| 章節 | 現代台語漢字2021版經文 |
| 13:1 | 恁中間若有先知抑是作夢的出現，行神跡奇事互恁看， |
| 13:2 | 對恁講：「咱來去敬拜服事恁毋識的神明。」雖然𪜶所行的神跡奇事有實現， |
| 13:3 | 恁嘛毋通聽趁彼個先知抑是作夢的的話；因為上主 — 恁的上帝啲考驗恁，愛知恁是毋是全心全情疼伊。 |
| 13:4 | 恁著順趁上主 — 恁的上帝，敬畏伊，遵守伊的誡命，聽趁伊的話，服事伊，忠誠跟隨伊。 |
| 13:5 | 彼個先知抑是作夢的著給伊處死，因為伊引誘恁背叛導恁出埃及，救贖恁脫離做奴才的家的上主 — 恁的上帝，互恁偏離伊命令恁著行的道路；按呢，就對恁中間除去彼個邪惡的事。 |
| 13:6 | 恁仝母的兄弟，抑是恁的子、查某子、恁所疼的某、親密的朋友，若有人暗中引誘恁，講：「咱來去拜別個神明。」許個神明是恁及恁的列祖毋識的， |
| 13:7 | 是四圍的民族，不管離開恁遠抑是近，抑是佇此個地任何所在啲拜的。 |
| 13:8 | 恁毋通聽趁伊，毋通同情，毋通惜伊，嘛毋通掩護伊。 |
| 13:9 | 恁一定著給伊處死；恁著先下手，然後眾人下手互伊死。 |
| 13:10 | 恁著用石頭給抌死，因為伊想欲引誘恁偏離導恁出埃及，脫離做奴才的家的上主 — 恁的上帝。 |
| 13:11 | 按呢，以色列眾人聽著，就會驚，無人敢閣做此款可惡的事。 |
| 13:12 | 佇上主 — 恁的上帝賞賜恁徛起的城，恁若聽見 |
| 13:13 | 有歹人出來引誘城內的人，講：「咱來去服事別個神明。」諸個神明是恁毋識的； |
| 13:14 | 恁就著探聽，調查，詳細查問；恁中間若真正有此款可惡的事， |
| 13:15 | 恁一定著用刀刣死城內的住民，及城內所有的，以及𪜶的牲生。 |
| 13:16 | 恁著將彼個城的財物疊佇廣場，用火燒城及攏總的財物，歸互上主 — 恁的上帝，互彼個城永遠荒廢，𣍐用得重建。 |
| 13:17 | 所有應該毀滅的物，連一項都毋通提，按呢上主就會回心轉意，無發大受氣，顛倒施恩互恁，憐憫恁，照伊對恁的列祖所立誓的，互恁人額加添； |
| 13:18 | 因為恁聽趁上主 — 恁的上帝的話，遵守我今仔日所命令恁伊一切的誡命，做上主 — 恁的上帝看做著的事。 |