| 章節 | 現代台語漢字2021版經文 |
| 30:1 | 下願的條例 摩西吩咐以色列逐個支族的族長，講：「諸個是上主的命令： |
| 30:2 | 人若對上主下願，抑是咒誓，著約束家己，毋通失信，著照伊所講的去做。 |
| 30:3 | 「猶住佇老父的厝的少女，若對上主下願欲約束家己， |
| 30:4 | 伊的老父聽著伊下的願及約束家己的話，若無表示反對，伊下的願及約束家己的話就成立。 |
| 30:5 | 伊的老父聽著彼日，若無允准，伊下的願及約束家己的話就無成立；上主會赦免伊，因為伊的老父無允准。 |
| 30:6 | 「少女出嫁，若已經有下願，抑是一時衝動講出約束家己的話， |
| 30:7 | 伊的丈夫聽著的時，若無表示反對，伊下的願及約束家己的話就成立。 |
| 30:8 | 伊的丈夫聽著的時，若無同意，就廢除伊下的願及伊一時衝動所講出約束家己的話；上主嘛會赦免伊。 |
| 30:9 | 「寡婦抑是離婚的婦仁人所下的願及約束家己的話，攏成立。 |
| 30:10 | 「婦仁人佇丈夫的厝下願，抑是咒誓欲約束家己， |
| 30:11 | 丈夫聽著，若恬恬無講話，無反對，伊下的願及約束家己的話就成立。 |
| 30:12 | 毋拘，丈夫聽著的時，若給伊下的願及約束家己的話廢除，伊講出的話就無效，因為伊的丈夫反對；上主嘛會赦免伊。 |
| 30:13 | 伊若下願抑是咒誓欲刻苦家己，伊的丈夫有權同意抑是廢除。 |
| 30:14 | 伊的丈夫聽著了後，幾日久無表示反對，伊下的願及約束家己的話就成立，因為伊的丈夫佇聽著的時恬恬無講話。 |
| 30:15 | 後來，伊的丈夫若給伊下的願廢除，就著擔當婦仁人無照約束的罪。」 |
| 30:16 | 以上諸個是上主吩咐摩西關係丈夫及伊的某、老父及住佇伊厝裡的少女中間所定的規例。 |