| 16:12 | 恁著會記得恁曾佇埃及做奴才；恁著遵行諸個規例。 |
| 16:13 | 搭寮節的條例 ( 利 23:33-43 民 29:12-39 ) 恁收囥五穀及新酒了後，著守搭寮節七日。 |
| 16:14 | 佇節期中，恁及恁的子、查某子、奴僕、女婢，及住佇恁中間的利未人、外族人，以及孤兒、寡婦，攏著做夥慶祝。 |
| 16:15 | 恁著佇上主揀選的所在，守節七日敬拜伊。著歡喜守節，因為上主 — 恁的上帝有賜福恁，互恁豐收，事事順利。 |
| 16:16 | 恁所有的查甫人攏著一年三遍，佇除酵節、七七收割節、搭寮節，到上主 — 恁的上帝揀選的所在敬拜伊；毋通空手見上主。 |
| 16:17 | 逐個人著照上主 — 恁的上帝賞賜恁的福分，盡家己的氣力奉獻。 |
| 16:18 | 任命審判官及官員的條例 恁著佇上主 — 恁的上帝賞賜恁徛起的城，為著逐支族任命審判官及官員；𪜶著照公義審判人民。 |
| 16:19 | 恁審判毋通顛倒是非，毋通偏袒，嘛毋通接受賄賂；因為賄賂會互智慧的人變做睛瞑，閣會歪曲正直的人的證詞。 |
| 16:20 | 恁著追求公平正義，互恁佇上主 — 恁的上帝賞賜恁做產業的地久長徛起。 |
| 16:21 | 恁為上主 — 恁的上帝起祭壇，毋通佇邊仔𫞼亞舍拉女神的柱像； |
| 16:22 | 嘛毋通𫞼石柱像；諸個攏是上主 — 恁的上帝痛恨厭惡的。 |