| 章節 | 現代台語漢字2021版經文 |
| 25:1 | 佇比珥拜巴力 以色列人佇什亭紮營的時，人民及摩押的女子行淫。 |
| 25:2 | 摩押的女子獻祭互𪜶的神明的時，請以色列人來參加，食𪜶的祭物，跪拜𪜶的神明。 |
| 25:3 | 以色列人拜比珥的神明巴力；上主就對以色列人發受氣。 |
| 25:4 | 上主對摩西講：「將人民所有的族長，當頭白日佇我的面前給𪜶吊死，互我無閣對以色列人發受氣。」 |
| 25:5 | 摩西就對以色列人的審判官講：「恁的親族若有人拜比珥的巴力，著攏給𪜶刣死。」 |
| 25:6 | 摩西及以色列會眾抵仔佇會幕門口啲哭的時，忽然有一個以色列人，佇𪜶的目睭前導一個米甸的女子入去伊的布棚。 |
| 25:7 | 祭司亞倫的孫，以利亞撒的子非尼哈看著，就起來，離開會眾，攑槍， |
| 25:8 | 隨彼個以色列人入布棚，鑿迵過彼兩個人的腹肚；按呢，攻擊以色列人的瘟疫就停止。 |
| 25:9 | 彼時，因為瘟疫死的有兩萬四千人。 |
| 25:10 | 上主命令摩西講： |
| 25:11 | 「祭司亞倫的孫，以利亞撒的子非尼哈互我無閣對以色列人發受氣，因為伊有體會我要求全情服事我的心，互我無給𪜶消滅。 |
| 25:12 | 所以你著宣布：我欲及伊立平安的約， |
| 25:13 | 互伊及伊的後代永遠做祭司，因為伊無容允有任何神明及我比並，閣為著以色列人贖罪。」 |
| 25:14 | 彼個及米甸的女子做夥受刣死的以色列人叫做心利，是西緬支族一個宗族的族長撒路的子。 |
| 25:15 | 彼個互人刣死的米甸女子叫做哥斯比，是米甸人一個宗族的首領蘇珥的查某子。 |
| 25:16 | 上主命令摩西講： |
| 25:17 | 「你著去攻擊米甸人，給𪜶拍敗； |
| 25:18 | 因為𪜶佇比珥的事件及𪜶的同胞哥斯比的代誌，用詭詰的計謀陷害恁；哥斯比是米甸人一個首領的查某子，伊因為比珥的事件佇瘟疫流行的時互人鑿死。」 |