| 章節 | 現代台語漢字2021版經文 |
| 31:1 | 刣贏米甸人 上主對摩西講： |
| 31:2 | 「你著去攻打米甸人，替以色列人報仇；後來你會倒去你的列祖遐。」 |
| 31:3 | 摩西就命令以色列人，講：「恁著派人帶軍器去攻打米甸人，為上主報仇。 |
| 31:4 | 恁逐支族著派一千人出去交戰。」 |
| 31:5 | 以色列逐支族就選一千人，共一萬兩千人，帶軍器欲去交戰。 |
| 31:6 | 摩西派祭司以利亞撒的子非尼哈帶聖所的器具及喇叭，導諸個以色列人出去交戰。 |
| 31:7 | 𪜶照上主對摩西的命令，去及米甸人交戰，將米甸的查甫人全部刣死， |
| 31:8 | 包括以未、利金、蘇珥、戶珥、利巴此五個米甸人的王，嘛刣死比珥的子巴蘭。 |
| 31:9 | 以色列人掠米甸的婦女及囝仔，搶𪜶所有的牲生、牛羊，及財物， |
| 31:10 | 放火燒𪜶徛起的城鎮及營地。 |
| 31:11 | 以色列人將𪜶掠著的人、搶來的牲生，及所有的戰利品， |
| 31:12 | 帶來約旦河邊，耶利哥對岸的摩押平原的營地，交互摩西、祭司以利亞撒，及以色列會眾。 |
| 31:13 | 部隊轉來 摩西及祭司以利亞撒，以及會眾所有的首領攏去營外迎接以色列的部隊。 |
| 31:14 | 摩西對交戰轉來的軍官，就是許個導一千個人及一百個人的軍官，發受氣， |
| 31:15 | 給𪜶講：「恁欲互諸個查某人活啲是無？ |
| 31:16 | 恁豈𣍐記得，就是諸個查某人照巴蘭的計謀，佇比珥引誘以色列人背叛上主，互瘟疫臨到上主的會眾？ |
| 31:17 | 現在，恁著給所有的查甫囝仔，以及許個曾及查甫人有性關係的查某人攏刣死。 |
| 31:18 | 許個毋曾及查甫人有性關係的查某囝仔，恁會用得為家己留𪜶的性命。 |
| 31:19 | 恁及許個俘虜著留佇營外七日。若有人刣死人，抑是摸著屍體，著佇第三日及第七日潔淨家己；許個俘虜嘛著按呢做。 |
| 31:20 | 恁閣著潔淨逐領衫，以及所有用皮、山羊毛、柴做的物件。」 |
| 31:21 | 祭司以利亞撒對交戰倒來的軍兵講：「上主命令摩西的律法，有一個條例按呢講： |
| 31:22 | 會堪得火燒的物件，親像金、銀、銅、鐵、錫、鉛，著用火給𪜶燒，然後閣用潔淨的水洗，互𪜶清氣。其他𣍐堪得火燒的物件，著用水潔淨。 |
| 31:23 | 併於上節 |
| 31:24 | 第七日，著洗恁的衫，恁才清氣，通入營地。」 |
| 31:25 | 分戰利品 上主對摩西講： |
| 31:26 | 「你及祭司以利亞撒，以及會眾的領袖，著計算掠來的俘虜及搶來的牲生的總數。 |
| 31:27 | 給掠來的分做兩份，一半互出去交戰的勇士，一半互會眾。 |
| 31:28 | 閣對欲分互軍兵的俘虜、牛、驢、羊的中間，每五百抽一獻互上主； |
| 31:29 | 將諸個交互祭司以利亞撒，做特別的禮物獻互上主。 |
| 31:30 | 閣著對欲分互以色列人彼一半的俘虜、牛、驢、羊，五十抽一交互負責顧守上主會幕的利未人。」 |
| 31:31 | 摩西及祭司以利亞撒就照上主對摩西的命令做。 |
| 31:32 | 軍兵家己留落來的戰利品以外，有羊六十七萬五千隻、 |
| 31:33 | 牛七萬兩千隻、 |
| 31:34 | 驢六萬一千隻， |
| 31:35 | 毋曾及查甫人有性關係的女子三萬兩千人。 |
| 31:36 | 出去交戰許個軍兵得著彼一半，共有羊三十三萬七千五百隻， |
| 31:37 | 對彼中間取來獻互上主的，六百七十五隻； |
| 31:38 | 牛有三萬六千隻，其中獻互上主的，七十二隻； |
| 31:39 | 驢有三萬空五百隻，其中獻互上主的六十一隻； |
| 31:40 | 人有一萬六千個，對彼中間取來獻互上主的三十二人。 |
| 31:41 | 摩西照上主對伊的命令，將諸個交互祭司以利亞撒，做特別的禮物獻互上主。 |
| 31:42 | 摩西將許個軍兵搶來的戰利品分互以色列人的彼一半， |
| 31:43 | 有羊三十三萬七千五百隻、 |
| 31:44 | 牛三萬六千隻、 |
| 31:45 | 驢三萬空五百隻， |
| 31:46 | 及人一萬六千個。 |
| 31:47 | 無論人抑是牲生，摩西攏照上主對伊的命令，五十抽一，交互負責顧守上主會幕的利未人。 |
| 31:48 | 導一千個及導一百個軍兵的官長來見摩西， |
| 31:49 | 對伊講：「你的僕人已經點算諸個軍兵的總數，連一個都無戰死。 |
| 31:50 | 今，阮將逐個人得著的金器，親像腳鍊仔、手環、拍做印仔的手指、耳鉤、袚鍊，攏帶來獻互上主，通為阮家己贖罪。」 |
| 31:51 | 摩西及祭司以利亞撒就接受𪜶拍做逐款裝飾品的金仔。 |
| 31:52 | 諸個官長獻互上主做特別禮物的金仔，總共大約有兩百公斤。 |
| 31:53 | 逐個軍兵搶著的戰利品，攏歸互𪜶家己。 |
| 31:54 | 摩西及祭司以利亞撒將諸個官長奉獻的金仔帶入會幕，互上主不時會記得以色列人。 |