| 章節 | 現代台語漢字2021版經文 |
| 15:1 | 安歇年的規例 逐遍滿七年，恁著免除一切的債務。 |
| 15:2 | 下面是免除債務的規例：債主借互厝邊的，著免除𪜶的債務；毋通對恁的厝邊，就是恁的同胞，討𪜶欠恁的；因為上主已經宣布債務免除。 |
| 15:3 | 外族人恁通給𪜶討；毋拘恁借互同胞的，著給𪜶免除。 |
| 15:4 | 恁若真正聽趁上主 — 恁的上帝的話，遵行我今仔日所命令恁一切的誡命，恁就𣍐有散赤人；因為上主 — 恁的上帝會佇伊賞賜恁做產業的地大大賜福恁。 |
| 15:5 | 併於上節 |
| 15:6 | 上主 — 恁的上帝會照伊的應允賜福恁；恁會借互真多國，毋免給𪜶借；恁會管轄真多國，𪜶𣍐給恁管轄。 |
| 15:7 | 佇上主 — 恁的上帝賞賜恁的地，無論叨一個城，若有散赤的同胞，恁毋通硬心，手勼起來無欲幫贊伊； |
| 15:8 | 恁一定著伸手幫贊伊，照伊的需要借伊，補伊的欠缺。 |
| 15:9 | 著謹慎，才免恁心內有歹念頭，講「第七年，免除債務的年啲欲到啦」，就對恁散赤的同胞凍霜，毋互伊；伊若為著恁的緣故求叫上主，恁就有罪。 |
| 15:10 | 恁一定著互伊，互伊的時著甘心，因為對此個事，上主 — 恁的上帝會佇恁一切的工作及恁的所做賜福恁。 |
| 15:11 | 佇彼個所在，常常會有散赤人，所以我命令恁，佇恁徛起的地，一定著伸手幫贊恁散赤困苦的同胞。 |
| 15:12 | 對待奴隸的規例 ( 出 21:1-11 ) 你的以色列同胞無論男女，賣互你做奴隸，服事你六年，到第七年，你著給伊解放互伊自由離開。 |
| 15:13 | 你解放伊的時，毋通互伊空手離開； |
| 15:14 | 著對上主 — 你的上帝賞賜你的羊、五穀、酒提一部份，互伊雙手滿滿出去。 |
| 15:15 | 著會記得恁曾佇埃及地做奴才，上主 — 恁的上帝有救贖恁，所以，我今仔日將此個事命令恁。 |
| 15:16 | 你的奴隸若對你講「我無欲離開你」，因為伊疼你及你的家，閣真愛及你做夥住； |
| 15:17 | 你著互伊倚門扇，用鑽仔給伊的耳仔鑽孔，伊就永遠做你的奴隸。你嘛著按呢對待你的女婢。 |
| 15:18 | 你給伊解放互伊自由離開的時，毋通毋甘願，因為伊服事你六年，伊所做的工是倩來的工人的重倍；上主 — 恁的上帝會佇你所做一切的事，賜福你。 |
| 15:19 | 頭上生牛羊的規例 所有頭上生公的牛羊，著分別作聖歸上主 — 恁的上帝；頭上生的牛毋通作工，頭上生的羊毋通給剪毛。 |
| 15:20 | 恁及恁的家眷，逐年著佇上主 — 恁的上帝揀選的所在，佇伊的面前食諸個牛羊的肉。 |
| 15:21 | 若有破相，無論是腳跛、失明，抑是有什麼嚴重的瑕疵，攏毋通做祭物獻互上主 — 恁的上帝。 |
| 15:22 | 此款牛羊的肉，恁通佇恁住的所在食，無論禮儀上清氣抑是無清氣的人攏通食，親像啲食羚羊及鹿。 |
| 15:23 | 毋拘血毋通食，著摒佇土腳，親像啲摒水。 |